Almaty-akshamy.kz سايتىندا بۇگىن جارىق كورگەن جاڭالىقتارعا شولۋ – كۇن كەرۋەنى
12 - پرەمەر
كەشەدەن بەرى ەلدەگى ەڭ تەمەپەراتۋراسى جوعارى بولعان سۇراقتىڭ جاۋابى بۇگىن تابىلدى. ەش ءتاۋىپتىڭ قۇمالاعىنا تۇسپەگەن، ەشبىر جاۋىرىنشى انىقتاي الماعان كانديدات ولجاس بەكتەنوۆتى ق ر پرەمەر-مينيسترى ەتىپ تاعايىنداۋ تۋرالى پرەزيدەنتتىڭ جارلىعى شىقتى.
ق.توقايەۆ قول قويعان جارلىقتا: «ولجاس اباي ۇلى بەكتەنوۆ قازاقستان رەسپۋبليكاسىنىڭ پرەمەر-مينيسترى بولىپ تاعايىندالسىن، ول بۇرىنعى اتقارعان لاۋازىمىنان بوساتىلسىن»، - دەلىنگەن.
سونىمەن قاتار پرەزيدەنتتىڭ جارلىعىمەن بىرنەشە مينيستر ءوز ورنىندا قالدى.
قوشانوۆ قايدا ءجۇر؟
ءماجىلىس ءتوراعاسىنىڭ بۇگىنگى ءماجىلىس وتىرىسىنا قاتىسپاۋ سەبەبى بەلگىلى بولدى. ەرلان قوشانوۆ كوروناۆيرۋس ينفەكسياسىنا شالدىققان.
ۇكىمەت باسىنان ءۇمىت كوپ...
بۇگىن پرەزيدەنت قاسىم-جومارت توقايەۆ ءماجىلىستىڭ جالپى وتىرىسىندا جاڭادان جاساقتالاتىن ۇكىمەتتىڭ الدىندا تۇرعان مىندەتتەردى اتاپ، ءدال ءقازىر بوساڭسيتىن كەز ەمەس ەكەنىن ەسكە سالدى.
«ءبىراق ءبىز ەلىمىزدىڭ الەۋەتىن ودان ءارى ارتتىرۋمىز كەرەك. بۇل الدىمىزدا تۇرعان بيىك ماقسات. سوندىقتان بوساڭسۋعا بولمايدى. باسقا سوزبەن ايتقاندا، ۇزاقمەرزىمدى ستراتەگيالىق ماقساتتارعا قول جەتكىزۋ ءۇشىن مۇنىڭ ءبارى جەتكىلىكسىز ەكەنى انىق. قازاقستاندى وزىق ەلگە اينالدىرۋىمىز كەرەك. بۇل جاي ۇران ەمەس. بۇل – ءبىزدىڭ ناقتى جوسپارىمىز. بىزگە كەرەگى – دامۋدىڭ سارا جولى. سوندىقتان تۇبەگەيلى ساياسي رەفورمالار جۇرگىزۋمەن قاتار ەلىمىزدىڭ قوعامدىق-ەكونوميكالىق ومىرىندە تەرەڭ وزگەرىستەر جاساۋ ءۇشىن باتىل شارالار قابىلداۋىمىز قاجەت. ەڭ باستىسى، ءبىزدىڭ بارلىق ىس-ارەكەتىمىز ادىلەتتى قازاقستان قۇرۋ قاعيداتىنا ساي بولۋعا ءتيىس»، دەدى قاسىم-جومارت توقايەۆ.
پرەزيدەنت اكىمشىلىگىنىڭ باسشىسى تاعايىندالدى
ول بۇعان دەيىن قازاقستان رەسپۋبليكاسى پرەزيدەنتىنىڭ ءىس باسقارۋشىسى بولعان ايبەك دادەبايەۆ.
قوزعالىس شەكتەلىپ تۇر
اۋا رايىنىڭ قولايسىزدىعىنا بايلانىستى 6 وبلىستا رەسپۋبليكالىق ماڭىزى بار اۆتوجولداردىڭ 16 ۋچاسكەسىندە كولىك قوزعالىسىنا شەكتەۋ ەنگىزىلدى. اۆتوكولىكتىڭ بارلىق تۇرىنە شەكتەۋ ەنگىزىلگەن. اۆتوجولداردى قىسقى كۇتىپ-ۇستاۋعا 673 بىرلىك تەحنيكا مەن 1285 جولشى جۇمىلدىرىلدى.
ۇلىبريتانيانىڭ 75 جاستاعى كورولى III ءچارلزدىڭ قاتەرلى ىسىككە شالدىققانىن بۋكينگەم سارايى حابارلادى.
«دياگنوستيكالىق تەكسەرۋلەر قاتەرلى ىسىكتىڭ ءتۇرىن انىقتادى. كورول دۇيسەنبىدەن باستاپ تۇراقتى ەمدەلۋگە كىرىستى. ول تەزىرەك ەمدەلۋگە قۇشتار جانە مۇمكىندىگىنشە مەملەكەتتىك قىزمەتكە تولىقتاي ورالۋعا اسىعادى»، - دەلىنگەن حابارلامادا.
بيىلعى دەكلاراسيانى كىم تاپسىرۋ كەرەك؟
2024 جىلعى 1 قاڭتاردان باستاپ دەكلاراسيانى زاڭدى تۇلعالاردىڭ باسشىلارى مەن قۇرىلتايشىلارى (قاتىسۋشىلارى)، دارا كاسىپكەرلەر، سونداي-اق ولاردىڭ جۇبايلارى تاپسىرۋعا ءتيىس. بۇل تالاپ ارەكەتسىز جانە قىزمەتىن توقتاتقان تۇلعالارعا دا قولدانىلادى.
25 ملن تەڭگەنى جىمقىرعان
«ەرتىس ورمانى» باسشىسى پارا الدى دەگەن كۇدىككە ءىلىندى. ول كاسىپكەرلەرگە ىسكەرلىك ورماندى زاڭسىز كەسكەنى جانە ساتقانى ءۇشىن پارا الۋدىڭ قىلمىستىق سحەماسىن ۇيىمداستىرعانى انىقتالدى. رەزەرۆات باسشىسى 2 اي مەرزىمگە قاماۋعا الىندى. سونىمەن قاتار، رەزەرۆاتتىڭ بەس بۋحگالتەرىنە قاتىستى سوتقا دەيىنگى تەرگەۋ جۇرگىزىلۋدە، ولار 2021-2023 جىلدار ارالىعىندا وزدەرىنىڭ كارتوچكالىق شوتتارىنا، سونداي-اق مەكەمەنىڭ جۇمىس ىستەپ تۇرعان جانە بۇرىنعى قىزمەتكەرلەرىنىڭ شوتتارىنا جالاقىنى ەسەپتەۋ جانە اۋدارۋ ارقىلى 25 ملن تەڭگە سوماسىندا اسا ءىرى مولشەردە بيۋدجەت قاراجاتىن جىمقىرعان. كەلتىرىلگەن ماتەريالدىق زالال ءىشىنارا وتەلدى. تەرگەۋ جالعاسۋدا.
كولونياداعى اعاسىنا اقشا وتكىزبەك بولعان...
ايەل ادام، سومكەسىنىڭ ىشىنە اقشا تىگىپ العان. مەكەمە قىزمەتكەرلەرىنىڭ قىراعىلىعىنىڭ ناتيجەسىندە تەكسەرۋ كابينەتىنەن 5000 جانە 10 000 تەڭگە نومينالىنداعى اقشا تابىلىپ، تاركىلەندى.
«ەسكەرتۋلەرگە قاراماستان، سوتتالعانداردىڭ تۋىستارى مەن جاقىن ادامدارى تالاپتاردى ورىنداماي، مەكەمەدەگى سوتتالعاندارعا تىيىم سالىنعان زاتتاردى وتكىزۋ ارەكەتتەرىن جالعاستىرىپ جاتىر»، – دەدى مەكەمە باستىعى ەرمەك كۇزدەۋباي.
ەلدەگى قوقىس پوليگونىنىڭ 80 پايىزعا جۋىعى نورماعا ساي ەمەس
«اكىمدىكتەرمەن جانە ورتالىق مەملەكەتتىك ورگاندارمەن بىرلەسىپ شاعىن جانە شالعايداعى ەلدى مەكەندەردە قاتتى تۇرمىستىق قالدىق پوليگوندارىن رەسىمدەۋ تەتىكتەرىنىڭ پىسىقتالىپ جاتقاندىعىن اتاپ وتكەن ءجون. اتاپ ايتساق، وسى ورىندارعا قويىلاتىن مىندەتتى ەڭ تومەنگى ەكولوگيالىق، سانيتاريالىق-ەپيدەميولوگيالىق جانە قۇرىلىس سالاسىنداعى تالاپتار تالقىلانۋدا»، - دەپ حابارلايدى ق ر ەكولوگيا جانە تابيعي رەسۋرستار ءمينيسترىنىڭ مىندەتىن اتقارۋشى ەرلان نىسانبايەۆ.
الماتىدا ۇرلىق ازايىپتى
پوليسيانىڭ الدىن الۋ شارالارىنىڭ ارقاسىندا بوتەننىڭ مۇلكىن ۇرلاۋ سانى 36%-عا ازايدى، بۇل قىلمىستىڭ اشىلۋى 13،9% - عا ارتقان.
«كوبىنەسە 1-2 قاباتتاعى پاتەرلەردە تۇراتىن ادامدار تەرەزەنى اشىپ كەتەدى. بۇل جاعدايدا تەرەزەلەر تورلارمەن جابدىقتالماعان. سونداي-اق، ۇرىلار الەۋمەتتىك جەلىلەردى باقىلاپ وتىرادى، يەلەرى دەمالىسقا كەتكەنىن سول جەردەن ءبىلىپ وتىرادى. ادامدار وزدەرى «ءبىز 10 كۇننەن كەيىن بولامىز» دەپ دەمالىسقا كەتكەندەرىن اڭداماي حابارلاپ وتىرادى»، - دەدى الماتى قالاسى پوليسيا دەپارتامەنتىنىڭ رەسمي وكىلى سالتانات ازىربەك.
جەمقورلاردان جيىرما مەكتەپ
ولاردان تاركىلەنگەن قارجىعا تاعى 20 جاڭا مەكتەپ سالىنادى. بۇل قاراجاتقا سالىناتىن ءبىلىم بەرۋ نىساندارىنىڭ ءتىزىمى ۆەدومستۆونىڭ سايتىندا جاريالانعان.
شىمكەنت قالاسىندا، جەتىسۋ جانە قىزىلوردا وبلىستارىندا ءۇش مەكتەپتەن، جامبىل وبلىسىندا ءتورت مەكتەپ، استانا قالاسى مەن الماتى وبلىسىندا ەكى مەكتەپتەن، بقو، پاۆلودار، سولتۇستىك قازاقستان وبلىستارىندا ءبىر مەكتەپتەن سالىنادى.
پاريجگە بارامىز با، جۇلدەلى بولامىز با؟
پاريج وليمپياداسىنا دايىندىق جۇمىستارىنا ارنالعان شتاب ءوز جۇمىسىن جالعاستىرىپ جاتىر.
ق ر سپورت كوميتەتى ءمالىم ەتكەندەي، XXXIII جازعى وليمپيا ويىندارى 26 شىلدە مەن 11 تامىز ارالىعىندا وتەدى.
قازىرگى تاڭدا قازاقستان ۇلتتىق قۇراماسىنىڭ قورجىنىندا پاريج وليمپياداسىنىڭ 19 ليسەنزياسى (سپورتتىڭ 8 تۇرىنەن) بار (ساداق اتۋ – 4، ۆەلوشوسسە – 3، نىسانا كوزدەۋ – 5، قازىرگى بەسسايىس – 2، بوكس – 2، گرەك-ريم كۇرەسى – 1، ەركىن كۇرەس – 1، سپورتتىق گيمناستيكا – 1). وليمپيا ويىندارىنا دەيىن 69 ليسەنزيالىق جارىس قالدى. ونىڭ ىشىندە 5 الەم چەمپيوناتى، 7 ازيا چەمپيوناتى جانە 57 رەيتينگتىك تۋرنير بار.
وزگەگە ءومىر سىيلا...
ەرتەڭ الماتى قالاسى قوعامدىق دەنساۋلىق ساقتاۋ باسقاراماسىنىڭ شجق «№5 قالالىق ەمحانا» كمك جانە «Qamqor Charity» قق-نىڭ ۇيىمداستىرۋىمەن دۇنيەجۇزىلىك قاتەرلى ىسىككە قارسى كۇرەس كۇنىنە وراي قان دونورلارىنا ارنالعان «قان تاپسىرىپ، وزگەگە ءومىر سىيلا» اتتى اكسياسى وتەدى.
تاپسىرىلعان قان الماتى قالاسىنداعى «قازاق ونكولوگيا جانە راديولوگيا عىلىمي-زەرتتەۋ ينستيتۋتى» مەن «پەدياتريا جانە بالالار حيرۋرگياسى عىلىمي ورتالىعىنىڭ» ونكولوگيا جانە ونكوگامەتولوگيا بولىمشەلەرىندە ەمدەلەتىن ناۋقاستاردىڭ ەمىنە قولدانىلادى.