تىرشىلىگى تىنىمسىز الماتى جۇرتىنىڭ تىنىسى تۇنگە قاراي سايابىرسىعانداي كورىنگەنىمەن، قالا ەشقاشان تولىق تىنىشتىققا كەتپەيدى. بىرەۋلەر ۇيىنە اسىعىپ بارادى، بىرەۋلەر جۇمىستان قايتادى، ال بىرەۋلەر ءۇشىن ءتۇن - ەڭ جاۋاپتى ۋاقىت. اqshamnews.kz تىلشىلەرى الماتى پاترۋلدىك پوليسياسىنىڭ مامانداندىرىلعان باتالونىندا قىزمەت ەتەتىن اعا ينسپەكتورلار دانيار سۇلەيمەنوۆ جانە ايان رىسحانوۆپەن بىرگە تۇنگى 01:00-دەن تاڭعى 04:00-گە دەيىن قالا كوشەلەرىن ارالاپ، "ۇيىقتامايتىن الماتىنىڭ" تىنىس-تىرشىلىگىن تورۋىلداپ قايتتىق.
تۇنگى 01:00. رەيد نەدەن باستالدى؟
رەيد الماتىنىڭ باستى ارتەريالارىنىڭ ءبىرى - ءال-فارابي داڭعىلىنان باستالدى. تۇنگى قالادا كولىك قوزعالىسى سيرەك بولعانىمەن، ءتارتىپ بۇزۋشىلار دا كەزدەسەدى.
كوپ ۇزاماي حاليۋللين كوشەسى مەن قۇلجا تاسجولى قيىلىسىندا وعاش مانيەۆر جاساپ كەلە جاتقان Hyundai Elantra كولىگى نازارعا ىلىكتى. تەكسەرۋ بارىسىندا جۇرگىزۋشىنىڭ جۇرگىزۋشى كۋالىگى جوق ەكەنى انىقتالدى. جولدىڭ وڭ جاق جيەگىنە ارنايى پارمەن توقتاعان جۇرگىزۋشى ءوز ءۋاجىن ايتتى:
"مەن كۋالىگىمنىڭ جوق ەكەنىن بىلمەدىم. سەبەبى زاتتاي تۇردە قولىمدا تۇر. بىلتىر جازدا جكو-عا ءتۇسىپ، ەكىنشى كولىك يەسىمەن اۋىزشا كەلىسكەن ەدىك. ءبىراق ول كەيىن سىرتىمنان ارىز جازىپ جىبەرىپتى… بىلمەي قالدىم"، - دەدى ول.
الايدا پاترۋل قىزمەتكەرلەرى جاعدايدىڭ قۇقىقتىق جاعى ناقتى ەكەنىن ءتۇسىندىردى: ازامات ق ر اقبتك-نىڭ 612-بابى 3-تارماعىنا سايكەس جاۋاپكەرشىلىككە تارتىلىپ، قاماۋعا الىناتىنى حابارلاندى. تۇنگى رەيدتىڭ العاشقى مينۋتتارى-اق ءبىر نارسەنى اڭعارتتى: جولدا "كەزدەيسوقتىق" بولمايدى - ءتارتىپ تە، تالاپ تا ناقتى.
02:13. ءال-فارابي - سايىن قيىلىسى: زاڭ عانا ەمەس، كومەك تە بار
تۇنگى قالادا پاترۋل جۇمىسى تەك توقتاتىپ-تەكسەرۋمەن شەكتەلمەيدى. ءال-فارابي - سايىن قيىلىسىندا اپاتتىق شامىن قوسىپ توقتاپ تۇرعان كولىك بايقالدى.
بەلگىلى بولعانداي، Toyota كولىگىنىڭ جۇرگىزۋشىسىنىڭ جانارمايى تاۋسىلىپ، جولدا قالىپ قويعان. ينسپەكتورلار جاعدايدى بىردەن ءتۇسىنىپ، قاۋىپسىزدىكتى قامتاماسىز ەتىپ، جۇرگىزۋشىگە كومەكتەستى. ارتىنشا كولىك يەسى ريزاشىلىعىن جاسىرمادى:
"كوپ راقمەت. ريزا بولدىم. دەر كەزىندە بايقاپ، بىردەن قول ۇشىن سوزدى"، - دەدى ول.
02:54. تۇمان ءتۇستى. قالاداعى ءاربىر نۇكتە نازارسىز قالمايدى
ءتۇن ورتاسىندا اۋا رايى كۇرت وزگەردى. قالانى تۇمان باسا باستادى. مۇندايدا جول-كولىك وقيعاسىنىڭ ءقاۋپى ارتا تۇسەتىنى بەلگىلى. ينسپەكتورلار بۇل جاعدايدى دا نازاردان تىس قالدىرمادى: راسيا ارقىلى قۇلجا تراسساسى ماڭىندا تۇمان قالىڭداعانىن ەسكەرتىپ، ارىپتەستەرىنە دەرەۋ حابارلادى.
كوپ ۇزاماي تاعى ءبىر ماڭىزدى اقپارات ءتۇستى: ءال-فارابي داڭعىلىنداعى جارىقتىڭ ءوشىپ قالعانى جونىندە ەسكەرتۋ جاسالدى. قاراپايىم جۇرگىزۋشى ءۇشىن بۇل - جاي عانا "قاراڭعىلاۋ" كوشە بولعانىمەن، ال پاترۋل ءۇشىن بۇل - ءقاۋىپتى فاكتور، الدىن الا ارەكەت ەتۋدى تالاپ ەتەتىن بەلگى.
03:10. الماتىعا "سەرگەك" كامەرالارىنىڭ كوزىمەن قاراعاندا
ينسپەكتورلار بىزگە جۇمىس بارىسىندا پايدالاناتىن "قورعاۋ" قوسىمشاسى جايلى دا ءتۇسىندىردى. بۇل جۇيە ارقىلى قالاداعى سەرگەك كامەرالارىنا قولجەتىمدىلىك اشىلىپ، جولدا ءتارتىپ بۇزعانداردى جەدەل انىقتاۋعا مۇمكىندىك بەرەدى.
قوسىمشانىڭ كومەگىمەن:
- ەرەجە بۇزعان جۇرگىزۋشىلەر،
- ايىپپ ۇلى تولەنبەگەن كولىكتەر،
- قۇجات مەرزىمى ءوتىپ كەتكەن جاعدايلار
جەدەل انىقتالىپ، ەكيپاجدارعا باعىت-باعدار بەرىلەدى.
پاترۋل قىزمەتكەرلەرىنىڭ ايتۋىنشا، جۇمىس كۇندەرى زاڭ بۇزۋشىلىق اسا كوپ بولمايدى. سەبەبى، قالا تۇرعىندارى "ەرتەڭ جۇمىس" دەپ كوبىنە شىرت ۇيقىعا كەتەدى. ال جۇما–سەنبى–جەكسەنبى كۇندەرى شاقىرتۋ دا، تاۋەكەلدى جۇرگىزۋ دە كوبەيەدى: جىلدامدىقتى شامادان تىس اسىرعاندار، تۇنگى "قاتتى ايداۋ" ادەتى، شاقىرتۋلار سانى ارتادى.
03:37. اۋەجاي ماڭى: وشكەن باعدارشام، قولمەن رەتتەلگەن قوزعالىس
رەيدتى ءارى قاراي جالعاستىرامىز. اۋەجاي ماڭىن ارالاۋ بارىسىندا مايلين - بۇقتىرما كوشەلەرىنىڭ قيىلىسىندا باعدارشامنىڭ ءوشىپ قالعانى بايقالدى. مۇنداي جەردە ءبىر ساتتىك ابايسىزدىق ۇلكەن اپاتقا اينالۋى مۇمكىن.
پاترۋل قىزمەتكەرلەرى دەرەۋ توقتاپ، جول قوزعالىسىن قاۋىپسىزدەندىردى. اعا لەيتەنانت ايان اسقار ۇلى كولىكتەر لەگىن قولمەن رەتتەپ، جۇرگىزۋشىلەرگە بەلگى بەرىپ، قيىلىستاعى ءتارتىپتى ۋاقىتشا ءوز باقىلاۋىنا الدى.
تۇنگى قالادا جارىق وشسە - قوزعالىس توقتامايدى. سول ساتتە توقتاتاتىن دا، رەتتەيتىن دە - وسىنداي كەزەكشى ەكيپاجدار.
تاڭعى 04:00. "ءبىزدىڭ تىنىشتىعىمىز - بىرەۋدىڭ ۇيقىسىز ءتۇنى"
ساعات تاڭعى تورتكە جاقىنداعاندا قالا بىرتىندەپ تىنىشتالا ءتۇستى. اعا لەيتەنانت ايان اسقار ۇلى وسى تۇستا كوپشىلىك ەلەمەيتىن تىنىش ۇيقىنىڭ ارتىندا كوزگە كورىنبەيتىن ەڭبەكتىڭ بارىن ايتتى.
"سىرت كوزگە ءبىزدىڭ جۇمىس بىلىنبەۋى مۇمكىن. تاڭەرتەڭ ادامدار ادەتتەگى ومىرىنە اتتانادى. قالا تىنىش. ال وسى تىنىشتىقتىڭ ارتىندا تۇنىمەن جۇمىس ىستەيتىن پوليسيا قىزمەتكەرلەرى تۇرعانىن كوبى بايقامايدى. ءبىز تۇنىمەن قالانىڭ تىنىشتىعىن كۇزەتىپ، تۇرعىنداردىڭ بەيبىت ءارى تىنىش ۇيقىسى ءۇشىن قىزمەت ەتەمىز. وتباسىمىز بارىنشا تۇسىنەدى. ارينە وڭاي ەمەس. ءبىزدىڭ كۇنىمىز بەن ءتۇنىمىز اۋىسىپ كەتكەن. وتباسىمىزعا تەك دەمالىس كۇندەرى كوڭىل بولۋگە تىرىسامىز"، - دەيدى مامان.
ايتا كەتەيىك، جاقىندا پرەزيدەنت قاسىم-جومارت توقايەۆ Turkistan گازەتىنە بەرگەن كولەمدى سۇحباتىندا قالا اكىمى دارحان ساتىبالدىعا الماتىنى نيۋ-يورك، ماسكەۋ، پاريج سياقتى "ەشقاشان كوز ىلمەيتىن قالاعا" اينالدىرۋعا تاپسىرما بەرگەنىن ايتقان ەدى.
ەسكە سالايىق، بۇعان دەيىن 24/7 جۇمىس ىستەيتىن كىتاپحانا تۋرالى جازعان ەدىك.
سۋرەتتەر: نۇربول ىنتىماق ۇلى