قىزدىڭ "جوق" دەگەنى - "جوق!" ماماندار ستالكينگكە قارسى ناقتى قادامداردى اتادى

شىمكەنتتە كىسى قولىنان قازا تاپقان نۇراي سەرىكبايدىڭ ءىسى قوعامدى ءدۇر سىلكىندىردى. وقيعادان سوڭ كوپشىلىكتىڭ كوكەيىندە "ادامدى كۇن سايىن اڭدۋ، توقتاۋسىز مازالاۋ، "جوق" دەگەندى ەلەمەۋ - جاي عانا "قىزعانىش" پا، الدە ومىرگە ءقاۋىپ توندىرەتىن قىلمىس پا؟" دەگەن ساۋال تۋدى. Aqshamnews.kz ءتىلشىسى وزەكتى تاقىرىپ اينالاسىنداعى ءتۇرلى سۇراقتارعا جاۋاپ ىزدەپ، زاڭگەر مەن پسيحولوگتىڭ ستالكينگتىڭ العاشقى بەلگىلەرى، قاۋىپسىزدىك جوسپارى جانە قۇقىقتىق قورعانۋ تەتىكتەرى تۋرالى پىكىرىن تىڭدادى.

ارمان ءشارىپوۆ 

زاڭگەر، قۇقىق قورعاۋشى

ستالكينگ - "ماحاببات" ەمەس، زاڭسىز قۋدالاۋ فاكتىسى

كوپ ادام ستالكينگتى (اڭدۋ، سوڭىنان قالماي مازالاۋ) "جاي عانا قىزعانىش"، "قاتتى جاقسى كورۋ، ۋايىمداۋ" دەپ قابىلدايدى. ءبىراق زاڭگەر ارمان ءشارىپوۆتىڭ ايتۋىنشا، ماسەلەنىڭ وزەگى - زاڭسىز قۋدالاۋ. مۇندا مىندەتتى تۇردە ۇرىپ-سوعۋ نەمەسە كۇش قولدانۋ بولماۋى مۇمكىن. دەگەنمەن ادامنىڭ تۇراقتى تۇردە ىزىنە ءتۇسۋى، بايلانىسقا ماجبۇرلەۋى، كۇتپەگەن جەردەن پايدا بولۋى، تىنىشتىعىن بۇزۋى - جابىرلەنۋشىنىڭ قاۋىپسىزدىگى مەن ەركىندىگىنە قول سۇعاتىن ارەكەتتەر.

"ەگەر ءوزىڭىزدى جابىرلەنۋشى رەتىندە سەزىنسەڭىز، ەڭ باستى قادام - قۇقىق قورعاۋ ورگاندارىنا دەر كەزىندە حابارلاسۋ. جاقىن ماڭداعى پوليسيا بولىمىنە، ۋچاسكەلىك ينسپەكتورعا نەمەسە پوليسيا باسقارماسىنا بارىپ ارىز جازۋ قاجەت. ارىزدىڭ ناقتى فورماسى جوق، الايدا ءمان-جايدى تولىق ءارى ناقتى كورسەتۋ ماڭىزدى: قۋدالاۋ قاشان باستالدى، قالاي كورىنىس تاپتى، كۇندەلىكتى ومىرگە قالاي اسەر ەتتى دەگەن سىندى ساۋالداردىڭ جاۋابىن تولىق قامتۋ قاجەت"، - دەيدى ول. 

نۇرايدىڭ جاعدايىنداي پوليسيا ارەكەتسىز وتىرسا، قايتپەك كەرەك؟

ستالكينگكە قاتىستى داۋدا كوپ جاعدايدا شەشۋشى ماسەلە - دالەلدىڭ ساپاسى. زاڭگەر ارىزعا قوسا تىركەۋگە بولاتىن ناقتى دالەلدەر پاكەتىن اتاپ ءوتتى:

• مەسسەندجەرلەردەگى حات الماسۋلار (سكرينشوت، چات تاريحى)؛

• قوڭىراۋلار تاريحى (كۇنى، ۋاقىتى، ءنومىرى)؛

• اۋديو/ۆيدەو حابارلامالار؛

• بەينەباقىلاۋ كامەرالارىنىڭ جازبالارى (ءۇي ماڭى، پودەزد، كەڭسە، قوعامدىق ورىندار)؛

• كۋاگەرلەردىڭ تۇسىنىكتەمەسى (كورشى، ارىپتەس، دوس، تۋىس - كەز كەلگەن كۋا).

"وسىنداي دالەلدەر بولىپ تۇرىپ، پوليسيا ارىزدان كەيىن ءتيىستى شارا قولدانباسا، جابىرلەنۋشى پوليسيا باسشىلىعىنا، مينيسترلىككە نەمەسە پروكۋراتۋراعا شاعىم تۇسىرۋگە قۇقىلى. شاعىمدا ارىزدى قابىلداماۋ، تىركەمەۋ، تەكسەرۋدى سوزۋ، ارەكەتسىزدىك سياقتى جايتتاردى ناقتى كورسەتۋ قاجەت"، - دەپ قوستى زاڭگەر. 

ۇلمەكەن ساندىبەك قىزى 

پسيحولوگ، گەشتال-تەرپايەۆت

قىزىل جالاۋشالار: ستالكەردى قالاي ەرتە بايقايمىز؟

پسيحولوگ ۇلمەكەن ساندىبەك قىزى ستالكينگتىڭ ءقاۋىپتى تۇسى - ونىڭ كوبىنە "جىلى" كەيىپتەن باستالاتىنىن ايتادى. العاشقى كەزەڭدە ادام وتە قامقور، رومانتيك، "ءمىنسىز" بولىپ كورىنۋى مۇمكىن: جىلى ءسوز، اسەرلى اڭگىمە، ءوزىن وزگەلەرمەن سالىستىرىپ، "مەن قانداي تاماشامىن" دەپ ۇزدىكسىز دالەلدەۋى ىقتيمال.

ءبىراق ستالكەردىڭ بويىنان ەرتە بايقالاتىن ناقتى "قىزىل جالاۋشالار" بار:

• شەكتەن تىس باقىلاۋ: قايداسىڭ، كىممەنسىڭ، نەگە ونلاين ەمەسسىڭ، "تەكسەرۋ"؛

• قاجەتسىز ءجيى بايلانىس، بىرنەشە مەسسەندجەردەن قاتار جازۋ؛

• "جوق" دەگەندى ەلەمەۋ، "ۋايىمدايمىن" دەپ ءوزىن اقتاۋ؛

• كۇتپەگەن جەردەن پايدا بولۋ، جەكە اقپاراتتى رۇقساتسىز جيناۋ؛

• "سەن مەندىكسىڭ" دەگەن يەلىك سەزىمى، اگرەسسياعا جاقىنداۋ.

"ستالكينگ - ماحاببات ەمەس، باقىلاۋ مەن بيلىك. قۋدالاۋ كۇشەيگەن سايىن جابىرلەنۋشىنىڭ ويلاۋىنا اسەر ەتىپ، "مەن ءوزىم كىنالىمىن بە؟" دەگەن كوگنيتيۆتى بۇرمالانۋدى دا تۋدىرۋى مۇمكىن"، - دەيدى مامان.

قاۋىپسىزدىك جوسپارى جانە مانيپۋلياسياعا جاۋاپ بەرۋ تاكتيكاسى

ستالكينگ جاعدايىندا "ءوزىمدى قالاي ۇستايمىن؟" دەگەن سۇراق تەك قۇقىقتىق ەمەس، پسيحولوگيالىق تا ماسەلە. پسيحولوگ قاۋىپسىزدىك جوسپارى ۇرەيدى ازايتىپ، باقىلاۋ سەزىمىن قايتاراتىنىن ايتادى. ول ءۇشىن:

• ۇرەيدى رەتتەۋ: قورقىنىشتى «قورعانىش رەاكسياسى» دەپ اتاۋ، باياۋ تىنىس الۋ تەحنيكاسى، ا/ۆ جوسپارى (قاجەت بولسا بالاما مارشرۋت/ارەكەت)؛

• ءقاۋىپسىز ورتا جانە ءقاۋىپسىز 3 ادام: سەنەتىن ادامداردى الدىن الا بەلگىلەۋ؛

• كود ءسوز/قۇپيا بەلگى: جاقىندارمەن «شۇعىل كومەك كەرەك» دەگەن بەلگى بولاتىن ءسوز كەلىسۋ؛

• قوزعالىس قاۋىپسىزدىگى: مارشرۋت پەن ۋاقىتتى وزگەرتۋ، جارىق ءارى ادام كوپ جەر، جالعىز جۇرمەۋ؛

• سيفرلىق قاۋىپسىزدىك: اككاۋنتتاردى جابۋ، گەولوكاسيانى ءوشىرۋ، ءقۇپياسوز اۋىستىرۋ، دالەلدەردى ساقتاۋ؛

• ءۇي/جۇمىس ادەتتەرى: كەلۋ-كەتۋ ۋاقىتىن الماستىرۋ، كۇزەت/كونسەرج، كورشىلەردى حاباردار ەتۋ.

مانيپۋلياسياعا كەلسەك، پسيحولوگ وتە پراكتيكالىق ەرەجەنى ايتادى: ەكىۇشتى سويلەم - ستالكەر ءۇشىن "مۇمكىندىك". سوندىقتان قىسقا، ناقتى شەكارا قويۋ ماڭىزدى. مىسالى:

• "سەنسىز ءومىر سۇرە المايمىن" دەسە → "بۇل سەنىڭ سەزىمىڭ. مەن ول ءۇشىن جاۋاپتى ەمەسپىن" دەپ جاۋاپ بەرۋ؛

• "ءوزىڭ كىنالىسىڭ" → "كىنالاۋ قابىلدانبايدى. اڭگىمە اياقتالدى" دەۋ؛

• "ايىرىلساق، ءوز-وزىمدى ولتىرەمىن" دەگەن جاعدايدا → "مەن مۇنداي جاۋاپكەرشىلىكتى المايمىن. بۇل ءۇشىن ماماندار بار" (سودان كەيىن بايلانىسقا شىقپاۋ، بۇعاتتاپ تاستاۋ ت.ب.)

نەگىزگى قاعيدا: جاۋاپ بەرمەۋ، قاجەت جەردە بۇعاتتاۋ، ارەكەتتەردىڭ ءبارىن تىركەۋ. ءتىپتى اشۋمەن جاۋاپ قايتارۋ دا ستالكەر ءۇشىن "نازار ءبىلدىرۋ" بولىپ، مىنەز-قۇلقىن كۇشەيتۋى مۇمكىن.

نۇراي سەرىكباي وقيعاسى: قانداي ساباق الۋىمىز كەرەك؟

شىمكەنتتە ستالكينگ قۇربانى بولعان نۇراي سەرىكبايدىڭ ءىسى قوعامعا كوپ شىندىقتى ايقىندادى: ستالكينگتى ۇساق نارسە دەپ قاراۋ - ءقاۋىپتى. پسيحولوگ تا، زاڭگەر دە ورتاق ءبىر ويدى ورامداپ ەشقاشان قۇربان كىنالى ەمەس ەكەنىن ايتادى. كيىم كيىس، مىنەز-قۇلىق، «"نەگە وعان جاۋاپ بەردىڭ/بەرمەدىڭ؟" دەگەن سياقتى سۇراقتار ماسەلەنى شەشپەيدى، كەرىسىنشە جابىرلەنۋشىنىڭ جاعدايىن قيىنداتا تۇسەدى. 

"قۇرباندارعا جاقىنداردىڭ قولداۋى، تىڭداۋ جانە سەنۋ، قورقىنىش پەن قوبالجۋىن ءبولىسۋ وتە ماڭىزدى. قاۋىپسىزدىككە كومەك كورسەتۋ ءۇشىن مارشرۋتتى، بايلانىس رەجيمىن بىرگە وزگەرتۋ، قاجەت بولسا بىرگە ءجۇرۋ. دالەل جيناۋعا سكرينشوتتار، حابارلامالار، كۇندەلىك جۇرگىزۋگە قولداۋ ءبىلدىرۋ. ماماندارعا جول كورسەتۋ - پسيحولوگ، پوليسيا، كريزيستىك ورتالىقتارى. ەگەر قۇربانعا دەر كەزىندە سەنىم ءبىلدىرىپ، تىڭداپ كومەك بەرمەسەڭىز قولداۋ تاپپاي سۋيسيدكە بولماسا، ستالكەردىڭ ىعىنا جىعىلۋعا جول اشىلادى. ءومىر بويى ۇرەي-قورقىنىشپەن ءومىر سۇرۋگە ءماجبۇر بولادى"، - دەيدى پسيحولوگ ۇلمەكەن ساندىبەك قىزى.