توي كۇنىن "ادەمى داتاعا" جوسپارلاۋ كەيىنگى جىلدارى ترەندكە اينالدى. 2026 جىلى جۇپ-جۇبىمەن كەلەتىن، قايتالاناتىن جانە "26" سانى بار كۇندەر كوپ. Aqshamnews.kz ءتىلشىسى بيىلعا قۋانىشىن جوسپارلاپ جۇرگەن جاندارعا تاپتىرمايتىن ماتەريال ۇسىنادى.
قىس، كوكتەم، جاز، كۇز: قاي مەزگىلدە "ادەمى" داتا كوپ؟
قىسقى تويدىڭ اتموسفەراسى ەرەكشە. ال تانىمال كۇندەر تەز بروندالادى. بۇل ماۋسىمدا ەڭ ءجيى تاڭدالاتىن داتالار: 26.01.2026، 02.02.2026، 14.02.2026، 26.02.2026، سونداي-اق جىلدىڭ اياعىنداعى 12.12.2026 جانە 26.12.2026.
ال كوكتەم - "جاڭا باستاۋ" سيمۆولى. جۇپتار كوبىنە "اينالى" داتالاردى تاڭدايدى: 03.03.2026، 04.04.2026، 05.05.2026، سونداي-اق ايدىڭ "26" كۇنىمەن كەلەتىن 26.03.2026، 26.04.2026، 26.05.2026.
جاز - ناعىز تويدىڭ ماۋسىمى. بۇل ۋاقىت اشىق اسپان استىنداعى تويعا ىڭعايلى بولعاندىقتان، 06.06.2026، 20.06.2026، 22.06.2026، 26.06.2026 جانە 08.08.2026 سەكىلدى داتالار الدىن الا جوسپارلاۋدى قاجەت ەتەدى. ءتىپتى قازىردەن باستاپ بۇل داتالاردى برونداپ قويا بەرگەن ءجون.
كۇزدىڭ ەرتە كەزەڭى قۋىنشتى كۇندەرگە جايلى ءارى فوتوسەسسياعا كوركەم فون بەرەدى. بۇل ماۋسىمدا ءجيى تاڭدالاتىندارى: 09.09.2026، 10.10.2026، 11.11.2026 جانە ايدىڭ "26" كۇنىمەن كەلەتىن 26.09.2026، 26.10.2026، 26.11.2026.
دۇرىس داتا تاڭداۋ تاعدىر ءۇشىن ماڭىزدى ما؟ نۋمەرولوگ كەڭەسى
ماڭىزدى كۇندەر ءۇشىن "ادەمى" داتالارعا قىزىعۋشىلىق جىلدان-جىلعا كۇشەيىپ كەلەدى. قازاقستاندىق نۋمەرولوگ، استرولوگ ءارى پسيحولوگ ايسۇلۋ احيموۆانىڭ ايتۋىنشا، كوپشىلىك بۇل تاڭداۋدىڭ استارىنداعى مانگە ۇڭىلە بەرمەيدى.
ماماننىڭ سوزىنشە، جۇرت مۇنداي داتالاردى "ماگيالىق"، "ماحابباتتى كۇشەيتەتىن" نەمەسە "ساتتىلىكتى كەپىلدەيتىن" كۇن رەتىندە قابىلدايدى. ءبىراق ول بۇل كوزقاراسپەن ءاردايىم كەلىسە بەرمەيتىنىن اتاپ ءوتتى:
"مەن مۇنداي داتالارعا تەرەڭىرەك قارايمىن جانە ءاردايىم جاپپاي ەنتۋزيازمدى بولىسە بەرمەيمىن. نەگىزگى قاتەلىك - اينا داتانىڭ ءوزى اۆتومات تۇردە "ءساتتى" دەگەن سەنىم. ويتكەنى مۇنداي كۇندەر "باقىت سىيلامايدى"، تەك سول كۇننىڭ وزىنە ءتان ەنەرگياسىن كۇشەيتەدى. ال ول ەنەرگيانىڭ قانداي ەكەنىن كوپ ادام بىلمەيدى، ءتىپتى تالداۋعا تىرىسپايدى"، - دەيدى ول.
سوندىقتان مامان "مودا ءۇشىن" ەمەس، جەكە ۇيلەسىم ءۇشىن تاڭداۋعا شاقىرادى: داتا تاڭداعاندا جۇپتىڭ جەكە ساندارى، جىل مەن ايدىڭ استرولوگيالىق فونى جانە پسيحولوگيالىق دايىندىق قاتار ەسكەرىلۋى كەرەك. قاجەت بولسا، "ەڭ ادەمى ەمەس" كۇننىڭ ءوزى وتباسى ءۇشىن ەڭ تۇراقتى كۇن بولىپ شىعۋى مۇمكىن.
"كەيبىر داتالار ءقاۋىپتى بولۋى مۇمكىن..."
بۇعان قوسا، استرولوگيالىق فاكتور دا ماڭىزدى. نۋمەرولوگتىڭ ايتۋىنشا، 2026 جىلى 22 اقپان "تۇتىلۋ دالىزىنە" سايكەس كەلەدى. بۇل كەزەڭدە تاعدىرعا قاتىستى شەشىم قابىلداۋدا ءقاۋىپ ارتىپ، يلليۋزيا، اسىعىستىق جانە كۇتپەگەن بۇرىلىستار جيىلەيدى.
"پسيحولوگيا تۇرعىسىنان بۇل - ادامداردىڭ جەتىلگەن تاڭداۋدان گورى، مازاسىزدىق پەن سىرتقى قىسىمنىڭ اسەرىمەن ارەكەت ەتەتىن ۋاقىتى"، - دەپ تۇسىندىرەدى ول.
ايسۇلۋ احيموۆا 26.06.2026 كۇنى تۋرالى بىلاي دەپ تۇسىندىرەدى:
"بۇل داتادا ەموسيا تىم كۇشەيىپ، قارىم-قاتىناستا “الدىمەن جارق ەتۋ، كەيىن سۋىپ قالۋ” سەنارييى پايدا بولۋى مۇمكىن. ال “6” ەنەرگياسى تۇرمىس پەن ەسەپتى العا شىعارىپ، سەزىمدى "پايدامەن ولشەۋگە" يتەرمەلەيدى"، - دەيدى ول.
مامان اينا داتالارعا قارسى ەمەسىن، ءبىراق تالداۋسىز جاسالعان تاڭداۋدى قۇپتامايتىنىن العا تارتتى.