تۇركىستان وبلىسى جەتىساي اۋدانى العاباس اۋىلىنداعى ورتتەن كەيىن مەديسينالىق مەكەمەلەرگە ءۇش ادام - ەكى ەرەسەك جانە ءبىر بالا جەتكىزىلدى، - دەپ حابارلايدى aqshamnews.kz ءتىلشىسى وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنە سىلتەمە جاساپ.
ۆەدومستۆو اقپاراتىنا سايكەس، ءقازىر بارلىعى رەانيماسيا بولىمىندە جاتىر، جاعدايلارى اۋىر، ءبىراق تۇراقتى.
"18 قاراشادا جەتىساي اۋدانىندا بولعان ورتكە بايلانىستى ءوڭىردىڭ مەديسينالىق قىزمەتى زارداپ شەككەندەرگە جەدەل تۇردە كومەك كورسەتۋدى باستادى. مەديسينالىق مەكەمەلەرگە ءۇش ادام - ەكى ەرەسەك جانە ءبىر بالا جەتكىزىلدى. بارلىعى رەانيماسيا بولىمىندە جاتىر، جاعدايلارى اۋىر، ءبىراق تۇراقتى. ناۋقاستارعا ينتەنسيۆ تەراپيانىڭ تولىق كەشەنى جۇرگىزىلىپ جاتىر، ولاردىڭ جاعدايى سالالىق مامانداردىڭ تولىق باقىلاۋىندا"، - دەلىنگەن حابارلامادا.
سونىمەن قاتار، باسقارما جەدەل مەديسينا جەلىسى بويىنشا كۇشەيتىلگەن جۇمىس ءتارتىبى ەنگىزىلگەنىن ءمالىم ەتتى.
"وبلىستىق دەنساۋلىق ساقتاۋ مەكەمەلەرىنەن قوسىمشا ماماندار تارتىلىپ، قاجەتتى دارى-دارمەكپەن جانە پسيحولوگيالىق قولداۋمەن قامتاماسىز ەتىلدى. جاعداي تۇركىستان وبلىسىنىڭ دەنساۋلىق ساقتاۋ باسقارماسىنىڭ باقىلاۋىندا"، - دەپ اتاپ ءوتتى وبلىستىق دەنساۋلىق ساقتاۋ باسقارماسىنان.
وقيعانىڭ ءمان-جايى
تۇركىستان وبلىسى توتەنشە جاعدايلار دەپارتامەنتىنىڭ مالىمەتىنشە، 18 قاراشادا تاڭەرتەڭ جەتىساي اۋدانىنا قاراستى العاباس اۋىلىنداعى ەكى قاباتتى جەكە تۇرعىن ۇيدەن ءورت شىققانى تۋرالى حابار تۇسكەن.
"ۇيدە ەكى وتباسى بولعان، شاتىر وپىرىلىپ ءتۇستى": زاكييەۆا وقيعانىڭ جاي-جاپسارىن ايتتى
وقيعا ورنىنا جەتكەن ورتسوندىرۋشىلەر كەلگەن ساتتە ءۇي تولىقتاي ورتكە ورانعانى انىقتالعان. ءورتتى ءسوندىرۋ جانە بارلاۋ كەزىندە ۇيدەن ەس-تۇسسىز جاتقان ءۇش ادام ەۆاكۋاسيالانىپ، جەدەل جاردەم بريگاداسىنا تاپسىرىلدى.
"ءۇيدىڭ ىشىنەن 12 ادامنىڭ ءمايىتى تابىلدى، ولاردىڭ توعىزى – بالا"، – دەلىنگەن تجد حابارلاماسىندا.
كورشىلەردىڭ ايتۋىنشا، وقيعا بولعان ۇيدە قوناقتار بولعان، سەبەبى الدىڭعى كۇنى ءۇي يەلەرىندە ءىس-شارا وتكەن. ءورت 360 شارشى مەتر اۋماقتا تولىق ءسوندىرىلدى.
ءقازىر وقيعا ورنىندا بارلىق جەدەل قىزمەت جۇمىس ىستەپ جاتىر. ءورتتىڭ شىعۋ سەبەبى انىقتالىپ جاتىر، تەرگەۋ باستالدى.
ۇكىمەت پەن تۇركىستان وبلىسىنىڭ اكىمىنە زارداپ شەككەن ازاماتتاردىڭ تۋعان-تۋىستارىنا بارلىق قاجەتتى كومەك كورسەتىپ، قايعىلى وقيعانى جان-جاقتى تەكسەرۋدى تاپسىردى.