گازيانتەپ قالاسىندا 8 مەديسينا قىزمەتكەرى جۇمىس ىستەدى
تۇركياداعى قايعىلى وقيعا كەزىندە اپات وشاقتارىندا قۇتقارۋشىلارمەن بىرگە پارا مەديسينا قىزمەتكەرلەرى دە جۇمىس ىستەدى. ق ر توتەنشە جاعدايلار مينيسترلىگى الماتى قالاسى بويىنشا اپاتتار مەديسيناسى ورتالىعىنىڭ باسشىسى جازىلباي قوزىباحوۆ وڭىرلىك كوممۋنيكاسيالار قىزمەتى الاڭىندا قۇتقارۋ جۇمىستارىنا قوسقان ۇلەسى تۋرالى ايتىپ بەردى، دەپ حابارلايدى Almaty-akshamy.kz.
«6 اقپاندا بىزگە تاپسىرما بەرىلدى، الماتى قالاسىنداعى فيليالدا بەس ادامنان تۇراتىن بىرىكتىرىلگەن مەديسينالىق توپ قۇرۋدى باستادىق. قاجەتتى دارى-دارمەكتەردى، مەديسينالىق قۇرال-جابدىقتاردى، مۇلىكتەردى دايىنداپ، بورتقا تيەپ، 7 اقپاندا تۇركيا رەسپۋبليكاسىنا، گازيانتەپ قالاسىنا ۇشتىق»، - دەدى سپيكەر.
ول جاققا جەتكەننەن كەيىن ءبىر توپ مەديسينا قىزمەتكەرى مەديسينالىق پۋنكت پەن جىلىتۋ پۋنكتىن ورناتتى. العاشقى كۇندەردەن باستاپ تۇركيا ازاماتتارى، ونىڭ ىشىندە جەرگىلىكتى تۇرعىندارى جانە ءبىزدىڭ قۇتقارۋشىلار، قۇقىق قورعاۋ ورگاندارىنىڭ قىزمەتكەرلەرى دارىگەرلەرگە جۇگىنە باستادى. قۇتقارۋ جۇمىستارى جۇرگىزىلگەن جالپى كەزەڭدە الماتىلىق دارىگەرلەر جۇزدەن استام ادامعا كومەك كورسەتتى، ونىڭ ىشىندە 80-نەن استامى - تۇركيا ازاماتتارى. سپيكەردىڭ ايتۋىنشا، مەديسينالىق كومەككە جۇگىنگەندەردىڭ كوبىنىڭ جاراقاتتارى جەڭىل، كوپشىلىگى جۇيكە جانە تىنىس الۋ ورگاندارىنىڭ اۋرۋلارىنا شاعىمدانعان.
«ءبىزدىڭ قۇتقارۋشىلار دا مەديسينالىق كومەككە جۇگىندى. كوبىنەسە اۋىر فيزيكالىق جۇمىسقا بايلانىستى شاعىن جاراقاتتانۋلار بولدى. بولماشى جارالار، ازداعان قانتالاۋلار جانە ت.ب. جەرگىلىكتى تۇرعىنداردان نەگىزىنەن كۇيزەلىسكە بايلانىستى شاعىمدار بولعان، قاتتى شارشاۋ، سۋىق تيۋ بەلگىلەرى دە بايقالعان»، - دەپ ءتۇسىندىردى ج.قوزىباحوۆ.
تۇركياعا توتەنشە جاعدايلار مينيسترلىگىنەن بارلىعى 10 دارىگەر باردى. گازيانتەپ قالاسىندا 8 مەديسينا قىزمەتكەرى جۇمىس ىستەدى - بۇل فەلدشەر-دارىگەرلەر جانە ەكەۋى نۇرداعى قالاسىندا جۇمىس ىستەدى. ءبىزدىڭ دارىگەرلەردىڭ باستى مىندەتى اپات كەزىندە زارداپ شەككەندەرگە مەديسينالىق كومەك كورسەتۋ، سونىمەن قاتار قۇتقارۋشىلارىمىزعا مەديسينالىق كومەك كورسەتۋ بولدى.
اپاتتار مەديسيناسى ورتالىعىنىڭ باسشىسى اتاپ وتكەندەي، وسى ۋاقىت ىشىندە الماتىلىقتار ۇلكەن تاجىريبە جيناقتادى، قاجەتتىلىك تۋىنداعان جاعدايدا باسقا جەرلەردە جانە ەلدەردە دە قولدانىلاتىن بولادى.
«دارىگەرلىك-فەلدشەرلىك قۇرام تاۋلىك بويى جۇمىس ىستەدى، ءبىز قۇتقارۋشىلاردىڭ جۇمىسىنا قاراي جۇمىس ىستەۋگە تىرىستىق. ولاردىڭ قانداي اۋىر فيزيكالىق، ەموسيونالدىق ەڭبەكپەن اينالىساتىنىن كوردىك. ولاردىڭ جەتكەن جەتىستىكتەرىنە، ادامداردىڭ قۇتقارۋشىلارعا كەلىپ قالاي العىستارىن بىلدىرگەنىنە كۋا بولدىق. بارلىق پراكتيكالىق كەلىسسوزدەر، بارلىق كەزدەسۋلەر ءبىزدىڭ پالاتادا ءوتتى. ءبىز بولعان وقيعانىڭ بارىنە ەرىكسىز كۋا بولدىق. ءتىپتى، ادامدار كەلىپ العىستارىن ءبىلدىرىپ جاتتى. تۇرىك قۇتقارۋشىلارى قالاي جانە نە ىستەۋ كەرەكتىگى جونىندە ءبىزدىڭ قۇتقارۋشىلارمەن كەڭەستى»، - دەدى ول.
الماتىدان تۇركياداعى جويقىن جەر سىلكىنىسى بولعان جەرلەرگە بارلىعى 33 ادام، اپاتتار مەديسيناسى ورتالىعىنان 5 مامان باردى.