تۇنگى تىنىشتىقتى بۇزعاندار جاۋاپكەرشىلىككە تارتىلادى

الماتى اكىمى ەربولات دوسايەۆتىڭ مەدەۋ اۋدانىنىڭ تۇرعىندارىمەن كەزدەسۋىندە لادۋشكين كوشەسى 65 ءۇيدىڭ تۇرعىنى تۇرعىنداردىڭ تىنىشتىعىن بۇزاتىن اۆتوشاباندوزدارعا قاتىستى شارالار قابىلداۋدى سۇرادى، دەپ حابارلايدى Almaty-akshamy.kz.

«كوكتەمنەن باستاپ، تۇنگى ۋاقىتتا دوستىق كوشەسىندە جاستار اراسىندا ناعىز جارىس باستالادى. كولىكتەردىڭ دىبىسى، موتوردىڭ گۇرىلى جانە قاتتى مۋزىكا ۇيىقتاۋعا كەدەرگى كەلتىرەدى. تىنىشتىقتى بۇزۋشىلارمەن كۇرەسۋىڭىزدى سۇرايمىز»، - دەدى تۇرعىن.

الماتى قالاسىنىڭ اكىمى ەربولات دوسايەۆتىڭ جاۋابى:

«ءبىز اۋدان تۇرعىندارىنىڭ شاعىمىن ەسكەردىك. تۇنگى تىنىشتىقتى بۇزعاندارعا جاۋاپكەرشىلىك بار. پوليسيا دەپارتامەنتى وكىلدەرىمەن بىرلەسىپ، دوستىق داڭعىلى، كەرەي-جانىبەك حاندار كوشەسىندە «سەرگەك» بەينەكامەرالارىن ورناتۋدى تاپسىردىم. وندا جىلدامدىق شەكتەۋلى. بەينەباقىلاۋ كامەرالارى بۇل جاعدايعا وڭ اسەر ەتەتىنىنە سەنىمدىمىن»، - دەدى ەربولات دوسايەۆ.

مەدەۋ اۋدانىندا قوعامدىق قاۋىپسىزدىكتى قامتاماسىز ەتۋ ماقساتىندا 2023 جىلى بارلىعى 57 «سەرگەك» اپپاراتتىق-باعدارلامالىق كەشەنى ورناتىلدى. بيىل «سەرگەك» 30 اپپاراتتىق-باعدارلامالىق كەشەنى مەن 750 بەينەمونيتورينگ جۇيەسىنىڭ كامەراسىن ورناتۋ جوسپارلانعان.