«قازگيدرومەت» بولجامىنشا ەلىمىزدىڭ 14 وبلىسىندا جانە استانادا اۋا رايىنا بايلانىستى ءقاۋىپ كۇشەيمەك. سوندىقتان ەلدە داۋىلدى ەسكەرتۋ جاريالاندى، دەپ حابارلايدى Aqshamnews.kz ءتىلشىسى.
سارسەنبى كۇنى ەل اۋماعىندا قىس مىنەز كورسەتپەك. ءبىر وڭىردە اقتۇتەك بوران سوقسا، ەندى ءبىر ايماقتى قالىڭ تۇمان باسادى. قار مەن كوكتايعاق جول قوزعالىسىن قيىنداتىپ، جەلدىڭ ەكپىنى كەي جەردە سەكۋندىنا 28 مەترگە دەيىن جەتۋى مۇمكىن.
سولتۇستىك پەن شىعىس وڭىرلەردە قار ارالاس بوران كۇشەيەدى. پاۆلودار، سولتۇستىك قازاقستان، اقمولا، قاراعاندى وبلىستارىندا بۇرقاسىن سوعىپ، تۇنگى ۋاقىتتا جەل ەكپىنى ايتارلىقتاي ارتادى. كەي ايماقتا قاردىڭ سالدارىنان كورىنۋ قاشىقتىعى تومەندەيدى. بۇل ايماقتاردا اۋا تەمپەراتۋراسى –10–18 گرادۋس شاماسىندا بولادى.
شىعىس قازاقستان مەن اباي وبلىستارىندا دا اۋا رايى كۇردەلى. مۇندا قار جاۋىپ، بۇرقاسىنمەن قاتار كوكتايعاق قالىپتاسادى. تۇندە سوققان قاتتى جەل تۇرعىندارعا قوسىمشا ءقاۋىپ ءتوندىرۋى مۇمكىن. وڭىردە سىناپ باعاناسى – 15–25 گرادۋسقا دەيىن تومەندەيدى.
باتىس وڭىرلەردە جاعداي ءبىرشاما باسقاشا. اتىراۋ، باتىس قازاقستان، ماڭعىستاۋ وبلىستارىندا تۇمان ءتۇسىپ، جولدار تايعاق بولادى. كەي جەردە جەل كۇشەيىپ، كولىك قوزعالىسىنا كەدەرگى كەلتىرۋى ىقتيمال. كۇندىزگى اۋا تەمپەراتۋراسى –3 –8 گرادۋس، تۇندە –10 گرادۋسقا دەيىن سالقىنداۋى ىقتيمال.
وڭتۇستىكتە، اسىرەسە تۇركىستان وبلىسىنىڭ تاۋلى اۋداندارىندا تۇمان كۇتىلەدى. تاۋ اسۋلارىندا جەلدىڭ ەكپىنى ارتىپ، جولعا شىققاندار ءۇشىن ساقتىق قاجەت. وڭىردە اۋا تەمپەراتۋراسى –2 مەن +5 گرادۋس ارالىعىندا ساقتالادى.
ەلوردادا دا قىسقى قولايسىزدىق سەزىلەدى. استانادا ازداپ قار جاۋىپ، جەر باۋىرلاعان بوران سوعىپ، جولدار كوكتايعاققا اينالۋى مۇمكىن. اۋا تەمپەراتۋراسى تۇندە –15–18 گرادۋسقا دەيىن تومەندەيدى.
ماماندار تۇرعىنداردى الىس جولعا شىققاندا مۇقيات بولۋعا، اۋا رايى تۋرالى ەسكەرتۋلەردى ەسكەرىپ، قاۋىپسىزدىك شارالارىن ساقتاۋعا شاقىرادى.