مەملەكەت باسشىسى قاسىم-جومارت توقايەۆ روجدەستۆو مەرەكەسىمەن قۇتتىقتادى. بۇل تۋرالى اقوردانىڭ باسپا ءسوز قىزمەتى مالىمدەدى، دەپ حابارلايدى Aqshamnews.kz ءتىلشىسى.
«قۇرمەتتى وتانداستار! قازاقستاننىڭ بارشا پراۆوسلاۆ حريستياندارىن روجدەستۆو مەرەكەسىمەن قۇتتىقتايمىن! بۇل جارقىن مەيرام ادامداردىڭ جۇرەگىنە سەنىم مەن ءۇمىت ۇيالاتىپ، بارشا ادامزاتقا سۇيىسپەنشىلىكپەن قاراۋعا ۇندەيدى. ادىلدىك، ىزگىلىك، شىنايىلىق، جاۋاپكەرشىلىك، مەيىرىمدىلىك، ۇيلەسىمدىلىك سياقتى ماڭگىلىك رۋحاني قۇندىلىقتار حريستيان ءدىنى مەن باسقا دا الەمدىك ءداستۇرلى دىندەردىڭ ارقاۋى سانالادى»، – دەدى پرەزيدەنت.
ول پراۆوسلاۆ حريستياندارى ەلىمىزدەگى كونفەسسياارالىق كەلىسىمدى نىعايتۋعا، وسكەلەڭ ۇرپاقتى وتانشىلدىق پەن ەڭبەكقورلىققا باۋلۋعا جانە ولاردىڭ بويىنا وتباسى قۇندىلىقتارىن سىڭىرۋگە ەلەۋلى ۇلەس قوسىپ كەلەتىنىن ايتتى.
«بىرلىك، تىلەكتەستىك، ءوزارا قولداۋ قاعيداتتارى – مەملەكەتتىك ساياساتىمىزدىڭ اجىراماس بولىگى، بارلىق جەتىستىكتەرىمىزدىڭ مىزعىماس نەگىزى. جۇرتىمىز بىر-بىرىنە قۇرمەت كورسەتىپ، سەنىم مەن جاناشىرلىق تانىتا وتىرىپ، ادىلدىك جانە وسىپ-وركەندەۋ جولىندا العا قاراي نىق قادام جاساي بەرەدى. پراۆوسلاۆ ازاماتتارعا جانە بارشا حالقىمىزعا شىن جۇرەكتەن زور دەنساۋلىق، تولاعاي تابىس تىلەيمىن! ءار ءۇي قۇت-بەرەكەگە تولسىن!»، – دەلىنگەن قۇتتىقتاۋ ماتىنىندە.