الماتى قالاسىنداعى حيميا-بيولوگيا باعىتىنداعى زياتكەرلىك مەكتەبى «تۋعان ەلگە تاعزىم» جازعى ولكەتانۋ-زەرتتەۋلىك ەكسپەديسياسى بارىسىمەن ىلە الاتاۋ ءوڭىرىنىڭ كورنەكتى نىساندارىنا جورىققا شىقتى.
ءبىر اپتاعا سوزىلاتىن بەرەرى مول ەكسپەديسياعا جولدامانى مەكتەپتىڭ ۇزدىك وقۋشىلارى ۇتىپ الدى، دەپ حابارلايدى Almaty-akshamy.kz.
ون جىلدان استام ۋاقىت جالعاسىپ، داستۇرگە اينالعان «تۋعان ەلگە تاعزىم» ولكەتانۋ جانە عىلىمي-زەرتتەۋ ەكسپەديسياسى – وقۋشىلاردىڭ اكادەميالىق جانە عىلىمي جوبالىق ىس-ارەكەتتەرىن بىرىكتىرۋدى جۇزەگە اسىرۋعا ارنالعان بىرەگەي ەكسپەريمەنتالدى الاڭ. الماتىلىق زياتكەرلەر ەكسپەديسيانىڭ بارىسىندا ءوڭىردىڭ كورنەكتى جەرلەرىن ارالاپ قانا قويماي، عىلىمي جوبالار پورتفوليولارىن قۇندى اقپاراتتارمەن، زەرتتەۋلەرمەن تولىقتىرادى.
تۇرگەن شاتقالىنىڭ ايگىلى ايۋلى سارقىراماسى وقۋشىلاردى جاڭا عىلىمي جوبالارعا شابىتتاندىرىپ، جاڭا يدەيالار تۋىندادى.
«سارقىراماعا بارار جولدىڭ جاعدايىنا قاراپ، “ەكوتۋريزم” تاقىرىبىندا موبيلدىك قوسىمشانى ازىرلەۋ وي كەلدى. ياعني، عىلىمي جوبامىزدىڭ ماقساتى - قازاقستانداعى ەكوتۋريزمدى دامىتۋ جولدارىن قاراستىرۋ بولىپ تابىلادى»، – دەپ اڭگىمەلەدى 9-سىنىپ وقۋشىسى قوسان ارلان.
«ءبىز تۇرگەن شاتقالىندا ورنالاسقان ايۋلى سارقىراماعا باردىق. كورگەنىمىز بويىنشا، جول وتە جامان، ۇزاق ءارى قيىن. وكىنىشكە وراي وسىنداي جولدار ارقىلى قوزعالۋ جاسى ۇلكەن نە مۇمكىندىكتەرى شەكتەۋلى جاندارعا قيىندىق تۋىنداتادى. ءبىزدىڭ توپ وسى تۋرالى ويلانىپ، ونلاين-ەكسكۋرسيالاردى جاساۋ شەشىمگە كەلدى. وسى ارقىلى ادام VR-كوزىلدىرىكتەر كيىپ، ءوزىن سول جەردەگىدەي سەزىنە الادى. بۇل عالامتوردان سۋرەتتەردى قاراعاننان الدە قايدا قىزىعىراق. جوبامىز شەكتەۋلەرى بار ادامدارعا كومەكتەسىپ، ءتۋريزمدى ارتتىرادى»،- دەپ ءبولىستى 9-سىنىپ وقۋشىسى بازارباي ارسلان.
«جوبامىزدى ىسكە اسىرۋ ءۇشىن، كەرەكتى جەرگە بارىپ، بارلىق ايماقتى 360⁰ جاساپ ءتۇسىرۋ، جانە ونى ارنايى باعدارلاماعا سالىپ VR-كوزىلدىرىكتەر ءۇشىن قولدانىسقا جارامدى سۋرەتتەردى شىعارىپ، ونلاين ەكسكۋرسياعا دايارلاۋ كەرەك. ونى ءارى قاراي دامىتۋ ءۇشىن، سايت جاساۋدى كوزدەپ وتىرمىز»،- دەپ تولىقتىردى زياتكەر.
جىلدا نازاربايەۆ زياتكەرلىك مەكتەپتەرىندە جازدىق جورىققا شىعاتىن ەكسپەديسيانىڭ ىزىمەن وقۋشىلار شامامەن جيىرماعا جۋىق جاڭا جوبالاردى باستاپ، زەرتتەۋ جۇرگىزىپ، سول جۇمىستارىمەن رەسپۋبليكالىق دەڭگەيدە ءتۇرلى عىلىمي جوبالار بايقاۋىنا قاتىسىپ الەۋمەتتىك، تەحنيكا، يننوۆاسيا سالاسىندا جاڭالىقتار اشۋدا.
