قىس مەزگىلىندە كوكتايعاق سالدارىنان تايىپ قۇلاپ، جاراقات الاتىندار كوبەيەدى. سوندىقتان قاراپايىم ساقتىق ەرەجەلەرىن ساقتاۋ – ءوز قاۋىپسىزدىگىڭىزدى قورعاۋدىڭ ەڭ ءتيىمدى جولى. №7 قالالىق اۋرۋحاناسىنىڭ تراۆماتولوگ دارىگەرى جاسۇلان ارعىنبايەۆ كوكتايعاق كەزىندە نازار اۋداراتىن نەگىزگى كەڭەستەردى ءبولىستى، - دەپ حابارلايدى aqshamnews.kz ءتىلشىسى.
№7 قالالىق اۋرۋحاناسىنىڭ تراۆماتولوگ دارىگەرى جاسۇلان ارعىنبايەۆ
دۇرىس اياقكيىم – قاۋىپسىزدىكتىڭ باستى شارتى
مامان ەڭ الدىمەن ىڭعايلى، تابانى تايمايتىن اياق كيىم تاڭداۋدى ۇسىنادى. تابانى كەدىر-بۇدىر، جۇمساق رەزەڭكەلى اياق كيىم سىرعاناۋ ءقاۋپىن ازايتادى.
قالاي ءجۇرۋ كەرەك؟
كوكتايعاقتا ءجۇرۋ تەحنيكاسى دا ماڭىزدى:
- اسىقپاي ءجۇرىڭىز؛
- تاباندى تولىق باسىڭىز، اياقتىڭ ۇشىمەن جۇرۋدەن ساقتانىڭىز؛
- ەكى قولدى بوس ۇستاڭىز (قولدى قالتاعا سالماڭىز)؛
- دەنەڭىزدى ءسال العا ەڭكەيتىپ ءجۇرىڭىز – تەپە-تەڭدىك ساقتاۋعا كومەكتەسەدى.
تايىپ قۇلاپ بارا جاتساڭىز نە ىستەگەن دۇرىس؟
دارىگەردىڭ ايتۋىنشا، قۇلاپ بارا جاتقاندا جاراقاتتى جەڭىلدەتۋدىڭ دە ءتاسىلى بار.
"تايىپ قۇلاعان جاعدايدا جاراقات اۋىر بولماۋى ءۇشىن ءبىر جاق جانىڭىزبەن قۇلاۋعا تىرىسىڭىز. ەڭ باستىسى – سابىر ساقتاپ، بىردەن اتىپ تۇرىپ كەتپەۋ كەرەك"، – دەيدى تراۆماتولوگ جاسۇلان ارعىنبايەۆ.
قۇلاعاننان كەيىن:
- الدىمەن قول-اياق بۋىندارىڭىزدى قيمىلداتىپ، قاتتى اۋىرسىنۋ جوق-جوعىن تەكسەرىڭىز
- ءبارى دۇرىس ەكەنىنە كوز جەتكىزگەننەن كەيىن عانا جايلاپ تۇرىڭىز؛
- سىنۋ بەلگىلەرى (قاتتى اۋىرسىنۋ، ءىسىنۋ، قوزعالتقاندا كۇشەيۋ، اياق-قولدىڭ قالىپتان تىس قيسايۋى) بايقالسا، دەرەۋ 103 نومىرىنە حابارلاسىڭىز.