قاراعاندى قالاسىندا 16 جەلتوقساندا سەرىك ساپييەۆ اتىنداعى بوكس ورتالىعىندا قازاقستاننىڭ ەڭبەك سىڭىرگەن جاتتىقتىرۋشىسى، بەلگىلى سپورت قايراتكەرى عالىم جارىلعاپوۆتى ەسكە الۋعا ارنالعان 41ء-شى حالىقارالىق تۋرنير ءوز جالاۋىن كوتەردى.
ءدۇبىرلى دوداعا قازاقستان، تاجىكستان، وزبەكستان جانە جۇڭگو ەلدەرىنەن كەلگەن 216 ۇزدىك بوكسشى قاتىسۋدا. كورەرمەندەر ءۇشىن كىرۋ تەگىن بولعان جارىستىڭ اشىلۋ سالتاناتىندا سپورت سۇيەر قاۋىمعا تانىمال سپورتشىلار مەن بەلگىلى تۇلعالار قۇرمەتتى قوناق رەتىندە قاتىسىپ، ەرەكشە كوڭىل كۇي سىيلادى.
العاش بولىپ جارىسقا قاتىسۋشىلاردى وليمپيادا چەمپيونى، قاراعاندى وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى سەرىك ساپييەۆ قۇتتىقتادى. ايتا كەتۋ كەرەك، ول ءوز ۋاقىتىندا وسى تۋرنيردە ءوزى دە بوكستاسقان. سونداي-اق جارىلعاپوۆتار اۋلەتىنىڭ جاقىن دوسى، وليمپيادا ويىندارىنىڭ جۇلدەگەرى، كسرو-نىڭ 1972 جىلعى ۇزدىك فۋتبولشىسى ەۆگەنيي لوۆچيەۆ ءسوز سويلەدى.
"ادامنان كەيىن تەك ەستەلىك قالادى. بۇل تۋرنير 41ء-شى رەت جوعارى دەڭگەيدە ۇيىمداستىرىلىپ وتىر. بۇل - عالىم جارىلعاپوۆقا دەگەن تەرەڭ قۇرمەتتىڭ، ونىڭ ەسىمىنىڭ ەل جادىندا ماڭگى ساقتالعانىنىڭ دالەلى"، - دەدى ول.
تۋرنير ءتورت كۇنگە سوزىلادى، ال فينالدىق جەكپە-جەكتەر 20 جەلتوقساندا وتەدى. بوكس جانكۇيەرلەرى بۇل جارىستان ەرەكشە اسەر الىپ، جاعىمدى ەموسياعا بولەنەدى دەپ سەنەمىز.