ءمامس جۇيەسىندەگى وزگەرىستەردى تۇسىندىرۋگە باعىتتالعان جۇيەلى جۇمىس اياسىندا وقىتۋ شارالارىنىڭ ءبىرى №36 قالالىق ەمحانادا ءوتتى. ءىس-شارا بارىسىندا ءمامس جۇيەسىندەگى وزگەرىستەردىڭ تاجىريبەلىك اسپەكتىلەرىنە، سونداي-اق مەديسينا قىزمەتكەرلەرىنىڭ پاسيەنتتەرمەن ءوزارا ءىس-قيمىلىنا ەرەكشە نازار اۋدارىلدى.
وقىتۋدى ەمحانا ديرەكتورى گۇلجاينات تىلەگەن وتكىزدى. نەگىزگى باسىمدىق مەديسينالىق كومەكتى قارجىلاندىرۋدىڭ جاڭا قاعيدالارىن تۇسىندىرۋگە جانە مەديسينا قىزمەتكەرلەرىنىڭ پاسيەنتتەردى اقپاراتتاندىرۋداعى رولىنە بەرىلدى.
وسىنداي ءتۇسىندىرۋ كەزدەسۋلەرى قالانىڭ بارلىق مەديسينالىق ۇيىمىندا ۇيىمداستىرىلىپ جاتىر.
اتالعان شارانىڭ ماقساتى - ءمامس جۇيەسىندەگى وزگەرىستى ءبىرىڭعاي ءتۇسىنۋدى قامتاماسىز ەتۋ جانە مەديسينا قىزمەتكەرلەرىنىڭ جاڭا جاعدايدا پاسيەنتتەرمەن جۇمىس ىستەۋگە دايىندىعىن ارتتىرۋ. بۇل ءاربىر قالا تۇرعىنىنىڭ قاجەتتى مەديسينالىق كومەكتى ۋاقتىلى ءارى تولىق كولەمدە الۋىنا مۇمكىندىك بەرەدى.
2026 جىلعى قاڭتاردىڭ 1-ىنەن باستاپ ءمامس جۇيەسىندە ماڭىزدى وزگەرىستەر ەنگىزىلەدى: سوزىلمالى اۋرۋدىڭ ءبىر بولىگى ساقتاندىرۋ پاكەتىنە اۋىستىرىلادى. بۇل شەشىم حالىقتىڭ ەمدەلۋگە قولجەتىمدىگىن كەڭەيتۋگە باعىتتالعان.
ءمامس پاكەتىنە الەۋمەتتىك ماڭىزى بار اۋرۋ - قانت ديابەتى، بالالاردىڭ سەرەبرالدى سال اۋرۋى، دانەكەر ءتىننىڭ جۇيەلى زاقىمدانۋى جانە ريەۆماتيزم ەنگىزىلەدى. بۇل پاسيەنت ءۇشىن ساقتاندىرىلعان مارتەبەسى بولعان جاعدايدا مەديسينالىق كومەكتى، كونسۋلتاسيانى جانە دارىلىك قامتاماسىز ەتۋدى تەگىن الۋ ساقتالاتىنىن بىلدىرەدى.
سونىمەن قاتار تەگىن مەديسينالىق كومەكتىڭ كەپىلدەندىرىلگەن كولەمى (تمككك) شەڭبەرىندە ۇزاق ءارى قىمبات ەمدەۋدى قاجەت ەتەتىن ەڭ اۋىر 11 اۋرۋ قالادى. ولاردىڭ قاتارىندا تۋبەركۋلەز، ايتۆ-ينفەكسياسى، قاتەرلى ىسىك اۋرۋى، سوزىلمالى ۆيرۋستىق گەپاتيتتەر مەن باۋىر سيرروزى، پسيحيكالىق جانە مىنەز-قۇلىقتىق بۇزىلىس، ورفاندىق اۋرۋ، ورتالىق جۇيكە جۇيەسىنىڭ دەگەنەراتيۆتى جانە دەميەلينيزاسيالىق اۋرۋى، ەپيلەپسيا، سونداي-اق جەدەل جاعداي - ميوكارد ينفاركتى (العاشقى التى اي) جانە ينسۋلت (ءبىر جىل ىشىندە) بار. بۇل اۋرۋ بۇرىنعىداي پاسيەنتتىڭ ساقتاندىرىلۋ مارتەبەسىنە قاراماستان تولىق كولەمدە مەملەكەت ەسەبىنەن قارجىلاندىرىلادى.
2026 جىلعى قاڭتاردان باستاپ مەديسينالىق كومەكتىڭ ءبىرىڭعاي پاكەتىنە كەزەڭ-كەزەڭىمەن كوشۋ باستالادى. ول:
- تمككك مەن ءمامس اراسىنداعى ناقتى شەكارانى ايقىنداۋدى جانە قىزمەتتەردىڭ قايتالانۋىن بولدىرماۋدى؛
- اۋرۋدىڭ ەرتە الدىن الۋعا قولجەتىمدىكتى؛
- مامس-تەگى مارتەبەسىنە قاراماستان بارلىق ازامات ءۇشىن ونكولوگيالىق اۋرۋدى انىقتاۋعا ارنالعان سكرينينگتەن ءوتۋدى؛
- الەۋمەتتىك ماڭىزى بار اۋرۋعا كۇدىك تۋىنداعان جاعدايدا تەگىن تەكسەرۋدى؛
- رەسۋرستى قايتا ءبولۋ ارقىلى جۇيەنىڭ قارجىلىق تۇراقتىلىعىن قامتاماسىز ەتۋدى كوزدەيدى.
وقىتۋ بارىسىندا الەۋمەتتىك قورعاۋ ماسەلەسىنە دە ەرەكشە نازار اۋدارىلدى. ون بەس جەڭىلدىكتى ساناتقا جاتاتىن ازامات، سونىڭ ىشىندە بالالار، مۇگەدەكتىگى بار ادامدار، زەينەتكەرلەر، جۇمىسسىزدار جانە وزگە دە سانات وكىلدەرى بارلىق قاجەتتى مەديسينالىق كومەكتى تەگىن الا بەرەدى.
2026 جىلعى قاڭتاردىڭ 1-ىنەن باستاپ ومىرلىك قيىن جاعدايعا تاپ بولعان ازاماتتارعا قوسىمشا قولداۋ كورسەتىلەدى. الەۋمەتتىك ءال-اۋقاتىنىڭ داعدارىستىق نەمەسە شۇعىل دەڭگەيىنە جاتاتىن د جانە ە ساناتىنداعى، تابىسى نەمەسە زەينەتاقى جارناسى جوق ادامدار ءۇشىن ءمامس جۇيەسىندەگى جارنا جەرگىلىكتى اتقارۋشى ورگانداردىڭ قاراجاتى ەسەبىنەن تولەنەدى. بۇل ولاردىڭ جۇمىس ىستەمەگەن جانە جارنا اۋدارماعان جاعدايدىڭ وزىندە مەديسينالىق كومەككە قولجەتىمدىگى ساقتالاتىنىن بىلدىرەدى.