توقايەۆ پارلامەنتتىك رەفورما جونىندەگى جۇمىس توبىنىڭ وتىرىسىن وتكىزدى
مەملەكەت باسشىسى جۇمىس توبىمەن بىرگە كونستيتۋسيالىق رەفورماعا قاتىستى نەگىزگى تاسىلدەردى تالقىلادى، - دەپ حابارلايدى aqshamnews.kz
استانادا پرەزيدەنت قاسىم-جومارت توقايەۆتىڭ قاتىسۋىمەن پارلامەنتتىك رەفورما جونىندەگى جۇمىس توبىنىڭ وتىرىسى ءوتتى.
جيىندا مەملەكەتتىك كەڭەسشى ەرلان قارين پرەزيدەنتكە جۇمىس توبىنىڭ اتقارعان قىزمەتى تۋرالى بايانداپ، پارلامەنتتى ترانسفورماسيالاۋعا قاتىستى ۇسىنىلىپ وتىرعان كونستيتۋسيالىق وزگەرىستەردىڭ كولەمى اۋقىمدى ەكەنىنە نازار اۋداردى.
مەملەكەتتىك كەڭەسشى جۇمىس توبى مۇشەلەرىنىڭ ورتاق پىكىرىن جەتكىزىپ، بۇل وزگەرىستەر ساياسي جۇيەنى ۋاقىت تالابىنا ساي جاڭعىرتۋعا ىقپال ەتەتىنىن ايتتى.
پرەزيدەنتتىڭ قۇقىقتىق ماسەلەلەر جونىندەگى كومەكشىسى ەرجان جيەنبايەۆ ازاماتتاردان كەلىپ تۇسكەن ۇسىنىستار نەگىزىندە كونستيتۋسيالىق رەفورما جونىندەگى جۇمىس توبى مۇشەلەرى ازىرلەگەن باستى تاسىلدەر تۋرالى باياندادى.
اتاپ ايتقاندا، بىلتىرعى قازان ايىنان بەرى ءوتىپ كەلە جاتقان وتىرىستاردا جاڭا پارلامەنتكە قاتىستى ماسەلەلەردىڭ ءبارى قارالدى. ونىڭ ىشىندە دەپۋتاتتار سانى، وكىلەتتىك مەرزىمدەرى، سايلاۋ ءتارتىبى، ءبىر پالاتالى پارلامەنتتىڭ زاڭ شىعارۋ تەتىكتەرى، سونداي-اق ونىڭ بيلىكتىڭ وزگە ينستيتۋتتارىمەن ءوزارا ءىس-قيمىل ماسەلەلەرى قامتىلدى.
پارلامەنتاريزم ينستيتۋتىنىڭ ديرەكتورى ناتاليا پان ازاماتتاردان، ساراپشىلاردان، قوعامدىق بىرلەستىكتەردەن e-Otinish جانە eGov پلاتفورمالارى ارقىلى كەلىپ تۇسكەن ۇسىنىستار تۋرالى اقپارات بەردى
بىرنەشە اي ىشىندە ساياسي پارتيالاردىڭ بارلىعى، ونداعان ۇكىمەتتىك ەمەس ۇيىم، بيزنەس-قوعامداستىق وكىلدەرى، قۇقىقتانۋشى عالىمدار مەن ساراپشىلار كونستيتۋسيالىق رەفورماعا قاتىستى ءوز باستامالارىن جولداعان.
پارلامەنتتىك رەفورمادان بولەك، جۇمىس توبىنا ازاماتتاردان مەملەكەتتىك قۇرىلىمنىڭ جالپى ماسەلەلەرى مەن ساياسي جانە قوعامدىق ينستيتۋتتاردى جەتىلدىرۋگە قاتىستى 1،6 مىڭعا جۋىق ۇسىنىس كەلىپ ءتۇستى.
پارلامەنت ماجىلىسىندەگى «Amanat» پارتياسى فراكسياسىنىڭ جەتەكشىسى ەلنۇر بەيسەنبايەۆ جانە «اق جول» پارتياسىنىڭ كوشباسشىسى ازات پەرۋاشيەۆ، «جالپىۇلتتىق سوسيال-دەموكراتيالىق پارتيا» فراكسياسىنىڭ باسشىسى اسحات راحىمجانوۆ پارلامەنتتىك رەفورما اياسىندا جۇزەگە اسىرىلاتىن كونستيتۋسيالىق وزگەرىستەردىڭ اۋقىمدى ەكەنىن مالىمدەدى.
ولار وڭىرلەردە پارلامەنت دەپۋتاتتارىنىڭ جۇمىس كەزدەسۋلەرى بارىسىندا ازاماتتاردىڭ الداعى ساياسي رەفورماعا ايرىقشا قىزىعۋشىلىق تانىتىپ وتىرعانىن جەتكىزدى.
سونداي-اق جيىندا پارلامەنت سەناتىنىڭ كونستيتۋسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ ءتوراعاسى نۇرلان بەكنازاروۆ، پارلامەنت ءماجىلىسىنىڭ دەپۋتاتتارى ءۇنزيلا شاپاق، مارات ءباشىموۆ، نيكيتا شاتالوۆ، ساياساتتانۋشى ءبورىحان نۇرمۇحامەدوۆ پىكىرلەرىن ءبىلدىردى.
وتىرىستى قورىتىندىلاعان مەملەكەت باسشىسى الداعى كونستيتۋسيالىق رەفورمانى تالقىلاۋ باستالعالى بەرى جارتى جىلعا جۋىق ۋاقىت وتكەنىن ەسكە سالدى
وسى كەزەڭ ىشىندە قوعامدا ەلدىڭ جوعارى زاڭ شىعارۋشى ورگانىن ترانسفورماسيالاۋدىڭ ماقساتتارى مەن مىندەتتەرىنە قاتىستى دۇرىس تۇسىنىك قالىپتاستى.
قاسىم-جومارت توقايەۆ قىركۇيەك ايىنداعى حالىققا ارناعان جولداۋىنان كەيىن وربىگەن قوعامدىق پىكىرتالاستاردى مۇقيات قاداعالاپ وتىرعانىن جەتكىزدى.
مەملەكەت باسشىسى تالقىلاۋ ناتيجەسىن، ساراپتاما قورىتىندىلارىن، ۇسىنىلعان تۇزەتۋلەردىڭ جوبالارىن، سونداي-اق كونستيتۋسيالىق رەفورماعا قاتىستى ازاماتتاردان كەلىپ تۇسكەن ۇسىنىستاردى ەگجەي-تەگجەيلى زەردەلەۋدە.
ساياسي جۇيەنى ودان ءارى رەفورمالاۋدىڭ ماڭىزى مەن مازمۇنىنا توقتالعان پرەزيدەنت ينستيتۋسيونالدىق نەگىزدى تەرەڭ جاڭعىرتۋ جانە زاڭ شىعارۋشى بيلىك تارماعىن جۇيەلى تۇردە قايتا فورماتتاۋ قاجەت ەكەنىن ايتتى
"ەرتەڭ ۇلتتىق قۇرىلتاي وتىرىسىندا مەن ەلىمىزدىڭ تاعدىرىنا قاتىستى بۇل ماسەلە بويىنشا ناقتى پىكىرلەرىمدى ايتامىن. ناقتىلاي ايتقاندا، ەلىمىزدىڭ ساپالىق تۇرعىدان مۇلدەم جاڭا ساياسي تۇرپاتى قالىپتاسىپ جاتىر. پارلامەنتتىك رەفورمانى جۇزەگە اسىرۋ ءۇشىن كونستيتۋسيانىڭ بىردەن بىرنەشە ءبولىمىن قايتا قاراۋ قاجەت بولادى. سوندىقتان اتا زاڭىمىزعا وسىعان دەيىن ەنگىزىلگەن وزگەرتۋلەردى ەسكەرسەك، جۇمىس توبى ۇسىنىپ وتىرعان تۇزەتۋلەر جوباسى قازاقستاننىڭ شىن مانىندە جاڭا كونستيتۋسياسى تۋرالى ايتۋعا مۇمكىندىك بەرەدى"، – دەدى مەملەكەت باسشىسى.