ۇلتتىق قۇرىلتايدىڭ ءتورت وتىرىسىندا كوتەرىلگەن ۇسىنىستاردىڭ ەڭ ولشەنەتىن ناتيجەسى – زاڭنامالىق وزگەرىستەر. ۇلىتاۋ، تۇركىستان، اتىراۋ جانە بۋرابايداعى جيىنداردان كەيىن قوعام سۇرانىسى بىرتىندەپ قۇقىقتىق نورماعا اينالىپ، بارلىعى 26 زاڭ قابىلداندى، - دەپ حابارليدى aqshamnews.kz ءتىلشىسى.
ۇلىتاۋدا وتكەن I قۇرىلتايدىڭ باستى زاڭنامالىق شەشىمى – 25 قازانعا رەسپۋبليكا كۇنى رەتىندە ۇلتتىق مەرەكە مارتەبەسىن بەرۋ بولدى.
تۇركىستانداعى II قۇرىلتاي ناتيجەسىندە:
1. "تۇركىستان قالاسىنىڭ ەرەكشە مارتەبەسى تۋرالى" زاڭ؛
2. "قازاقستاننىڭ حالىق جازۋشىسى" اتاعىن قايتارۋ؛
3. "كينەماتوگرافيا تۋرالى" زاڭعا تۇزەتۋلەر؛
4. ونوماستيكا جۇمىسىن جۇيەلەۋ تۋرالى؛
5. ۆەيپتەرگە، شەگۋگە كەلمەيتىن تەمەكى ونىمدەرىنە تىيىم سالۋ تۋرالى تۇزەتۋلەر؛
6. قۇمار ويىن بيزنەسى، لوتەرەيالار جانە لوتەرەيا قىزمەتى ماسەلەلەرى تۋرالى؛
7. جۇمىسشى ماماندىقتار ءۇشىن جاڭادان 9 قۇرمەتتى اتاق ەنگىزۋ؛
8. ماسس-مەديا ماسەلەلەرى تۋرالى زاڭناماعا تۇزەتۋلەر؛
9. "ونلاين-پلاتفورمالار جانە ونلاين-جارناما تۋرالى" زاڭ؛
10. مەملەكەتتىك ناگرادالارعا ۇقساس قوعامدىق ناگرادالاردى دايىنداۋعا جانە ماراپاتتاۋعا تىيىم سالاتىن زاڭ؛
11. عىلىم جانە ءبىلىم بەرۋ ماسەلەلەرى تۋرالى زاڭناماعا تۇزەتۋلەر (پەداگوگتەرگە قوسىمشا تولەمدەر تۋرالى) قاراستىرىلدى.
اتىراۋدا وتكەن III قۇرىلتايدىڭ زاڭنامالىق ناتيجەلەرى قاۋىپسىزدىك، ءتارتىپ جانە قۇندىلىقتار تاقىرىبىن كۇشەيتتى: "ايبىن" وردەنىنە اڭىزعا اينالعان قاھارماندار – ساعادات نۇرماعامبەتوۆ، باۋىرجان مومىش ۇلى، راحىمجان قوشقاربايەۆ ەسىمدەرىن بەرۋ تۋرالى تۇزەتۋلەر قابىلداندى. قوعامدىق كەڭىستىكتى قورعاۋ ءۇشىن ۆانداليزمگە قارسى كۇرەس جانە تابيعي نىسانداردى قورعاۋ جونىندەگى تۇزەتۋلەر ەنگىزىلدى.
1. ليسەنزيالاۋدى رەتكە كەلتىرۋ جانە زاڭسىز ارحەولوگيالىق قازبالارعا قاتىستى جاۋاپكەرشىلىكتى كۇشەيتۋ تۋرالى تۇزەتۋلەر؛
2. ەسىرتكى تاسىمالداۋشىلار مەن ەسىرتكى وندىرۋشىلەردىڭ جاۋاپكەرشىلىگىن سارالاۋ تۋرالى تۇزەتۋلەر؛
3. ايەلدەردىڭ قۇقىقتارىن قامتاماسىز ەتۋ جانە بالالار قاۋىپسىزدىگى ماسەلەلەرى تۋرالى تۇزەتۋلەر (تۇرمىستىق زورلىق-زومبىلىققا قاتىستى قىلمىستىق جاۋاپكەرشىلىككە تارتۋ، بالالارعا قاتىستى زورلىقتىڭ بارلىق تۇرىنە جازانى قاتاڭداتۋ جانە ت.ب.)؛
4. وڭىرلىك رامىزدەردىڭ ءبىرىڭعاي ستاندارتى تۋرالى تۇزەتۋلەر؛
5. "مەملەكەتتىك جاستار ساياساتى تۋرالى" زاڭعا تۇزەتۋلەر؛
6. كرەاتيۆتى يندۋستريانى قولداۋعا باعىتتالعان زاڭنامالىق شارالار پاكەتى.
بۋرابايداعى IV قۇرىلتاي قورىتىندىسى قوعامدىق ءتارتىپ پەن اقپاراتتىق كەڭىستىكتەگى جاۋاپكەرشىلىكتى كۇشەيتۋگە باعىتتالدى: قوعامدىق ورىنداردا بەت-بەينەنى تانۋعا كەدەرگى كەلتىرەتىن كيىم كيۋگە قاتىستى اكىمشىلىك جاۋاپكەرشىلىك ەنگىزۋ، سونداي-اق قۇقىققا قايشى كونتەنتتى، ونىڭ ىشىندە ۇلتارالىق جانە ءدىني ارازدىقتى قوزدىرۋعا باعىتتالعان ماتەريالداردى تاراتقانى ءۇشىن اكىمشىلىك جاۋاپكەرشىلىك ەنگىزۋ بويىنشا شەشىم قابىلداندى. سونىمەن قاتار لگبت مەن پەدوفيليانى ناسيحاتتاۋعا قاتىستى جاۋاپكەرشىلىك ەنگىزۋ باستاماسى دا وسى پاكەتكە كىردى. بالالار قۇقىعىن قورعاۋ باعىتىندا ايەلدەردىڭ قۇقىقتارىن قامتاماسىز ەتۋ جانە بالالار قاۋىپسىزدىگى جونىندەگى تۇزەتۋلەردىڭ كەلەسى توپتاماسى قابىلدانىپ، قامقورشىلىق ورگاندارىن كۇشەيتۋ جانە بالالاردىڭ قۇقىقتارىن قورعاۋدى نىعايتاتىن قوسىمشا شارالار قاراستىرىلدى. ونوماستيكا باعىتى قايتادان جالعاسىپ، ونوماستيكا سالاسىنداعى جۇمىستى رەتكە كەلتىرۋ قابىلداندى. عىلىم مەن وڭىرلىك ىنتىماقتاستىق تۇرعىسىنان قازاقستانداعى ورتالىق ازيا وڭىرلىك گلياسيولوگيالىق ورتالىعىنىڭ مارتەبەسىن قايتا جانداندىرۋ تۋرالى شەشىم زاڭنامالىق دەڭگەيدە بەكىتىلدى.