پرەزيدەنت ينفلياسيانى تومەندەتۋ، ەكونوميكالىق ءوسىمدى تۇراقتاندىرۋ جانە ازاماتتاردىڭ ناقتى تابىسىن ارتتىرۋ ماسەلەلەرىن ۇكىمەتتىڭ باستى مىندەتتەرى رەتىندە اتاپ ءوتتى، - دەپ حابارلايدى اqshamnews.kz ءتىلشىسى.
"ۇكىمەت جۇرگىزىپ وتىرعان ەكونوميكالىق ساياسات اياسىندا ينفلياسيانى تۇراقتاندىرۋ جانە تومەندەتۋ، ەكونوميكانىڭ ورنىقتى ءوسىمىن قامتاماسىز ەتۋ، سونداي-اق ازاماتتاردىڭ ناقتى تابىس تابۋىنا جاعداي جاساۋ وتە وزەكتى مىندەت سانالادى. وسى باعىتتا تاياۋدا ۇكىمەت، ۇلتتىق بانك پەن قارجى نارىعىن رەتتەۋ جانە دامىتۋ اگەنتتىگى 2026-2028 جىلدارعا ارنالعان بىرلەسكەن ءىس-قيمىل باعدارلاماسىن قابىلدادى. مەن بۇل جايىندا اۋىل اكىمدەرىنىڭ ديالوگ-پلاتفورماسىندا ايتقان ەدىم. اتالعان باعدارلامانى ءتيىمدى جۇزەگە اسىرۋ ءۇشىن بارلىق سالالىق ورگاندار مەن اكىمدىكتەر جۇمىلا جۇمىس ىستەۋى قاجەت ەكەنىن تاعى دا اتاپ وتكىم كەلەدى"، – دەدى پرەزيدەنت.
مەملەكەت باسشىسىنىڭ ايتۋىنشا، كاسىپكەرلەر ءۇشىن سالىق، تاريف جانە رەتتەۋ ساياساتىنىڭ ايقىن ءارى ادىلەتتى بولعانى ەرەكشە ماڭىزدى.
“جاڭا سالىق كودەكسى مەملەكەت پەن بيزنەس اراسىنداعى ىنتىماقتاستىق مودەلىن جاڭعىرتادى. كاسىپكەرلىكتىڭ ورنىقتى دامۋى ءوزارا مىندەتتەردى ورىنداۋعا نەگىزدەلەتىنىن تۇسىنگەنىمىز ءجون. وسى ورايدا مەملەكەت قولايلى ىسكەرلىك ورتا قالىپتاستىرادى. ال بيزنەس سالىقتان جالتارمايدى. بۇل دامىعان، وركەنيەتتى ەلدەردىڭ بارلىعىنا ءتان"، – دەدى توقايەۆ.
سونىمەن قاتار مەملەكەت باسشىسى ۇكىمەتكە كاسىپكەرلەردىڭ جاڭا سالىق كودەكسىنىڭ كەيبىر نورمالارىن ىسكە اسىرۋ ماسەلەسىنە قاتىستى وتىنىشتەرىن مۇقيات سارالاۋدى تاپسىردى.
"سوعان قاراماستان ماعان بيزنەس تاراپىنان جاڭا سالىق كودەكسىنىڭ كەيبىر نورمالارىن ىسكە اسىرۋ ماسەلەسىنە قاتىستى وتىنىشتەر ءتۇسىپ جاتىر. وتىنىشتەردىڭ مازمۇنى بارشاعا ءمالىم، ولار بۇقارالىق اقپارات قۇرالدارىندا جاريالانۋدا. ۇكىمەت ولاردى مۇقيات سارالاپ، اقىلعا قونىمدى شەشىم تابادى دەپ ويلايمىن. انىعىن ايتقاندا، باسقا جول جوق. بۇل – مەملەكەتتىك اۋقىمداعى مىندەت. سالىقتىق اكىمشىلەندىرۋدى جەتىلدىرۋگە باسا ءمان بەرۋ قاجەت. اتالعان ماسەلەنى سيفرلىق قۇرالدار ارقىلى شەشۋ كاسىپكەرلەردى الاڭداتىپ وتىرعان كوپتەگەن تۇيتكىلدىڭ ءتۇيىنىن تارقاتۋعا مۇمكىندىك بەرەدى"، – دەدى پرەزيدەنت.
توقايەۆ كەلەسى جىلى قازاقستاندىق تاۋار وندىرۋشىلەر رەەسترى مەن تاۋارلاردىڭ ۇلتتىق كاتالوگى ەنگىزىلەتىنىن دە ەسكەرتتى.
“جاڭادان ىسكە قوسىلاتىن بۇل تەتىكتەر كەيبىر كاسىپورىنداردىڭ مەملەكەتتىك ساتىپ الۋ بايقاۋلارىندا نەگىزسىز ارتىقشىلىققا يە بولۋ ماسەلەسىن رەتتەۋگە ىقپال ەتۋى كەرەك. ۇكىمەت "اتامەكەن" پالاتاسىمەن بىرگە وسى جىلدىڭ سوڭىنا دەيىن بيزنەس-قوعامداستىققا زيانى تيمەيتىن جاڭا نورمالار ەنگىزۋدى قامتاماسىز ەتكەنى ءجون"، – دەدى پرەزيدەنت.