جاپونيانىڭ ناگويا قالاسىندا مانەرلەپ سىرعاناۋدان جىلدىڭ باستى جارىستارىنىڭ ءبىرى – گران-پري فينالى ءوتىپ جاتىر. بۇل دودادا ماۋسىمنىڭ ەڭ ۇزدىك التى سپورتشىسى جينالىپ، جىلدىڭ چەمپيونىن انىقتايدى، دەپ حابارلايدى اqshamnews.kz ءتىلشىسى.
فينالعا قازاقستان اتىنان ەلدىڭ ۇزدىك مانەرلەپ سىرعاناۋشىسى ميحايل شايدوروۆ قاتىسىپ جاتىر. ول ءوزىنىڭ سپورتتىق مانسابىندا ەكىنشى رەت گران-پري فينالىنا جولداما العان.
وتانداسىمىز مۇزعا يتاليا سپورتشىسى دانيەل گراسسلدەن كەيىن شىققان. الايدا قىسقا باعدارلامانى ورىنداۋ كەزىندە شايدوروۆ ساتسىزدىككە ۇشىراپ، ءبىر رەت قۇلاپ ءتۇستى. بۇدان بولەك تاعى ءبىر كۇردەلى ەلەمەنت بارىسىندا ورەسكەل قاتەلىك جىبەرگەن. وسى ولقىلىقتار ونىڭ جۇلدەگە تالاسۋ مۇمكىندىگىن تومەندەتتى.
قىسقا باعدارلامانىڭ ناتيجەلەرى (ەرلەر):
-
يۋما كاگياما (جاپونيا) – 108،77
-
شۋن ساتو (جاپونيا) – 98،06
-
يليا مالينين (اقش) – 94،05
-
دانيەل گراسسل (يتاليا) – 94،00
-
ادام سياو حيم فا (فرانسيا) – 78،49
-
ميحايل شايدوروۆ (قازاقستان) – 71،30
ايتا كەتەيىك، ميحايل شايدوروۆ – الەم چەمپيوناتىنىڭ كۇمىس جۇلدەگەرى. 2025 جىلعى ازيا ويىندارىندا قولا مەدال جەڭىپ العان، سونداي-اق ءتورت قۇرلىق چەمپيوناتىندا التىن مەدال يەلەنىپ، اراعا 10 جىل سالىپ دەنيس تەننىڭ تاريحي جەتىستىگىن قايتالاعان ەدى.
سپورتشىلاردىڭ ەركىن باعدارلاماسى 6 جەلتوقساندا وتەدى.