الماتى الداعى جىلدارى ستۋدەنتتىك سپورتتىڭ جاڭا ورتالىعىنا اينالۋى مۇمكىن. قالا 2026 جىلى ستۋدەنتتەر اراسىنداعى بوكس بويىنشا الەم چەمپيوناتىن وتكىزۋگە الدىن الا كەلىسىم الدى. بۇل تۋرالى قازاقستاننىڭ ۇلتتىق ستۋدەنتتىك سپورت وداعىنىڭ پرەزيدەنتى قايرات زاكيريانوۆ بۇگىنگى بريفينگتە مالىمدەدى. ونىڭ ايتۋىنشا، شەشىم 28 قاراشادا ماكاودا وتكەن ازياتتىق ۋنيۆەرسيتەتتىك سپورت فەدەراسياسىنىڭ باس اسسامبلەياسىندا قابىلدانعان.
زاكيريانوۆتىڭ ايتۋىنشا، ماكاوداعى كەزدەسۋدە حالىقارالىق ستۋدەنتتىك سپورتتى دامىتۋ، وڭىرلىك سەرىكتەستىك ستراتەگياسى جانە ورتالىق ازيادا جاڭا جوبالاردى ىلگەرىلەتۋ ماسەلەلەرى جان-جاقتى تالقىلانعان.
«2026 جىلى قازاقستاندا ستۋدەنتتەر اراسىنداعى بوكس الەم چەمپيوناتىن وتكىزۋ جونىندە ۇسىنىس ءبىلدىردىم. باستامامىز بىردەن قولداۋ تاپتى. بۇل – حالىقارالىق ۋنيۆەرسيتەتتىك سپورت ۇيىمدارىنىڭ ەلىمىزگە دەگەن ۇلكەن سەنىمى»، – دەدى ول.
FISU پرەزيدەنتى لەونس ەدەر دە الماتىنىڭ الەۋەتىنە ەرەكشە توقتالدى.
«قازاقستان ءىرى حالىقارالىق جارىستاردى ۇيىمداستىرۋدا ۇلكەن تاجىريبەگە يە. 2017 جىلى الماتىدا وتكەن قىسقى ۋنيۆەرسيادا ەلدىڭ يميدجىنە زور اسەر ەتكەنى ءالى ەسىمىزدە. ول ستۋدەنتتىك ويىنداردىڭ بۇكىل تاريحىندا ەڭ ۇزدىگى دەپ تانىلدى»، – دەدى ول.
قايرات زاكيريانوۆ سونداي-اق WORLD Boxing ۇيىمىنىڭ بۇل باستاماعا رەسمي قولداۋ كورسەتەتىنىن اتاپ ءوتتى. بەلگىلى قازاقستاندىق سپورتشى گەنناديي گولوۆكين جاقىندا وسى ۇيىمنىڭ باسشىسى بولىپ تاعايىندالعان ەدى. بۇل چەمپيوناتتىڭ مارتەبەسىن ارتتىرىپ، جارىستىڭ حالىقارالىق دەڭگەيدەگى ىقپالىن كۇشەيتەدى دەپ كۇتىلۋدە.
باسپا ءسوز ماسليحاتى بارىسىندا تاعى ءبىر ماڭىزدى ماسەلە قوزعالدى – 2029 جىلعى دۇنيەجۇزىلىك قىسقى ۋنيۆەرسيادانى قازاقستاندا وتكىزۋ مۇمكىندىگى.
«FISU بۇل تاقىرىپتى دا كوتەردى. بىزدە ۋنيۆەرسيادانى جوعارى دەڭگەيدە وتكىزۋ ءۇشىن بارلىق العىشارتتار بار»، – دەدى قايرات زاكيريانوۆ.
الماتىنىڭ 2026 جىلعى ستۋدەنتتەر اراسىنداعى بوكس الەم چەمپيوناتىن قابىلداۋى – تەك ءىرى سپورتتىق ءىس-شارا ەمەس، حالىقارالىق سەنىم مەن ەل ءيميدجىن نىعايتۋ جولىنداعى ۇلكەن قادام. ەگەر 2029 جىلعى قىسقى ۋنيۆەرسيادا دا قازاقستانعا بەرىلسە، ەلىمىزدىڭ ستۋدەنتتىك سپورتتاعى ءرولى جاڭا دەڭگەيگە كوتەرىلۋى مۇمكىن.
ەرنۇر رىسباي