Ticketon Awards 2024 جۇلدەسىنە ارنالعان بۇل شارا ەلىمىزدىڭ مادەنيەت، ونەر جانە سپورت سالاسىنداعى ۇزدىك جەتىستىكتەردى قۇرمەتتەۋدى ماقسات ەتتى.
الماتى تەاترىندا جەتىنشى رەت ۇيىمداستىرىلعان Ticketon Awards 2024 سىيلىعىنىڭ قورىتىندى سالتاناتى ءوتتى. بيىلعى ءىس-شارادا 300-دەن استام ۇمىتكەر اراسىنان 34 اتالىم بويىنشا ۇزدىكتەر انىقتالدى.
"ءشامشى قالداياقوۆتىڭ ءان كەشى" جىلدىڭ ەڭ ۇزدىك كونسەرتى اتانىپ، جۇلدەگە يە بولدى
قازاق حالقىنىڭ سۇيىكتى كومپوزيتورى ءشامشى قالداياقوۆقا ارنالعان ءان كەشى 2023 جىلدىڭ ەڭ ۇزدىك كونسەرتى بولىپ تانىلدى. ماراپاتتى قازاقستاننىڭ ەڭبەك سىڭىرگەن قايراتكەرى، "قۇرمەت" وردەنىنىڭ يەگەرى قالدىبەك ءقۇرمانالى جانە ءشامشىنىڭ نەمەرەسى، قازاقستان رەسپۋبليكاسى مادەنيەت سالاسىنىڭ ۇزدىگى ايسۇلۋ قالداياقوۆا الدى.
قالدىبەك ءقۇرمانالى سالتاناتتى شارا بارىسىندا:
- "قازاق ءۆالسىنىڭ كورولى، كومپوزيتور - ءشامشى قالداياقوۆ قازاق حالقىنا ءبىر-اق رەت بەرىلگەن اللا تاعالانىڭ ەرەكشە سىيى. جابىققاندا، جالعىزسىراعاندا، الدەبىرەۋدەن ءجابىر كورگەندە، “وسىلار مۇڭايماسىنشى” دەپ جاراتۋشى يەمىز بىزگە ءشامشىنى بەرگەن. سونىڭ انىمەن جۇبانسىن، سونىڭ انىمەن رۋحتانسىن دەپ ءشامشىنى سىيلاعان،" - دەپ اتاپ ءوتتى.
مادەني شارالاردىڭ ۇزدىكتەرى
وتكەن جىلى حالىقتىڭ ىقىلاسىنا يە بولعان مادەني شارالار قاتارىندا «ويان، قازاق!» ءفيلمى مەن «گاۋھارتاس» قويىلىمى ەرەكشە اتالىپ ءوتتى. «ۇزدىك شەتەلدىك فيلم» اتالىمى بويىنشا كورەرمەننىڭ باسىم داۋىسىمەن «وپپەنگەيمەر» كارتيناسى جەڭىمپاز اتاندى. سونداي-اق، بولات ءابدىلمانوۆ، داريعا بادىقوۆا، باقىت قاجىبايەۆ ۇزدىك اكتەرلەر رەتىندە تانىلدى.
بولات ءابدىلمانوۆ، قازاقستاننىڭ ەڭبەك سىڭىرگەن قايراتكەرى:
- "مۇنداي ماراپاتتار العان كەزدە ءبىز ءبىر جاعىنان، ارينە، سەن ءالى دە اتتىڭ ۇستىندە ەكەنىڭدى، پەنسياعا شىقساق تا، ءالى قاتاردان قالا قويماعانىمىزدى دالەلدەيدى. بولاشاقتاعى جۇمىستارعا ۇلكەن ءبىر قوشتاۋ بولادى دەپ ويلايمىن،" - دەدى.
الەۋمەتتىك جەلىدەگى جۇلدىزدار
الەۋمەتتىك جەلىدە حيميا ەلەمەنتتەرىن انگە قوسقان ۇلان ۇسەنوۆ تە ۇزدىكتەر قاتارىندا بولدى. سالتاناتتى شارادا «الەۋمەتتىك باستاما» جانە «مادەني-اعارتۋشىلىق جوبا» اتالىمدارى دا ءوز يەلەرىن تاپتى.
داۋىس بەرۋ قورىتىندىلارى
Ticketon سىيلىعىنا ۇمىتكەرلەرگە داۋىس بەرۋ 8 اقپان مەن 10 ناۋرىز ارالىعىندا ءوتتى. جالپى 154 620 داۋىس تىركەلگەن.
ۆيكتوريا تورگۋناكوۆا، Freedom Ticketon كومپانياسىنىڭ باس ديرەكتورى:
- "ءبىزدىڭ ماقساتىمىز – مادەني ورتانىڭ تىنىس-تىرشىلىگىن كورسەتۋ، جىل سايىن جارق ەتكەن جاڭا جۇلدىزداردى ەرەكشەلەۋ، سونىمەن قاتار لايىقتى باعاسىن بەرۋ. بۇل – ۇلتتىڭ رۋحاني وسۋىنە ەڭبەك ەتىپ جۇرگەن ساحنا وكىلدەرىنە، قوعام قايراتكەرلەرىنە، سپورتشىلارعا قۇرمەت،" - دەدى.
سپورتتىق جەتىستىكتەر
وتكەن جىلدىڭ ەڭ جارقىن سپورتتىق وقيعاسى رەتىندە «قازاقستان-دانيا» فۋتبول ماچى تانىلدى. ۇلتتىق قۇرامانىڭ جەڭىسىمەن اياقتالعان سپورتتىق شارا 1513 داۋىس جيناعان.
Ticketon Awards 2023 جۇلدەسىنە ارنالعان بۇل شارا ەلىمىزدىڭ مادەنيەت، ونەر جانە سپورت سالاسىنداعى ۇزدىك جەتىستىكتەردى قۇرمەتتەۋدى ماقسات ەتتى.