21-22 قاراشا ارالىعىندا قازاق ۇلتتىق قىزدار پەداگوگيكالىق ۋنيۆەرسيتەتىندە «Tech QyzPU Niğde Hack: AI جانە جۇمىسشى ماماندىقتار» تاقىرىبىندا حالىقارالىق حاكاتون ءوتتى.
ءىس-شارا مەملەكەت باسشىسى قاسىم-جومارت توقايەۆتىڭ جۇمىسشى ماماندىقتارىنىڭ بەدەلىن ارتتىرۋ جونىندەگى باستاماسىن قولداۋ ماقساتىندا ۇيىمداستىرىلىپ وتىر. سونىمەن قاتار حاكاتون پرەزيدەنتتىڭ جىل سايىنعى جولداۋىندا كورسەتىلگەن سيفرلاندىرۋ مەن جاساندى ينتەللەكتتى دامىتۋعا قاتىستى تاپسىرمالاردى جۇزەگە اسىرۋعا ۇلەس قوسپاق.
جوبا تۇركيا رەسپۋبليكاسىنىڭ نييدە ومەر حاليسدەمير ۋنيۆەرسيتەتى جانە نييدە تەحنوپاركىمەن جاسالعان ەكىجاقتى كەلىسىم اياسىندا ءوتتى.
حاكاتوننىڭ اشىلۋىندا باسقارما ءتوراعاسى – رەكتور مىندەتىن اتقارۋشى ءسابيت سۋاتاي ءسوز سويلەپ، شارانىڭ ماڭىزدىلىعىنا توقتالدى.
«حاكاتون – سايىس قانا ەمەس، يننوۆاسيا مەن شىعارماشىلىقتىڭ مەرەكەسى. ءبىزدىڭ ۋنيۆەرسيتەت جاساندى ينتەللەكت، سيفرلىق پەداگوگيكا، IT جانە EdTech باعىتتارىندا ماڭىزدى جوبالاردى جۇزەگە اسىرىپ كەلەدى. سوندىقتان بۇل حاكاتون ءبىزدىڭ ستراتەگيالىق ماقساتتارىمىزعا تولىق ساي كەلەدى»، – دەدى ءسابيت قۇرمانجان ۇلى.
24 ساعاتتىق جارىستىڭ باستى ماقساتى – قىسقا مەرزىم ىشىندە توپتىق جۇمىس ارقىلى يننوۆاسيالىق باعدارلامالىق شەشىمدەر ازىرلەۋ. بيىلعى دوداعا ەلىمىزدەگى ونعا جۋىق جوعارى وقۋ ورنىنان جيىرما التى كوماندا قاتىستى. ۇيىمداستىرۋشىلار بارلىق قاتىسۋشىنى جوعارى جىلدامدىقتى ينتەرنەتپەن، جۇمىس ورىندارىمەن، ەلەكتر قۋاتىمەن قامتاماسىز ەتىپ، تاماق پەن سۋسىنداردى تەگىن ۇسىندى.
«ءبىز بۇل شارانى تەك جارىس رەتىندە ەمەس، جاڭا كەزەڭگە باستايتىن، جاڭا مۇمكىندىكتەرگە جول اشار باسپالداق دەپ قارايمىز. سوندىقتان دا حاكاتونعا قاتىسقان ءاربىر قاتىسۋشىنى جەڭىمپاز دەپ ەسەپتەيمىز. وسى شارانىڭ ارقاسىندا الدا تالاي جەڭىستەردىڭ ەسىگى اشىلادى دەگەن ويدامىن. نييدە ومەر حاليسدەمير ۋنيۆەرسيتەتى تاراپىنان دا ورتاق جوبالاردى جۇزەگە اسىرۋ ءۇشىن قادامدار جاسالىپ جاتىر»، – دەدى نييدە ومەر حاليسدەمير ۋنيۆەرسيتەتى، كومپيۋتەر جانە اقپاراتتىق عىلىمدار فاكۋلتەتىنىڭ دەكانى، دوكتور الپەر ايتەكىن.
حاكاتوننىڭ سوڭىندا كوماندالار ءوز جوبالارىن QyzPU، نييدە ومەر حاليسدەمير ۋنيۆەرسيتەتى جانە نييدە تەحنوپاركىنىڭ وكىلدەرىنەن تۇراتىن قازىلار القاسىنا ۇسىندى. باعالاۋ ناتيجەسىندە ءبىرىنشى ورىنعا قازاق ۇلتتىق قىزدار پەداگوگيكالىق ۋنيۆەرسيتەتىنىڭ «NSA» كومانداسى يە بولدى. ەكىنشى ورىنعا ەكى كوماندا – عۇماربەك داۋكەيەۆ اتىنداعى الماتى ەنەرگەتيكا جانە بايلانىس ۋنيۆەرسيتەتىنىڭ جانە مۇحامەتجان تىنىشبايەۆ اتىنداعى ALT ۋنيۆەرسيتەتىنىڭ كومانداسى لايىق دەپ تانىلدى. ال ءۇشىنشى ورىن م.ح. دۋلاتي اتىنداعى تاراز ۋنيۆەرسيتەتىنىڭ، الماتى تەحنولوگيالىق ۋنيۆەرسيتەتىنىڭ جانە QyzPU كوماندالارىنا بەرىلدى.
جەڭىمپاز اتانعان قازاق ۇلتتىق قىزدار پەداگوگيكالىق ۋنيۆەرسيتەتىنىڭ «NSA» كومانداسى ءوز قۋانىشتارىمەن ءبولىستى:
«الدىڭعى جىلى دا قاتىسىپ، 3-ورىندى يەلەنگەن ەدىك. بيىل قاۋىپسىزدىك ماسەلەسى وزەكتى بولعاندىقتان، وسى كەيستى تاڭدادىق. ۇشەۋمىز مىندەتتەردى ءوزارا ءبولىسىپ الىپ، 24 ساعات بويى بار كۇشىمىزدى سالىپ جۇمىس ىستەدىك. الداعى ۋاقىتتا جاساندى ينتەللەكت باعىتىندا تاجىريبەمىزدى ودان ءارى دامىتقىمىز كەلەدى. تۇركياعا بۇدان دا جاقسى دايىندىقپەن بارۋدى جوسپارلاپ وتىرمىز. ۋنيۆەرسيتەتىمىزدىڭ اتىن شىعارىپ، ۇلكەن جەتىستىكتەرگە جەتەمىز دەپ سەنەمىز»، – دەدى توپ مۇشەسى، 4 كۋرس ستۋدەنتى نازەركە تۇرعانبەك.
جەڭىمپازدارعا قارجىلاي سەرتيفيكاتتار تابىستالىپ، ءبىرىنشى ورىن يەگەرىنە قوسىمشا تۇركياداعى نييدە تەحنوپاركىنىڭ اكسەلەراسيالىق باعدارلاماسىنا قاتىسۋ سەرتيفيكاتى ۇسىنىلدى.
