كوركەم سىرعاناۋدان قازاقستان قۇراماسىنىڭ كوشباسشىسى ميحايل شايدوروۆ گران-پري فينالىنا جولداما الدى، دەپ حابارلايدى Aqshamnews.kz ءتىلشىسى قازاقستاننىڭ ۇلتتىق وليمپيادا كوميتەتىنە سىلتەمە جاساپ.
22 قاراشادا حەلسينكيدە (فينليانديا) ەرلەر اراسىنداعى گران-پري سەرياسىنىڭ سوڭعى كەزەڭى ءوتتى. وندا جاپونيالىق يۋما كاگياما جەڭىسكە جەتتى.
التى كەزەڭنىڭ قورىتىندىسى بويىنشا فينالعا وتەتىن سپورتشىلار انىقتالدى. قازاقستاندىق ميحايل شايدوروۆ 24 ۇپاي جيناپ، بەسىنشى ناتيجەمەن شەشۋشى سىنعا جولداما الدى.
فينالعا وتكەن سپورتشىلار ءتىزىمى:
- نيكيتا مالينين (اقش) – 30 ۇپاي
- يۋما كاگياما (جاپونيا) – 30 ۇپاي
- شۋن ساتو (جاپونيا) – 28 ۇپاي
- ادام سياو حيم فا (فرانسيا) – 26 ۇپاي
- ميحايل شايدوروۆ (قازاقستان) – 24 ۇپاي
- دەنيەل گراسسل (يتاليا) – 20 ۇپاي
گران-پري فينالى 4–7 جەلتوقسان كۇندەرى جاپونيانىڭ ناگويا قالاسىندا وتەدى.