ءال-فارابي اتىنداعى قازاق ۇلتتىق ۋنيۆەرسيتەتىنىڭ ەكوحابىندا «تازا قازاقستان» باستاماسى اياسىندا «Zero Waste Campus» باعدارلاماسىنىڭ ءىس-شارالارى ءوتىپ جاتىر. جوبا كامپۋستاردا قالدىقسىز ءومىر سالتىن ناسيحاتتاۋعا جانە ستۋدەنتتەر اراسىندا ەكولوگيالىق مادەنيەتتى قالىپتاستىرۋعا باعىتتالعان.
قاتىسۋشىلار «Zero Waste» قاعيدالارىمەن تانىسىپ، قالدىقتاردى سۇرىپتاۋ بويىنشا تاجىريبەدەن ءوتتى. پلاستيكالىق قالدىقتاردى قايتا وڭدەۋ ۇلگىلەرى كورسەتىلىپ، سانالى تۇتىنۋ مادەنيەتى ءتۇسىندىرىلدى. ستۋدەنتتەر بوتەلكە قاقپاقتارىن سۇرىپتاپ، ارنايى سەحتاعى ۇساقتاۋ جانە ءتۇرلى-تۇستى پليتالارعا اينالدىرۋ پروسەسىن باقىلادى. وسى پليتالاردان ۇستەل، ورىندىق، ينتەرەر بۇيىمدارى جاسالادى.
كامپۋس اۋماعىنا قالدىقتاردى بولەك جينايتىن فاندوماتتار ورناتىلعان. «ECO Network» كومپانياسىنىڭ جوبالار جەتەكشىسى حامزا سافاروۆتىڭ ايتۋىنشا، ەكوحاب – كومپانيا مەن قازۇۋ اراسىنداعى تابىستى ىنتىماقتاستىقتىڭ جەمىسى. مۇندا كەز كەلگەن ادام قالدىقتارىن وتكىزىپ، ولاردان دايىندالعان بۇيىمدار جاساي الادى. سونىمەن قاتار جاسىل ەكونوميكا تاقىرىبىندا شەبەرلىك ساباقتارى مەن ينتەراكتيۆتى وقىتۋ وتكىزىلەدى.
جوبانى ۇيلەستىرۋشى، يۋنەسكو-نىڭ تۇراقتى دامۋ كافەدراسىنىڭ اعا وقىتۋشىسى ايگەرىم كەرىمقۇلوۆا بيىل ەكوحاب جۇمىسىنا جۇزدەگەن ستۋدەنتتەردىڭ تارتىلعانىن ايتتى. ال ستۋدەنتتەردىڭ وزدەرى ەكولوگيالىق باستامانىڭ ماڭىزىن ەرەكشە اتاپ ءوتتى:
-
مادينا ەستايەۆا، جۋرناليستيكا فاكۋلتەتىنىڭ 1-كۋرس ستۋدەنتى:
«ەكوحاب جاي عانا اكسيا ەمەس، ول – ەكولوگيالىق مادەنيەت قالىپتاستىرۋدىڭ ناقتى قادامى. قالدىقتاردى قايتا وڭدەۋ ارقىلى ءبىز كليماتقا كەلەتىن زياندى ازايتامىز». -
رامينا يبراگيموۆا، ەكولوگيا فاكۋلتەتىنىڭ 1-كۋرس ستۋدەنتى:
«بۇل تاجىريبە مەن ءۇشىن وتە قۇندى. ۆولونتەر رەتىندە قالدىقتاردى سۇرىپتاۋ – بولاشاق ماماندىعىم ءۇشىن ۇلكەن مەكتەپ».
قازۇۋ ەكوحابى جاستاردىڭ ەكولوگيا سالاسىنداعى تاجىريبە الماسۋ جانە ديالوگ الاڭىنا اينالدى. «Zero Waste Campus» باستاماسى – تازا ءارى تۇراقتى بولاشاققا قادام جانە ستۋدەنتتەردىڭ تابيعاتتى قورعاۋداعى بەلسەندىلىگىنىڭ ايقىن دالەلى.