4،5 مىڭنان استامى جاراقات العان
تاۋەلسىزدىك جىلدارىندا قىزمەت بابىندا جۇرگەن 815 پوليسيا قىزمەتكەرى قازا تاۋىپ، 4،5 مىڭنان استامى جاراقات العان. مەملەكەت باسشىسى قازاقستان پوليسياسىنىڭ 30 جىلدىعىنا ارنالعان سالتاناتتى جيىندا وسىنداي دەرەك كەلتىردى، دەپ حابارلايدى Almaty-akshamy.kz.
سوندىقتان قوعامنىڭ قاۋىپسىزدىگى مەن تۇراقتىلىعىن قامتاماسىز ەتۋ ىسىندەگى ىشكى ىستەر ورگاندارىنىڭ ۇلەسىن باعالاماۋعا بولمايدى. قاسىم-جومارت توقايەۆ پوليسيا قىزمەتىنىڭ كوبىنەسە ادام ءومىرى مەن دەنساۋلىعىنا قاتەر توندىرەتىن ءقاۋىپتى ماماندىق ەكەنىن اتاپ ءوتتى.
«ءبىز ءتارتىپ ساقشىلارىن قولداۋعا ءاردايىم ەرەكشە كوڭىل بولەمىز. كەيىنگى جىلدارى پوليسيا قىزمەتكەرلەرىنىڭ جالاقىسى بىرنەشە رەت ءوسىپ، تۇرعىن ءۇيدى جالعا الۋ قۇنىنا وتەماقى تولەۋ ەنگىزىلدى. سونىمەن قاتار اكىمدەرگە جەرگىلىكتى بيۋدجەت ەسەبىنەن قارجىلاندىرىلاتىن قىزمەتتەرگە 30 پايىزدىق ۇستەماقى بەلگىلەۋ قۇقىعى بەرىلدى. مەنىڭ تاپسىرماما سايكەس بيىلعى 1 قازاننان باستاپ جەدەل-ىزدەستىرۋ قىزمەتى قىزمەتكەرلەرىنىڭ ەڭبەكاقىسى كوتەرىلەدى. ءبىز پوليسيا قىزمەتكەرلەرىن قۇقىقتىق جانە الەۋمەتتىك تۇرعىدان قورعاۋدى جاقسارتۋ ءۇشىن كەشەندى شارالاردى جالعاستىرامىز»،- دەدى مەملەكەت باسشىسى.
پرەزيدەنت قۇقىق قورعاۋ ورگاندارىندا قىزمەت اتقارۋدىڭ جاستار ءۇشىن تارتىمدى ءارى مارتەبەلى بولۋى ماڭىزدى دەپ ەسەپتەيدى. ۇزدىك پوليسەيلەردى كوتەرمەلەپ، ەرەكشەلەپ، ماراپاتتاۋ ءىسىن قولدايتىنىن ءبىلدىردى. سونداي-اق قۇقىق قورعاۋ ورگاندارىنداعى قىزمەت تەك ارتىقشىلىق پەن ابىروي عانا ەمەس، حالىق الدىنداعى ۇلكەن جاۋاپكەرشىلىك ەكەنىن ءتۇسىنۋ كەرەك ەكەنىن اتاپ ءوتتى. قاسىم-جومارت توقايەۆ ىشكى ىستەر مينيسترلىگى كادرلىق الەۋەتتى ۇدايى جەتىلدىرۋدى، قىزمەتكەرلەردىڭ كاسىبي بىلىكتىلىگىن جانە مورالدىق رۋحىن نىعايتۋدى قامتاماسىز ەتۋى قاجەت ەكەنىن ايتتى. قازاقستان پوليسياسىندا وتانسۇيگىشتىكتىڭ، اشىقتىقتىڭ، ءارقاشان ادامدارعا كومەككە كەلۋگە دايىن تۇراتىن ادالدىقتىڭ وبرازى قالىپتاسۋى كەرەك. بۇل بارلىق ءتارتىپ ساقشىلارىنىڭ ويلاۋ جۇيەسى مەن مىنەز-قۇلقىنا تۇبەگەيلى وزگەرىستەر ەنگىزۋدى تالاپ ەتەدى.