تالدىقورعان قالاسىندا ەكىنشى دەڭگەيلى بانكتەردىڭ بىرىنە تيەسىلى بانكوماتتى بۇزۋ ارەكەتى جايلى 102 ارناسىنا حابارلاما كەلىپ تۇسكەن.
اقپارات دەرەۋ تىركەلىپ، تەكسەرۋ جۇمىستارىنا پوليسيا قىزمەتكەرلەرى مەن جەدەل باسقارۋ ورتالىعىنىڭ ماماندارى جىلدام ارەكەت ەتتى، - دەپ حابارلايدى Aqshamnews.kz Polisia.kz-كە سىلتەمە جاساپ.
سىرتقى بەينەباقىلاۋ كامەرالارىنداعى جازبالاردى تالداۋ بارىسىندا جبو وپەراتورلارى ءتاڭسارى ۋاقىتتا كۇدىكتى ەر ادامنىڭ قولدا بار قۇرالداردى پايدالانىپ، بانكوماتتى زاقىمداۋعا تىرىسقانىن انىقتادى.
شامامەن جارتى ساعات بويى ول قۇرىلعىنى اشۋعا ارەكەت جاساعانىمەن، اقشاعا قول جەتكىزە المادى. ودان ءارى تەرگەۋ جۇمىستارى كۇدىكتىنىڭ قوزعالىس باعىتىن انىقتاۋ ارقىلى سيفرلىق كەڭىستىكتە جالعاستى. قالالىق كامەرالار جەلىسى، سونداي-اق جەكە تۇرعىن ۇيلەر مەن ساۋدا نىساندارىنداعى بەينەباقىلاۋ جۇيەلەرىن پايدالانا وتىرىپ، پوليسەيلەر ەر ادامنىڭ قۇقىق بۇزۋشىلىقتان كەيىنگى جولىن قالپىنا كەلتىردى. ىزدەۋ اياسى قالاداعى بىرنەشە جەكە ۇيگە دەيىن تارىلدى. قاجەتتى مالىمەتتەر الىنعان سوڭ، پوليسيا قىزمەتكەرلەرى جەدەل تۇردە وقيعا ورنىنا شىعىپ، اۋلا-اۋلانى ارالاۋ جۇمىستارىن جۇرگىزدى.
ناتيجەسىندە 45 جاستاعى كۇدىكتىنىڭ جۇرگەن جەرى انىقتالىپ، ول ۇستالدى. ۇستالعان ساتتە ەر ادام الكوگولدىك ماس كۇيدە بولعان. كۇدىكتىنىڭ جەكە باسىن انىقتاۋ جانە ۇستاۋ ءۇشىن نەبارى بىرنەشە كۇن قاجەت بولدى. قازىرگى ۋاقىتتا بانككە كەلتىرىلگەن ماتەريالدىق شىعىن كولەمى باعالانۋدا، سونداي-اق زاڭناما اياسىندا قاجەتتى تەرگەۋ ارەكەتتەرى جالعاسىپ جاتىر.