قازاق كينوسىنا ەڭبەگى سىڭگەن اكتەر مۇرات بيسەمبين 8 قاڭتاردا دۇنيەدەن ءوتتى. قارالى حاباردى مارقۇمنىڭ قىزى الەۋمەتتىك جەلىدە جاريالادى. اqshamnews.kz ءتىلشىسى ونىڭ كەڭىنەن تانىلعان جوبالارى مەن ويناعان رولدەرىن ەسكە ءتۇسىرىپ ءوتتى.
"رەكەتير" (2007)
90-جىلدارداعى الماتىنىڭ قىلمىس الەمى، "كوشەدەگى زاڭ"، كۇش پەن ىقپال ءۇشىن ارپالىسقان توپتار تۋرالى وقيعا. فيلمدە مۇرات بيسەمبين رۋسلان ەسىمدى قىلمىس الەمىندەگى سالماعى بار كەيىپكەردى سومدايدى. ءدال وسى رولدەن كەيىن اكتەردىڭ تانىمالدىعى ارتىپ، كوپتەگەن جوباعا شاقىرتۋلار ءتۇسىپ باستاعان ەدى. ءتىپتى وسى تۋىندىدان كەيىن بيسەمبيندى ءبارى "رۋسلان براتان" دەپ اتاپ كەتكەن بولاتىن.
"اعايىندىلار" (2009)
ءۇش اعايىندىنىڭ ءومىرى، مىنەز-قۇلقى مەن تاڭداۋى، وتباسىلىق بايلانىس پەن تۇرمىستىق قايشىلىقتار ءوربيتىن سەريال. ۇلتتىق ارنادان كورگەن تەلەحيكايادا دا مۇرات بيسەمبين رۋسلان رولىندە وينايدى. "رەكەتيردەگى" كەيىپكەرلەردىڭ بىرنەشەۋى قاتار تۇسەتىن بۇل تۋىندى دا كورەرمەننىڭ كوڭىلىنەن شىققان ەدى.
"سكاز و روزوۆوم زايسە" (2010)
الماتىعا جاڭا كەلگەن ستۋدەنت ەرلاننىڭ ۇلكەن قالا زاڭىنا بەيىمدەلۋ جولىنداعى اۋىر سىناقتارى سۋرەتتەلەتىن فيلمدە مۇرات بيسەمبين چۋكوت ەسىمدى كەيىپكەردى وينايدى. ايتا كەتەيىك، اتالمىش ءفيلمنىڭ ەكىنشى ءبولىمى بيىل كورەرمەنگە قايتا جول تارتتى.
"رىۆوك" (2010)
اۋىر جاراقاتتان كەيىن سپورتقا قايتا ورالۋعا تىرىساتىن قانات ەسىمدى ءجاسوسپىرىمنىڭ وقيعاسى جايلى كينوتۋىندىدا بيسەمبين جاتتىقتىرۋشىنىڭ رولىندە وينايدى. موتيۆاسيالىق سپورتتىق دراما 2010 جىلى جارىق كورىپ، كوپشىلىكتىڭ كوڭىلىنەن شىققان ەدى.
"برات يلي براك" (2017)
كەيىنگى جىلدارداعى كورەرمەننىڭ سۇيىكتى كومەدياسىنا اينالعان "برات يلي براك" ءفيلمىنىڭ بۇگىندە ءۇشىنشى ءبولىمى شىققان. ايدار ەسىمدى قاراپايىم جىگىتتىڭ سۇيگەن قىزى گاۋحارعا ۇيلەنگىسى كەلەدى. ءبىراق ونىڭ بەس اعاسى "جىگىت ساعان لايىق پا؟" دەگەن سۇراقپەن جولىن كەسەدى. كومەديا ءدال وسى "اعالىق باقىلاۋدان" ءوتۋدىڭ قىزىق-قالجىڭعا تولى تارتىسىنا قۇرىلعان. مۇرات بيسەمبين ءمۇندا گاۋحاردىڭ اسان ەسىمدى قاتال اعاسىن سومدايدى.
"توميريس" (2019)
اكتەردىڭ سىرقاتتانباي تۇرىپ كەيىنگى تۇسكەن جوبالارىنىڭ ءبىرى اقان ساتايەۆتىڭ - "توميريس" تاريحي ءفيلمى. ساق ءداۋىرى، توميريس حانشايىمنىڭ تاعدىرى مەن ەلدىك جولى، تايپالاردىڭ بىرىگۋى مەن سىرتقى قاۋىپ-قاتەرگە قارسى تۇرۋ يدەياسى كورىنىس تاباتىن تۋىندىدا مۇرات بيسەمبين باستى رولدەردىڭ ءبىرى سپارگاپ بەينەسىن سومدايدى.
مۇرات بولات ۇلى بيسەمبين - قىزىلوردادا دۇنيەگە كەلگەن. قورقىت اتا اتىنداعى قىزىلوردا ۋنيۆەرسيتەتىن ينجەنەر-ەلەكتريك ماماندىعى بويىنشا ءتامامداعان. ول سپورتپەن تۇراقتى اينالىسىپ (بوكس، اۋىر اتلەتيكا، بوديبيلدينگ، پاۋەرليفتينگ)، "حابار" ارناسىنداعى "ارەنا" سپورتتىق باعدارلاماسىنىڭ جۇرگىزۋشىلەرىنىڭ ءبىرى بولدى. مارقۇم وتباسىلى، ءۇش بالانىڭ اكەسى بولاتىن.
2024 جىلدىڭ قىركۇيەگىندە وعان ۇيقىبەز وبىرى دياگنوزى قويىلىپ، ەم قابىلداپ باستادى. الايدا 2025 جىلعى جەلتوقساندا ينسۋلتتەن كەيىن شۇعىل اۋرۋحاناعا جەتكىزىلىپ، 2026 جىلى 8 قاڭتاردا ماڭگىلىك ساپارعا اتتانعان ءمالىم بولدى.