بالىق شارۋاشىلىعى اگروونەركاسىپتىك كەشەننىڭ نەگىزگى سالالارىنىڭ ءبىرى جانە ەكونوميكالىق ءوسىمنىڭ، جۇمىسپەن قامتۋدىڭ ءارى ەلدىڭ ازىق-تۇلىك قاۋىپسىزدىگىن قامتاماسىز ەتۋدەگى ماڭىزدى سالا، - دەپ حابارلادى Aqshamnews.kz.
2021–2030 جىلدارعا ارنالعان بالىق شارۋاشىلىعىن دامىتۋ باعدارلاماسى اياسىندا ق ر اشم بالىق شارۋاشىلىعى كوميتەتى بالىق ءوسىرۋ كولەمىن ارتتىرۋعا، ىشكى تۇتىنۋدى ۇلعايتۋعا جانە سۋ بيورەسۋرستارىنىڭ تابيعي پوپۋلياسيالارىن قالپىنا كەلتىرۋگە باعىتتالعان كەشەندى شارالاردى ىسكە اسىرىلىپ كەلەدى.
2025 جىلدىڭ 11 ايىنىڭ قورىتىندىسى بويىنشا قازاقستان رەسپۋبليكاسىنداعى بالىق ونىمدەرى نارىعىنىڭ كولەمى 76،8 مىڭ تونناعا جەتىپ، 2024 جىلدىڭ وسى كەزەڭىمەن سالىستىرعاندا 10%-عا ءوستى. ەسەپتى كەزەڭدە 38،5 مىڭ توننا بالىق اۋلانىپ، 20،9 مىڭ توننا تاۋارلىق بالىق ءوسىرىلدى. اۋلانۋ كولەمىنىڭ 10%-دى، ال اكۆاشارۋاشىلىق بويىنشا ءوسىم كولەمى 22%-دى قۇراپ، سالانىڭ قارقىندى دامۋىن كورسەتىپ وتىر.
قازىرگى ۋاقىتتا قازاقستاندا حالىقارالىق جانە رەسپۋبليكالىق ماڭىزى بار 20 سۋ ايدىنى بار، ولار 366 بالىق شارۋاشىلىعى ۋچاسكەسىنە بولىنگەن.
بالىقتى وڭدەۋمەن جىلدىق وندىرىستىك قۋاتى شامامەن 120 مىڭ توننانى قۇرايتىن 72 كاسىپورىن اينالىسادى. ونىڭ ىشىندە 20 كاسىپورىن ەۋروپالىق وداق ەلدەرىنە ءونىم ەكسپورتتاۋعا قۇقىلى. قازاقستاندىق بالىق ونىمدەرى گەرمانيا، نيدەرلاندى، رەسەي جانە قىتايدى قوسا العاندا، الەمنىڭ 21 ەلىنە جەتكىزىلەدى. 2025 جىلدىڭ 11 ايىندا شامامەن 59،4 مىڭ توننا دايىن بالىق ءونىمى ءوندىرىلدى. وڭدەۋ كولەمىن ودان ءارى ارتتىرۋ ءۇشىن قوسىلعان قۇن سالىعىن 70%-عا تومەندەتۋ، جىلدىق 5% مولشەرلەمەمەن جەڭىلدەتىلگەن نەسيەلەۋ سياقتى مەملەكەتتىك قولداۋ شارالارى كوزدەلگەن.
بيوالۋانتۇرلىلىكتى ساقتاۋ ماسەلەلەرىنە ەرەكشە كوڭىل بولىنۋدە. مەملەكەت باسشىسىنىڭ تاپسىرماسىنا سايكەس 2024 جىلى كاسپيي يتبالىعى پوپۋلياسياسىن ساقتاۋ ماقساتىندا اۋماعى 108،6 مىڭ گەكتاردى قۇرايتىن «كاسپيي يتبالىعى» مەملەكەتتىك تابيعي رەزەرۆاتى قۇرىلدى. سونداي-اق اتىراۋ بەكىرە بالىق ءوسىرۋ زاۋىتىن جاڭعىرتۋ جۇمىستارى جۇرگىزىلۋدە، بۇل بەكىرە تۇقىمداس بالىق شاباقتارىن شىعارۋ كولەمىن جىلىنا 5 ميلليوننان 7،5 ميلليونعا دەيىن ارتتىرۋعا مۇمكىندىك بەرەدى.
سالاداعى ينۆەستيسيالىق بەلسەندىلىكتە وڭ كورسەتكىش كورسەتۋدە. 2021–2024 جىلدار ارالىعىندا اكۆاشارۋاشىلىق سالاسىندا جالپى سوماسى 21،4 ملرد تەڭگەنى قۇرايتىن 87 جوبا ىسكە اسىرىلدى. 2025 جىلدىڭ 11 ايىندا بالىق شارۋاشىلىعىن دامىتۋعا 4،6 ملرد تەڭگە ينۆەستيسيا سالىندى.
2025 جىلى مەملەكەتتىك تاپسىرىس اياسىندا باعالى بالىق تۇرلەرىنىڭ 21،92 ميلليون شاباق ءوسىرىلىپ، سۋ ايدىندارىنا جىبەرىلدى. مەملەكەتتىك بالىق پيتومنيكتەرىن جاڭعىرتۋ ناتيجەسىندە ولاردىڭ وندىرىستىك قۋاتىن جىلىنا 18،4 ميلليوننان 80،5 ميلليونعا دەيىن ۇلعايتۋ جوسپارلانىپ وتىر.
قابىلدانىپ جاتقان شارالار كەشەنى قازاقستاننىڭ بالىق شارۋاشىلىعى بەلسەندى ءارى تۇراقتى دامۋ كەزەڭىنە وتكەنىن ايقىن كورسەتەدى. مەملەكەتتىك قولداۋدىڭ كۇشەيۋى، سالانى سيفرلاندىرۋ، ينۆەستيسيالاردىڭ تارتىلۋى جانە ينفراقۇرىلىمدى جاڭعىرتۋ ءوندىرىس پەن وڭدەۋدى ارتتىرۋعا، سۋ ەكوجۇيەلەرىن ساقتاۋعا جانە حالىقتى ساپالى بالىق ونىمدەرىمەن قامتاماسىز ەتۋگە بەرىك نەگىز قالىپتاستىرادى.