الماتىلىق "قايرات" كلۋبىنىڭ يەسى قايرات بورانبايەۆ جاس قاقپاشى شەرحان قالمۇرزانىڭ ويىنىنا جوعارى باعا بەردى، - دەپ حابارلايدى aqshamnews.kz ءتىلشىسى 1bol.kz-كە سىلتەمە جاساپ.
18 جاستاعى شەرحان قالمۇرزا سوڭعى ماچتاردا نەگىزگى قاقپاشى رەتىندە الاڭعا شىعىپ ءجۇر. بۇعان دەيىنگى نەگىزگى ويىنشىلار الەكساندر زارۋسكيي مەن تەمىرلان اناربەكوۆ جاراقات الىپ، قاتاردان تىس قالعان بولاتىن. وسىنداي جاعدايدا شەرحان كۇتپەگەن جەردەن نەگىزگى قۇرامعا ەندى جانە سەنىمدى ويىنىمەن كوزگە ءتۇستى.
جاس قاقپاشى "قايراتتىڭ" چەمپيوندار ليگاسىنداعى ليسسابوندىق "سپورتينگكە" قارسى (1:4) جانە مادريدتىك "رەالعا" قارسى (0:5) ويىنداردا قاقپانى قورعادى.
"قالمۇرزا، ارينە، ەرەكشە مۇمكىندىك الدى. ءيا، بۇل مۇمكىندىك نەگىزگى ويىنشىلاردىڭ جاراقاتىنا بايلانىستى تۋعانى وكىنىشتى، ءبىراق شەرحان ءوزىن وتە سەنىمدى ۇستاپ ءجۇر. ءبىز ونىڭ ويىنىنا قۋانىشتىمىز، ول جاقسى قاقپاشى. كەيدە الاڭدا اۋىر سوقتىعىستار بولعاندا "تەك جاراقات الماسىن، ايتپەسە قاقپانى 16 جاستاعى بالا قورعاۋى مۇمكىن" دەپ ەرىكسىز كۇلىپ ويلايمىز"، - دەيدى بورانبايەۆ ازىلمەن.
ءبىز جاس فۋتبولشىلارعا سەنىم ارتا الاتىنىمىزدى كورىپ وتىرمىز. ولارداعى ىنتا مەن دەڭگەي قۋانتادى. ارينە، تاجىريبە ءالى از، ءبىراق شەرحان ءبىر جىلدان استام ۋاقىت "قايرات-جاستار" ساپىندا ءبىرىنشى ليگادا وينادى، ياعني ەرەسەكتەر فۋتبولىن سەزىندى. ارينە، "سەلتيك" پەن "رەال مادريد" دەڭگەيى مۇلدە باسقا، ءبىراق ول بۇل سىنعا لايىق ەكەنىن كورسەتتى. ەڭ ماڭىزدىسى، كومانداداعى بارلىق ويىنشى ونى قولداپ، "شەرحانعا كومەكتەسەمىز، بارىمىزدى سالامىز، تەك ول وزىنە سەنىمدى بولسىن" دەدى"، - دەدى بورانبايەۆ.