ەكولوگيا جانە قامقورلىق: جەتىسۋ اۋدانىنداعى "باقىتتى وتباسى" الەۋمەتتىك ورتالىعى "فابريكا" ەكوجوباسىنا قاتىستى
الماتىدا "تازا قازاقستان" رەسپۋبليكالىق اكسياسى اياسىندا توقىما قالدىقتارىن جيناۋ جانە قايتا وڭدەۋگە باعىتتالعان "فابريكا" ەكولوگيالىق جوباسى جۇزەگە اسىرىلىپ كەلەدى. 2025 جىلى 8 قازاندا جەتىسۋ اۋدانىنداعى "باقىتتى وتباسى" الەۋمەتتىك ورتالىعىندا جوبانى بىرلەسىپ جۇزەگە اسىرۋ جونىندە مەموراندۋمعا قول قويىلدى.
"فابريكا" جوباسى جەتىسۋ اۋدانىندا قارقىندى جۇزەگە اسىرىلىپ كەلەدى: تۇرعىندار ەسكى كيىم-كەشەك، توسەك-جابدىق، سۇلگى جانە باسقا دا توقىما بۇيىمدار تاپسىرادى. بارلىق ماتەريال سۇرىپتالىپ، قايتا وڭدەلەدى، ماتانىڭ ءبىر بولىگى جاڭا توقىما ونىمدەرى مەن تۇرمىستىق ماتەريالدار رەتىندە، ال جارامدى زاتتار قايىرىمدىلىق ۇيىمدارىنا بەرىلەدى.
مەموراندۋم اياسىندا "باقىتتى وتباسى" ورتالىعى ومىرىندە قيىندىق بولىپ جاتقان ايەلدەردى جۇمىسپەن قامتۋعا جانە قايتا وڭدەلگەن ماتەريالداردان ءونىم تىگۋگە جاۋاپتى. ورتالىق ايىنا 1000 داناعا دەيىن بۇيىم وندىرە الادى. بۇل جوبا ەكولوگيالىق، سونىمەن قاتار الەۋمەتتىك تۇراقتىلىقتى دا قامتاماسىز ەتەدى.
"فابريكا" جوباسىنىڭ باستى ماقساتى – توقىما قالدىقتارىنىڭ كولەمىن ازايتۋ، قورشاعان ورتاعا تۇسەتىن جۇكتەمەنى تومەندەتۋ، قالا تۇرعىندارى اراسىندا سانالى تۇتىنۋ مادەنيەتىن دامىتۋ، سونداي-اق، قايىرىمدىلىق پەن جۇمىسپەن قامتۋدى قولداۋ. "باقىتتى وتباسى" ورتالىعىنىڭ قاتىسۋىمەن ەكولوگيالىق باستاما مەن الەۋمەتتىك ميسسيانى بىرىكتىرەتىن جاڭا كەزەڭ باستالادى.