تالدىقورعان قالاسىندا شاعىن فۋتبولدان ءداستۇرلى تۋرنير ءوتتى.
سپورتتىق شارا سارقان اۋدانىنا قاراستى قارابوگەت اۋىلىنىڭ 1980 جىلى تۋعان ازاماتتارىنىڭ باستاماسىمەن ۇيىمداستىرىلىپ، مارقۇم بولعان اۋىلداستاردىڭ رۋحىنا ارنالدى.
ءتۋرنيردىڭ باستى ماقساتى – ومىردەن وزعان ازاماتتاردى ەسكە الىپ، اۋىلداستار اراسىنداعى دوستىقتى، بىرلىكتى نىعايتۋ، ۇلكەنگە قۇرمەت، كىشىگە ىزەت كورسەتۋ جانە جاستاردى سالاۋاتتى ءومىر سالتىنا باۋلۋ.
بۇل جولعى جارىس مارقۇم بولعان ازاماتتار – ايتەنوۆ ءادىل دۇيسەتاي ۇلى، نۇرعالييەۆ ايدىنبەك بايعالي ۇلى، باجايەۆ المات مارات ۇلى، كيريسبەكوۆ دۋلات قوجاحمەت ۇلى جانە بولەگەنوۆ رەگيستان مارات ۇلىنىڭ جارقىن بەينەسىنە ارنالدى.
«بۇگىنگى تۋرنير جوعارى دەڭگەيدە ءوتتى. بىرلىكتىڭ ارقاسىندا جاستارىمىز بۇقارالىق سپورتقا دەن قويىپ كەلەدى. سونىمەن قاتار دۇنيەدەن وزعان جولداستارىن ەسكە الىپ، اس بەرىپ، ساۋاپتى ءىس جاساپ وتىر. بۇل يگى باستاما الداعى ۋاقىتتا دا جالعاسىن تابادى دەپ سەنەمىن»، – دەدى قارابوگەت اۋىلىنىڭ تۋماسى، مارقۇم رەگيستان بولەگەنوۆتىڭ اكەسى مارات بولەگەن ۇلى.
بيىل ءۇشىنشى مارتە ۇيىمداستىرىلعان تۋرنيرگە 11 كوماندا قاتىستى. جۇلدەلى ورىندار كەلەسىدەي ۇلەستىرىلدى: I ورىن – 2001 جىلعى تۇلەكتەر (100 000 تەڭگە)، II ورىن – 1980 جىلعى تۇلەكتەر (70 000 تەڭگە)، III ورىن – 1988 جىلعى تۇلەكتەر (50 000 تەڭگە)، IV ورىن – ىنتالاندىرۋ سىيلىعى. سونىمەن قاتار ۇزدىك ويىنشىلارعا ارنايى كۋبوكتار، مەدالدار، ماداقتامالار جانە قارجىلاي سىيلىقتار تابىستالدى.
«تۋرنيردەن العان اسەرىمدى سوزبەن جەتكىزۋ قيىن. وسىنداي شارالار ءبىزدى جاقىنداستىرىپ، ۇمىت بولا باستاعان دوستىقتى قايتا جانداندىرادى. بۇل – ناعىز بىرلىك پەن جەرلەستىك رۋحىنىڭ كورىنىسى»، – دەدى ويىنعا قاتىسۋشى نۇرلان قابدولدين.
ال «1988» كومانداسىنىڭ مۇشەسى نۇربول بەرىكبول ۇلى ءوز ويىن بىلاي جەتكىزدى: «ءار ويىن ساتىندە تەك فۋتبول ەمەس، شىنايى دوستىق پەن ءوزارا قولداۋدى سەزىندىك. وسىنداي كەزدەسۋلەر كۇندەلىكتى تىرشىلىكتە الىستاپ كەتكەن باۋىرلاردى قايتا تابىستىرىپ، ۇرپاقتار ساباقتاستىعىن كۇشەيتەدى».
تۋرنير بارىسىندا قۇران باعىشتالىپ، مارقۇم ازاماتتاردىڭ رۋحىنا اس بەرىلدى. بۇل يگى شارا ەلدىك پەن ەرلىككە، دوستىق پەن قۇرمەتكە باستايتىن ىزگى داستۇرگە اينالدى.