جۇمىستاعى شامادان تىس جۇكتەمە مەن ءبىرسارىندى تىرشىلىك – ادامداردىڭ كۇيزەلىپ، ەموسيالىق شارشاۋعا ۇشىراۋىنا سەبەپ بولاتىن باستى فاكتورلاردىڭ ءبىرى. بۇل جاعدايدىڭ العاشقى بەلگىلەرى – ۇنەمى شارشاۋ، ۇيقىسىزدىق، مازاسىزدىق پەن الاڭداۋشىلىق.
وسىنداي كۇيدەن شىعۋدىڭ ءتيىمدى جولدارىنىڭ ءبىرى – حوببي. پسيحولوگتاردىڭ پىكىرىنشە، حوببي – ماحابباتتى، ەڭبەكتى جانە ويىندى ءبىر ارناعا توعىستىرا وتىرىپ، ادامعا رۋحاني تەپە-تەڭدىك سىيلايدى. بۇل تۋرالى Aqshamnews.kz ءتىلشىسى كەڭىرەك تارقاتىپ كوردى.
سۋرەت: sportishka.com، maxmassage.ru، اريت.رف
حوببي مەنتالدى ساۋلىققا قالاي اسەر ەتەدى؟
Nature Medicine جۋرنالىندا جاريالانعان زەرتتەۋ ناتيجەسى بويىنشا، ءحوببيى بار ادامدار دەپرەسسياعا سيرەك ۇشىرايدى جانە ومىردەن ءلاززات الۋعا بەيىم كەلەدى. عالىمدار 65 جاستان اسقان 93 مىڭنان استام ادامنىڭ ءومىرىن بىرنەشە جىل بويى باقىلاپ، حوببي ميدىڭ بەلسەندىلىگىن ارتتىرىپ، تۇراقتى پسيحيكالىق دەنساۋلىق پەن جوعارى ونىمدىلىككە ىقپال ەتەتىنىن انىقتاعان.
تاعى ءبىر زەرتتەۋدە (Discovery Inc.) حوببي ادامدارعا بەلگىسىزدىك الدىنداعى قورقىنىشتى جەڭۋگە كومەكتەسەتىنى ايتىلعان. حوببي مىناداي وڭ اسەر بەرەدى:
1. ءومىردى باقىلاۋدا ۇستاۋ
ءحوببيى جوق ادامداردىڭ تەك 17%-ى عانا ءوز ءومىرىن باقىلاۋدا ۇستاپ وتىرعانىن ايتسا، ءحوببيى بارلاردىڭ بۇل كورسەتكىشى – 23%، ال قىزىعۋشىلىعى وتە جوعارى جانداردا – 26%. بۇل كوبىنە ادامنىڭ ءبىر سالادا جاقسى دامىعان داعدىلارى مەن بىلىمىنە بايلانىستى.
2. وز-وزىنە دەگەن سەنىمدىلىك
ءحوببيى بار ادامداردىڭ 43%-ى ءوز شەشىمىنە سەنىمدى. بۇل سەنىم ۋاقىتتى ءتيىمدى باسقارۋمەن دە تىكەلەي بايلانىستى. ءحوببيى بار ادام ۋاقىتىن جوسپارلاۋعا دا بەيىم.
3. موتيۆاسيا مەن ءومىر ءمانى
ساۋالناماعا قاتىسقان ادامداردىڭ 90%-دان استامى حوببي ولارعا شابىت پەن ومىرگە دەگەن قۇشتارلىق سىيلايتىنىن ايتقان.
4. قوعاممەن بايلانىس
رەسپوندەنتتەردىڭ 60%-ى حوببي ارقىلى جاڭا دوستار تاپقانىن جانە الەۋمەتتىك شەڭبەرىنىڭ كەڭەيگەنىن جەتكىزگەن.
5. باقىت پەن وپتيميزم
ءحوببيى بار ادامدار ومىرگە وڭ كوزقاراسپەن قاراپ، ءوزىن باقىتتىراق سەزىنەدى.
حوببي تاڭداعاندا نەگە ءمان بەرۋ كەرەك؟
ءحوببيدى بەلسەندى جانە ءپاسسيۆتى دەپ ەكى توپقا بولۋگە بولادى.
بەلسەندى حوببي: سپورت، فيتنەس، بي، يوگا، ساياحات، فوتو-ۆيدەو ءتۇسىرۋ، بالىق اۋلاۋ.
ءپاسسيۆتى حوببي: كىتاپ وقۋ، كۋليناريا، تىگىنشىلىك، ءۇي جانۋارلارىنا كۇتىم، ءۇي وسىمدىكتەرى، ءتىل ۇيرەنۋ، ديزاين، قولونەر.
بۇل ورايدا ايتا كەتەتىن ءبىر كەڭەس، ەگەر جۇمىسىڭىز ءبىرسارىندى بولسا، قوزعالىستى قاجەت ەتەتىن حوببي تاڭداعان ءجون. ال كۇندەلىكتى بەلسەندى جۇمىس ىستەسەڭىز، كەرىسىنشە، تىنىش، شىعارماشىلىقپەن اينالىساتىن حوببي كومەكتەسەدى.
ستەرەوتيپتەرگە باعىنباعان ءجون
كوپشىلىك ءحوببيدى «ەرلەرگە» جانە «ايەلدەرگە» ءتان دەپ ءبولىپ جاتادى. پسيحولوگتار بۇل قاتە كوزقاراس ەكەنىن ايتادى. ءحوببيدىڭ جىنىسى بولمايدى – باستىسى، ادامنىڭ وزىنە ۇناۋى. ءوز قىزىعۋشىلىعىڭىزدى ەركىن تاڭداۋ – بۇل ىشكى ەركىندىك پەن سەنىمدىلىكتىڭ بەلگىسى.
قايدا بارۋعا بولادى؟
حوببيگە ارنالعان ۇيىرمەلەر مەن كۋرستار جايلى اقپاراتتى ينتەرنەتتەن، الەۋمەتتىك جەلىلەردەن، جەرگىلىكتى مادەنيەت ورتالىقتارىنىڭ سايتتارىنان تابۋعا بولادى.
دوستارىڭىز نەمەسە تانىستارىڭىزدان سۇراپ كورۋگە بولادى – ولاردىڭ اراسىندا سىزگە باعىت-باعدار بەرە الاتىندار تابىلىپ قالۋى مۇمكىن.
باستاعان ءىستى تاستاپ كەتپەگەن دۇرىس
جاڭا نارسە ۇيرەنۋ – ميعا جۇكتەمە تۇسىرەتىندىكتەن، ادامدا ءبارىن تاستاپ كەتكىسى كەلەتىن ساتتەر بولادى. بۇعان جول بەرمەس ءۇشىن:
• كىشكەنتاي قادامداردان باستاۋ قاجەت؛
• «2 مينۋت ەرەجەسى»: جاڭا ەرمەكتى باستاعىڭىز كەلمەسە دە، وزىڭىزگە «تەك 2 مينۋت اينالىسامىن» دەپ ۋادە بەرۋ؛
• كۇنتىزبەگە ۋاقىت بەلگىلەپ قويۋ؛
• قولداۋ بىلدىرەتىن ورتا تابۋ؛
• پروگرەستى ترەكەرمەن بەلگىلەپ وتىرۋ؛
• ناتيجە ءۇشىن ەمەس، پروسەستەن ءلاززات الۋ ءۇشىن اينالىسۋ؛
• قىمبات قۇرال-جابدىقتى بىردەن الماي، باستاپقىدا تەگىن رەسۋرستارمەن باستاۋ.
ەگەر ەكى-ۇش اپتا وتكەننەن كەيىن دە حوببي قىزىقسىز بولىپ كورىنسە — جاڭا نارسە بايقاپ كورۋگە بولادى. بۇل — قالىپتى پروسەسس.
ءحوببيدى تاعى ءبىر «جۇمىسقا» اينالدىرماڭىز
حوببي ەركىندىك سىيلاۋعا ءتيىس.
ونى ناقتى جوسپار، ماقسات، تابىس كوزىنە اينالدىرعان كەزدە مي ونى جۇمىس رەتىندە قابىلداي باستايدى. سودان كەيىن كۇيزەلىس قايتا ورالۋى مۇمكىن.
حوببي — ادامنىڭ وزىنە ارنالعان كەڭىستىگى. سول ءۇشىن ونى كەستە بويىنشا ەمەس، كوڭىلمەن جاساعان ءجون.
حوببي كومەكتەسپەي جاتسا، مامانعا جۇگىنىڭىز
ەگەر حوببي جۇمىستان باس الۋعا كومەكتەسپەسە، جانعا راحات سىيلاماسا، بۇل ادامنىڭ كۇيزەلىس دەڭگەيىنىڭ جوعارى بولۋى مۇمكىن ەكەنىن اڭعارتادى. مۇنداي جاعدايدا:
– دارۋمەن تاپشىلىعى؛
– ۇيقىنىڭ بۇزىلۋى؛
– پسيحولوگيالىق قيىندىقتار بولۋى ىقتيمال.
بۇل ماسەلەلەردى انىقتاپ، شەشۋ ءۇشىن ماماننىڭ كومەگىنە جۇگىنگەن ءجون.
حوببي — بۇل جاي ەرمەك قانا ەمەس. ول — ءومىردىڭ رەڭىن ارتتىرىپ، جۇمىس پەن تۇرمىستىڭ كۇيزەلىسىنەن ارىلۋعا كومەكتەسەتىن مىقتى قۇرال. باستىسى — وزىڭىزگە ۇنايتىن ءىستى تابۋ جانە ونى سۇيسىنە ورىنداۋ.