10 شىلدەدە تۇركى مادەنيەتى جانە مۇراسى قورىنىڭ شتاب-پاتەرىندە قور اپپاراتىنىڭ باسشىسى فاحري ۆالەوعلۋ گادجييەۆتىڭ «ازەربايجان مەن گرۋزيا اراسىنداعى قاتىناستار: ديپلوماتيالىق ميسسيالار قىزمەتى تۇرعىسىنان كوزقاراس (1918–1922 جج.)» اتتى كىتابىنىڭ تۇساۋكەسەرى ءوتتى.
ءىس-شارانىڭ اشىلۋىندا ءسوز سويلەگەن قور پرەزيدەنتى اقتوتى رايىمقۇلوۆا قاتىسۋشىلاردى جىلى قارسى الىپ، تۇركى مادەنيەتى جانە مۇراسى قورىنىڭ سوڭعى جىلدارى جۇزەگە اسىرعان ماڭىزدى جوبالارى، حالىقارالىق سەرىكتەستىك باعدارلامالارى جانە جاڭا باستامالارى تۋرالى جان-جاقتى اقپارات بەردى.
پروفەسسور رايىمقۇلوۆا ءوز سوزىندە اتالمىش ەڭبەكتىڭ تەك تاريحي زەرتتەۋ ەمەس، سونىمەن بىرگە حالىقتار اراسىنداعى مادەني بايلانىستاردى نىعايتاتىن ماڭىزدى قادام ەكەنىن اتاپ ءوتتى.
«ازەربايجان مەن گرۋزيا ءوزارا قۇرمەت پەن ستراتەگيالىق ارىپتەستىك نەگىزىندە عاسىرلار بويى قارىم-قاتىناس ورناتىپ كەلەدى»، – دەدى قور باسشىسى.
ول سونىمەن قاتار ەكى ەل اراسىنداعى ديپلوماتيالىق قاتىناستاردىڭ تاريحىن زەردەلەۋ ارقىلى ايماقتىڭ ورتاق مادەني جانە تاريحي مۇراسىن تەرەڭىرەك تانۋعا جول اشىلاتىنىن ايتتى. ءسوز سوڭىندا ول ازەربايجاندىق ديپلوماتتاردى كاسىبي مەرەكەلەرىمەن قۇتتىقتادى.
كىتاپقا جوعارى باعا بەرگەن قاتىسۋشىلار قاتارىندا — حالىقارالىق تۇركى اكادەمياسىنىڭ پرەزيدەنتى، اكادەميك شاحين مۋستافايەۆ؛ ازەربايجان رەسپۋبليكاسى ميللي ءماجىلىسىنىڭ دەپۋتاتى ريزۆان نابييەۆ؛ ازەربايجان ۇلتتىق عىلىم اكادەمياسى تاريح ينستيتۋتىنىڭ ديرەكتورى، كىتاپتىڭ عىلىمي رەداكتورى، تاريح عىلىمدارىنىڭ دوكتورى، پروفەسسور كارىم شۇكۇروۆ؛ ازەربايجان رەسپۋبليكاسىنىڭ تۇرىكمەنستانداعى توتەنشە جانە وكىلەتتى ەلشىسى گيسميات گەزالوۆ؛ سىرتقى ىستەر مينيسترلىگىنىڭ كادرلار باسقارماسىنىڭ باسشىسى رامان مامەدوۆ؛ قورعانىس مينيسترلىگىنىڭ وكىلى ەلدجان يمامۆەردييەۆ؛ فيلولوگيا عىلىمدارىنىڭ دوكتورى، پروفەسسور باديرحان احمەدلي؛ تاريح عىلىمدارىنىڭ دوكتورى، پروفەسسور، ەڭبەك سىڭىرگەن عىلىم قايراتكەرى سولماز توحيدي-رۋستاموۆا جانە پروفەسسور اسيف گادجيلى بولدى.
ءسوز سويلەگەندەر بۇل مونوگرافيانىڭ ازەربايجاندىق جانە جالپى تۇركى تاريح عىلىمىنا قوسقان ۇلەسى زور ەكەنىن ەرەكشە اتاپ ءوتتى. ولار سونداي-اق قور پرەزيدەنتى اقتوتى رايىمقۇلوۆاعا ازەربايجان ديپلوماتيالىق مۇراسىنا كورسەتكەن قولداۋى ءۇشىن العىستارىن ءبىلدىردى. بۇل باعىتتاعى زەرتتەۋ جۇمىستارىن جالعاستىرۋدىڭ ماڭىزدىلىعى دا باسا ايتىلدى.
ءىس-شاراعا ازەربايجان رەسپۋبليكاسىندا اككرەديتتەلگەن ديپلوماتيالىق كورپۋس وكىلدەرى، مەملەكەتتىك ورگانداردىڭ قىزمەتكەرلەرى، عىلىم مەن مادەنيەت قايراتكەرلەرى، قوعامدىق-ساياسي سالا وكىلدەرى جانە ب ا ق وكىلدەرى قاتىستى.