شىمكەنتتە كىسى قولىنان قازا بولعان 21 جاستاعى ستۋدەنتتىڭ اعاسى سۇلتان سەرىكباي پرەزيدەنت قاسىم-جومارت توقايەۆقا العىس ايتتى، - دەپ حابارلايدى aqshamnews.kz ءتىلشىسى Tengrinews.kz-كە سىلتەمە جاساپ.
مارقۇمنىڭ اعاسى بۇل تۋرالى Threads-پاراقشاسىندا جازدى.
"پرەزيدەنتىمىزگە مىڭ العىس! كوپ نارسە ايتقىم كەلەدى، ءبىراق ءدال ءقازىر ەمەس. ۋاقىتى كەلە تولىقتاي بۇكىل جاعدايدى ايتىپ بەرەتىن بولامىن. ءقازىر بىزگە ەڭ باستىسى "سوت" پروسەسىنىڭ ءادىل جانە ونلاين فورماتتا ءوتۋى. سەنەمىن"، – دەپ جازدى ول.
ەسكە سالايىق، مەملەكەت باسشىسى قاسىم-جومارت توقايەۆ قىزىلوردادا وتكەن ۇلتتىق قۇرىلتاي وتىرىسىندا نۇراي سەرىكبايدىڭ ولىمىنە بايلانىستى قايعىلى وقيعاعا نازار اۋدارعان بولاتىن. پرەزيدەنتتىڭ سوزىنشە، وسى وقيعا بويىنشا 130-دان اسا ءوتىنىش كەلىپ تۇسكەن.
"كۇدىكتىنىڭ نۇرايدى اڭدىپ، مازا بەرمەي، قوقان-لوقى كورسەتكەنى انىقتالىپ وتىر. اقىرى، مۇنىڭ ارتى ادام ولىمىنە اكەپ سوقتىردى.
وسىعان بايلانىستى ىشكى ىستەر مينيسترىنە شىمكەنت قالالىق دەپارتامەنتىنىڭ ارەكەتىنە قۇقىقتىق باعا بەرۋدى تاپسىردىم. باس پروكۋرور دا بۇل ماسەلەنى مۇقيات تەكسەرەدى"، - دەدى مەملەكەت باسشىسى.
بۇدان كەيىن شىمكەنت پوليسياسىنىڭ باستىعى نۇرلان الماسبەكوۆ جۇمىسىنان بوساتىلعانى بەلگىلى بولدى.
ايتا كەتەيىك، 11 قاڭتار شىمكەنتتە پىشاق جاراقاتتارىنان 21 جاستاعى ستۋدەنت نۇراي قازا تاپتى. پوليسيا ادام ءولتىرۋ دەرەگىن راستادى جانە قىلمىستىق ءىس قوزعادى. كۇدىكتى - مارقۇمنىڭ تانىسى، ول ۇستالدى.