ورتالىق كوممۋنيكاسيالار قىزمەتىنىڭ الاڭىندا وتكەن بريفينگ بارىسىندا الماتى قالاسىنىڭ اكىمى دارحان ساتىبالدى ءتۋريزمدى دامىتۋداعى نەگىزگى قيىندىق – تۋريستەرگە ارنالعان ينفراقۇرىلىمنىڭ جەتكىلىكسىزدىگىنەن بولىپ وتىرعانىن مالىمدەدى.
اكىمنىڭ ايتۋىنشا، الماتى تاۋ كلاستەرىنە كۇن سايىن كەلەتىندەردىڭ سانى ونىڭ ءبىر مەزەتتە قابىلداي الاتىن شەكتى مولشەرىنەن كوپ. 2025 جىلى ىلە-الاتاۋ ۇلتتىق پاركىنە 901 مىڭ تۋريست كەلسە، "شىمبۇلاق" كۋرورتىنا 1،1 ملن ادام بارعان. دەمالىس جانە مەرەكە كۇندەرى كەلۋشىلەر سانى تاۋلىگىنە 15 مىڭ ادامعا دەيىن جەتىپ، بۇل تراسسا مەن اسپالى جولدارعا شامادان تىس جۇكتەمە ءتۇسىرىپ، قىزمەت كورسەتۋ ساپاسىنىڭ تومەندەۋىنە الىپ كەلەدى.
"وسى ماسەلەلەردى شەشۋ ءۇشىن "شىمبۇلاق" پەن "وي-قاراعاي" كۋرورتتارىن اسپالى جول ارقىلى بىرىكتىرەتىن الماتى تاۋ كلاستەرىن دامىتۋ جوباسى جۇزەگە اسىرىلىپ جاتىر. جوبا شەتەلدىك تۋريستەر سانىن 1 ملن ادامعا دەيىن ارتتىرۋعا مۇمكىندىك بەرەدى، ال قالانىڭ ەكونوميكاسىنا جىل سايىنعى ۇلەس 300 ملرد تەڭگە كولەمىندە كىرىس اكەلەدى دەپ باعالانىپ وتىر. سونىمەن قاتار الماتى حالىقارالىق اۋەجايىن جاڭعىرتۋ جۇمىستارى باستالدى. بۇل جوباعا 362 ميلليون دوللار كولەمىندە ينۆەستيسيا تارتىلىپ، اۋەجايدىڭ جولاۋشى قابىلداۋ مۇمكىندىگى 19 ميلليون ادامعا دەيىن ارتادى. بۇعان قوسا، قالادا 3 664 نومىرگە ارنالعان قوناق ۇيلەر مەن تۋريستىك نىسانداردى سالۋ بويىنشا 25 جوبا جۇزەگە اسىرىلىپ جاتىر"، – دەدى دارحان ساتىبالدى.