وكق الاڭىندا وتكەن بريفينگ بارىسىندا الماتى قالاسىنىڭ اكىمى دارحان ساتىبالدى تۇرعىنداردىڭ تۇرمىس ساپاسىن ارتتىرۋعا جانە جاستاردى قولداۋعا باعىتتالعان الەۋمەتتىك ينفراقۇرىلىمدى دامىتۋ جونىندە قابىلدانىپ جاتقان شارالار تۋرالى مالىمدەدى.
اكىمنىڭ ايتۋىنشا، ءبىلىم بەرۋ ينفراقۇرىلىمىن دامىتۋعا ەرەكشە كوڭىل بولىنگەن. 2025 جىلى قالادا 37،1 مىڭ ورىنعا ارنالعان 22 ءبىلىم بەرۋ نىسانى سالىندى. بۇل جوبالاردى ىسكە اسىرۋ كەلەسى وقۋ جىلىنىڭ باسىنا قاراي وقۋشى ورىندارىنىڭ تاپشىلىعىن 29،7 مىڭنان 3-4 مىڭعا دەيىن قىسقارتۋعا مۇمكىندىك بەرەدى.
سونداي-اق الماتى اكىمى دەنساۋلىق ساقتاۋ سالاسىنىڭ دامۋىنا دا توقتالدى. 2025 جىلى بۇل سالانى قارجىلاندىرۋ 25%-عا ارتىپ، 48،8 ملرد تەڭگەگە جەتتى. جىل ىشىندە الماتىدا مەديسينالىق-سانيتارلىق العاشقى كومەك كورسەتەتىن 2 ورتالىق جانە 1 ەمحانا سالىندى. بۇدان بولەك، اۋرۋحانالار، پەرزەنتحانالار، ەمحانالار مەن سپيد ورتالىقتارىن قوسقاندا، تاعى 32 نىساندى سالۋ جانە جاڭعىرتۋ جوبالارى پىسىقتالىپ جاتىر. جەدەل مەديسينالىق جاردەم قىزمەتىنىڭ اۆتوپاركى 37%-عا جاڭارتىلدى، – دەپ مالىمدەدى دارحان ساتىبالدى.
سونىمەن قاتار الماتى اكىمى دارحان ساتىبالدى بريفينگ بارىسىندا ايتىلعان قوعامدىق دەنساۋلىق كورسەتكىشتەرىندەگى وڭ سەرپىنگە دە ەرەكشە توقتالدى.
"وسى جىلدىڭ 11 ايىنىڭ قورىتىندىسى بويىنشا انا ءولىمى 48،2%-عا، نارەستە ءولىمى 5،4%-عا، ال ونكولوگيالىق اۋرۋلاردان بولاتىن ءولىم-جىتىم 16%-عا تومەندەدى"، – دەدى قالا اكىمى.
اكىمنىڭ ايتۋىنشا، جاستار ساياساتى دا نازاردان تىس قالمادى.
"ەلىمىزدىڭ بولاشاعى – جاڭا بۋىن. ءبىز ولاردىڭ ءبىلىم الۋىنا جانە جۇمىسپەن قامتىلۋىنا ايرىقشا ءمان بەرەمىز"، – دەدى دارحان ساتىبالدى.
2025 جىلى الماتىدا 11 كوميۋنيتي ورتالىق جانە 4 "Narco-STOP" ورتالىعى اشىلدى، سونداي-اق 33 دەمالىس ورتالىعى جاڭعىرتىلدى. ستۋدەنتتىك جاتاقحانالاردا 8 مىڭنان استام ورىن جاساقتالدى. "الماتى جاستارى" باعدارلاماسى اياسىندا ءبىلىم بەرۋ، دەنساۋلىق ساقتاۋ، عىلىم، مادەنيەت، سپورت جانە جۋرناليستيكا سالالارىندا ەڭبەك ەتەتىن مامانداردى قوسقاندا، 2 200 ادامعا تۇرعىن ۇيگە ارنالعان نەسيە بەرىلدى.
سونىمەن قاتار قالادا 3 شىنىقتىرۋ-ساۋىقتىرۋ كەشەنى اشىلىپ، كوشە سپورت تۇرلەرىنە ارنالعان 50 نىسان سالىندى. كەشەندى شارالاردى ىسكە اسىرۋ ناتيجەسىندە NEET ساناتىنداعى جاستاردىڭ ۇلەسى 8،3%-دان 6،4%-عا دەيىن تومەندەدى، – دەپ مالىمدەدى الماتى اكىمى.