الماتى ءۇشىن ەكولوگيالىق كۇن ءتارتىبى باسىم باعىت سانالادى جانە ول تۇرعىنداردىڭ تۇرمىس ساپاسىن ارتتىرۋ مەن ورنىقتى مەگاپوليس قالىپتاستىرۋدىڭ نەگىزگى شارتى رەتىندە قاراستىرىلادى. بۇل تۋرالى ورتالىق كوممۋنيكاسيالار قىزمەتىنىڭ الاڭىندا وتكەن بريفينگ بارىسىندا الماتى قالاسىنىڭ اكىمى دارحان ساتىبالدى مالىمدەدى.
اكىمنىڭ ايتۋىنشا، 2026 جىلدىڭ سوڭىنا دەيىن 2-جەو-نى تابيعي گازعا كوشىرۋ جۇمىستارى اياقتالادى. كەلەسى كەزەڭدە بۋ-گاز تەحنولوگياسىن ەنگىزە وتىرىپ، 3-جەو-تى قايتا جاڭعىرتۋ جوسپارلانعان. بۇل جىلۋ كوزدەرىنەن شىعاتىن زياندى زاتتار كولەمىن 92%-عا دەيىن ازايتۋعا مۇمكىندىك بەرەدى.
2027 جىلعا قاراي جەكە تۇرعىن ۇيلەر 100% تابيعي گازبەن قامتىلادى. ال 2028 جىلعا قاراي قالالىق باعىتتاردا ەكولوگيالىق تازا قوعامدىق كولىككە تولىق كوشۋ جوسپارلانعان. بۇل اۋا ساپاسىن جاقسارتىپ، قالانىڭ تۇراقتى دامۋىنا جول اشاتىن ماڭىزدى قادام بولماق.
"ءبىز قالدىقتاردى باسقارۋ جۇيەسىن جەتىلدىرىپ، پوليگونداردا كومۋ تاجىريبەسىنەن تەرەڭ وڭدەۋ مەن ەنەرگيا ءوندىرۋ ارقىلى كادەگە جاراتۋعا كوشەمىز. الماتىدا قالدىقتاردى باسقارۋ سالاسى كومۋ تاسىلىنەن تەرەڭ وڭدەۋ جانە ەنەرگەتيكالىق كادەگە جاراتۋعا كەزەڭ-كەزەڭىمەن اۋىسىپ جاتىر. جىلىنا 80 مىڭ تونناعا دەيىن پلاستيك وڭدەيتىن جانە جىلىنا 150 مىڭ توننا ماكۋلاتۋرانى وڭدەيتىن زاۋىتتار سالۋ جوسپارلانعان. قايتا وڭدەۋگە جارامسىز قالدىقتار ەنەرگيا ءوندىرۋ ءۇشىن جاعىلادى. ول ءۇشىن تاۋلىگىنە 2 مىڭ توننا قالدىقتى ورتەيتىن قوقىس جاعۋ زاۋىتىن سالۋ كوزدەلىپ وتىر. اتالعان شارالاردى ىسكە اسىرۋ 2030 جىلعا قاراي كوممۋنالدىق قالدىقتاردى وڭدەۋ جانە كادەگە جاراتۋ ۇلەسىن 37% پايىزعا دەيىن ارتتىرۋعا مۇمكىندىك بەرەدى"، – دەپ مالىمدەدى دارحان ساتىبالدى.