قازاقستاننىڭ 4 ازاماتى ميانما ەلىندە قۇلدىقتا بولعان.
ولار سىرتقى ىستەر مينيسترلىگىنىڭ ارالاسۋىمەن، ەلگە قايتارىلدى، دەپ حابارلايدى aqshamnews.kz El.kz اقپارات اگەنتتىگىنە سىلتەمە جاساپ.
Dunyo باسىلىمنىڭ مالىمەتىنشە، وزبەكستاننىڭ باس كونسۋلدىعىنا 2000 جىلعى جانە 1997 جىلعى ەكى ازامات حابارلاسىپ، وزدەرىنىڭ ميانمادا ادام ساۋداسىنىڭ قۇربانى بولعانىن ايتىپ كومەك سۇراعان.
وزبەكستاندىق ازاماتتارعا تايلاندتا جوعارى جالاقىسى بار جۇمىس ۇسىنىلعان. ازامتتار كەلىسكەن سوڭ، ولارعا وزبەكستاننان-تايلاندقا ۇشاققا تەگىن بيلەت بەرىلگەن. ءبىراق بۇل ەلگە كەلگەن سوڭ، ولار زاڭسىز ميانما ەلىنە جەتكىزىلىپ، ادام ساۋداسىمەن اينالىساتىن قىلمىستىق توپتىڭ قولىن تۇسكەن. ول جەردە قۇلدىقتاعى ازاماتتاردى الاياقتىقپەن اينالىساتىن كولل-ورتالىقتاردا جۇمىس ىستەۋگە ماجبۇرلەگەن. بۇل جۇمىستى اتقارۋدان باس تارتقاندار سوققىعا ۇشىراپ وتىرعان. ال ولاردىڭ قۇلدىقتان بوساپ، ۇيلەرىنە ورالۋى ءۇشىن قىلمىستىق توپ قوماقتى قاراجات تالاپ ەتكەن.
قىلمىستىق توپ قازاقستاننىڭ 4 ازاماتىن، قىرعىزستاننىڭ 8 ازاماتىن، وزبەكستاننىڭ 2 ازاماتىن قۇلدىقتا ۇستاپ كەلگەنى انىقتالعان. تايلاندتا قىرعىزستاننىڭ ەلشىلىگى بولماۋى سەبەپتى بۇل ەلدىڭ ازاماتتارىنىڭ قايتارىلۋىنا قازاقستان مەن وزبەكستاننىڭ كونسۋلدىقتارى كومەكتەسكەن.
ميانما مەن تايلاندتىڭ قۇزىرلى ورگاندارىمەن كەلىسىلگەن ءىس-قيمىلدار مەن كەلىسسوزدەر ناتيجەسىندە وزبەكستان، قازاقستان جانە قىرعىزستان ازاماتتارى بوساتىلىپ، ماەسوت (تايلاند) شەكارالىق وتكىزۋ پۋنكتىندە وزبەكستان مەن قازاقستان ديپلوماتتارىنا تاپسىرىلدى، ولار ۋاقىتشا باسپانامەن جانە ازىق-تۇلىكپەن قامتاماسىز ەتىلدى، – دەپ حابارلاعان وزبەكستاننىڭ سىرتقى ىستەر مينيسترلىگى.
ال 11 ساۋىردە وزبەكستان مەن قازاقستاننىڭ تايلاندتاعى ديپلوماتيالىق وكىلدىكتەرىنىڭ كومەگىمەن وزبەكستاننىڭ 2 ازاماتى، قازاقستاننىڭ 4 ازاماتى جانە قىرعىزستاننىڭ 7 ازاماتى وتانىنا ورالعان.