اتوم ەلەكتر ستانسياسىن سالۋ ماسەلەسىنە قاتىستى تالقىلاۋلاردىڭ ماڭىزى وتە جوعارى.
بۇل تالقىلاۋلار «اەس نە ءۇشىن سالىنىپ جاتىر، ول كىمگە كەرەك، مەملەكەتىمىز بەن قوعامعا قانداي پايدا اكەلەدى؟» دەگەن ماڭىزدى سۇراقتارعا جاۋاپ بەرەدى. حالىقتى تولعاندىرعان ساۋالدارعا ماماندار ناقتى جانە تياناقتى جاۋاپ بەرىپ وتىر. ەڭ باستىسى، بارلىعى رەفەرەندۋمنىڭ ناتيجەسىنە بايلانىستى. حالىقتىڭ شەشىمى – ءبىرىنشى ورىندا.
ءبىزدىڭ ۋنيۆەرسيتەتىمىز، ءال-فارابي اتىنداعى قازۇۋ، اەس بويىنشا بىلىكتى ماماندار دايىنداۋعا قابىلەتتى. جاقىندا ءبىز «يادرولىق ينجەنەريا» ماماندىعىن اشتىق. وعان ستۋدەنتتەر قابىلداندى جانە ولار ءتورت جىل بويى ءبىلىم الادى. العاشقى ەكى جىلدا ستۋدەنتتەر ۋنيۆەرسيتەتتە تەوريالىق ءبىلىم السا، قالعان ەكى جىلدا يادرولىق فيزيكا ينستيتۋتىندا تاجىريبەدەن وتەدى. بۇل ينستيتۋتتا زەرتتەۋ رەاكتورى بار، سوندىقتان ستۋدەنتتەر سول جەردە پراكتيكالىق بىلىمدەرىن جەتىلدىرىپ، ناقتى تاجىريبە جيناقتايدى.
قازاقستاندا كەڭەس وداعى كەزىنەن بەرى بىرنەشە رەاكتور بار جانە ولاردى مودەرنيزاسيالاۋ جۇمىستارى جۇرگىزىلۋدە. وسى رەاكتورلاردا جۇمىس ىستەگەن مامانداردىڭ بارلىعى اەس سالۋ جاعدايىندا دا دايىن بولادى. ەگەر اەس سالۋ تۋرالى شەشىم قابىلدانسا، قۇرىلىس جۇمىستارىنىڭ ءوزى 8–10 جىل ۋاقىتتى تالاپ ەتەدى. وسى ۋاقىت ارالىعىندا قوسىمشا اەس ماماندارىن دايىنداۋ قاجەتتىگى تۋىندايدى. ءبىز ولاردى ناقتى باعىتتار بويىنشا دايارلايمىز.
8 جىل – بىلىكتى مامانداردى دايىنداۋعا جەتكىلىكتى ۋاقىت دەپ ەسەپتەيمىن. قازىرگى تاڭدا اەس سالۋ ماسەلەسى تەك ەنەرگەتيكالىق قاۋىپسىزدىككە قاتىستى ەمەس، سونىمەن قاتار ەلىمىزدىڭ عىلىمي-تەحنيكالىق الەۋەتىن دامىتۋ ءۇشىن دە ماڭىزدى. وسى ورايدا، بىزگە بىلىكتى كادرلار قاجەت، ال ولاردى دايىنداۋ ءبىزدىڭ قولىمىزدا.
سوندىقتان شەشىم قابىلدانعاننان كەيىن، ەلدىڭ بولاشاعى ءۇشىن جاڭا ەنەرگەتيكالىق كەزەڭگە دايىن بولۋىمىز كەرەك. حالىقتىڭ پىكىرى مەن قولداۋى بۇل ماسەلەدە باستى ءرول اتقارادى، ويتكەنى اەس – تەك ەنەرگەتيكالىق قادام ەمەس، ۇلتتىڭ ۇزاق مەرزىمدى دامۋ ستراتەگياسىنىڭ ءبىر بولىگى.