الماتى اكىمى دارحان ساتىبالدى جۇمىس ساپارى بارىسىندا CHAMP1ON سپورت كەشەنىن جانە قازاقستان رەسپۋبليكاسىنىڭ ۇلتتىق كىتاپحاناسىن ارالاپ كوردى.
CHAMP1ON سپورت كەشەنى ءجۇزۋ، باسكەتبول، فيتنەس جانە ترياتلونمەن اينالىسۋعا بارلىق جاعداي جاسالعان زاماناۋي ورتالىق. مۇندا 50-دەن استام كاسىبي سپورتشىدان تۇراتىن قۇراما كوماندالار دايىندالادى. سوڭعى جىلدارى ورتالىق سپورتشىلارى قالالىق، رەسپۋبليكالىق جانە حالىقارالىق جارىستاردا 90-نان استام مەدال يەلەنىپ، 10 ۇمىتكەر سپورت شەبەرى دارەجەسىنە جەتتى. ال 3 سپورتشى قازاقستاننىڭ ترياتلون بويىنشا ۇلتتىق قۇراماسىنا ەندى.
كەشەن بازاسىندا MY WIN اتتى قايىرىمدىلىق جوباسى جۇزەگە اسىرىلىپ جاتىر. جوبا اياسىندا 3 مىڭنان استام بالا مەن ءجاسوسپىرىم سپورتپەن شۇعىلدانىپ، قابىلەتىن دامىتا الدى.
ۇلتتىق كىتاپحانا ەلىمىزدىڭ ەڭ ءىرى مادەني ءارى عىلىمي ورتالىعى، تاريحى 1910 جىلدان باستاۋ الادى. مۇندا ۇلتتىق كىتاپ قورى ساقتالىپ، زاماناۋي سيفرلىق سەرۆيستەر ەنگىزىلىپ، قالا تۇرعىندارىنىڭ ءبىلىم الىپ، مادەنيەتىن دامىتۋعا جاعداي جاسالىپ وتىر.
«قالانىڭ ءار اۋدانىندا، اسىرەسە جاستار ءۇشىن زاماناۋي ءارى قولجەتىمدى سپورتتىق جانە مادەني كەڭىستىكتەردىڭ بولۋى ماڭىزدى. سپورت ينفراقۇرىلىمىن دامىتۋ مەن ۇلتتىق كىتاپحانا سياقتى مادەني مەكەمەلەردى قولداۋ - بەلسەندى، ءبىلىمدى جانە مىقتى ۇرپاق قالىپتاستىرۋدىڭ نەگىزى»، — دەدى دارحان ساتىبالدى.
قالا باسشىسى ءتيىستى باسقارمالارعا سپورتتىق، مادەني جانە دەمالىس ورىندارىن ودان ءارى دامىتىپ، الماتىلىقتاردىڭ ءوزىن-وزى دامىتۋى مەن بەلسەندى ءومىر سالتىنا قولايلى جاعداي جاساۋ جونىندە تاپسىرما بەردى.