المالى اۋدانىندا ءبىرقاتار مەديسينالىق نىسانداردا جوندەۋ جۇمىستارى اياقتالىپ، جاڭا پەرزەنتحانانىڭ قۇرىلىسىنا دايىندىق باستالدى. الماتى قالاسى وڭىرلىك كوممۋنيكاسيالار قىزمەتىندە اۋدان اكىمى ارمان شامشين دەنساۋلىق ساقتاۋ ينفراقۇرىلىمىن دامىتۋدىڭ بارىسى تۋرالى ايتتى.
قازىرگى تاڭدا اۋداندا 25 مەديسينالىق ۇيىم جۇمىس ىستەيدى، ونىڭ 12ء-سى مەملەكەتتىك، 13ء-ى جەكە مەنشىك مەكەمە.
2025 جىلى №3 قالالىق ەمحانانىڭ كۇردەلى جوندەۋ جۇمىستارى تولىق اياقتالىپ، مەكەمە تۇرعىنداردى قابىلداۋدى باستادى. سونىمەن قاتار قالالىق ادام رەپرودۋكسياسى ورتالىعىنىڭ ەكى كورپۋسى جاڭعىرتىلدى.
قۇنى 11،5 ملرد تەڭگە بولاتىن №1 قالالىق پەرزەنتحانانىڭ قۇرىلىسى بويىنشا جوبا دايىندالىپ جاتىر. قۇرىلىس 2025 جىلدىڭ سوڭىنا تامان بستالىپ، 2026 جىلدىڭ ءتورتىنشى توقسانىنا اياقتالماق. قۇرىلىس كەزەڭىندە ورتالىقتىڭ بولىمشەلەرى ۋاقىتشا الەۋمەتتىك قورعاۋ سالاسىنداعى باقىلاۋ كوميتەتى دەپارتامەنتىنىڭ عيماراتىندا ورنالاستىرىلادى.
سونىمەن قاتار، قالالىق بالالاردى وڭالتۋ ورتالىعىن قۇرۋ جوباسى جۇزەگە اسىرىلا باستادى. تەحنيكالىق تەكسەرۋدەن كەيىن جوبا قوسىمشا مەملەكەتتىك ساراپتامادان ءوتىپ، تۇزەتىلىپ جاتىر.
«جاڭارتىلعان پارامەترلەرگە سايكەس جوبالىق-سمەتالىق قۇجاتتاما ناقتىلانۋدا. بۇل جوبا بالالارعا جاڭا ءارى ارنايى جابدىقتالعان جاعدايدا وڭالتۋ قىزمەتتەرىن الۋعا مۇمكىندىك بەرەدى»، – دەپ اتاپ ءوتتى ارمان شامشين.
اۋداندا رايىمبەك داڭعىلى بويىندا ەرەكشە قاجەتتىلىكتەرى بار ادامدارعا ارنالعان سپورتتىق-وڭالتۋ ورتالىعىنىڭ قۇرىلىسى دا جۇرگىزىلىپ جاتىر. نىساندى 2026 جىلدىڭ قاراشاسىندا پايدالانۋعا بەرۋ جوسپارلانعان. ورتالىق فيزيكالىق قالپىنا كەلتىرۋ، بەيىمدەلگەن سپورت جانە ساۋىقتىرۋ باعدارلامالارىنا ارنالعان كوپفۋنكسيالى الاڭعا اينالماق.
نەگىزگى جوبالاردىڭ ءبىرى – ايتەكە بي مەن ماسانچي كوشەلەرىنىڭ قيىلىسىندا ورنالاسقان تاۋلىگىنە 500 ادام قابىلدايتىن جاڭا قالالىق ەمحانا قۇرىلىسى. جوبا 2025 جىلعى 14 ساۋىردە ساراپتامانىڭ وڭ قورىتىندىسىن الدى. قازىرگى ۋاقىتتا نىساندا بۇزۋ جۇمىستارى اياقتالىپ، قۇرىلىس-مونتاج جۇمىستارى 2025 جىلعى قاراشا ايىندا باستالادى. ەمحانانى 2026 جىلدىڭ ءتورتىنشى توقسانىندا پايدالانۋعا بەرۋ جوسپارلانعان.
اۋدان اكىمدىگى تۇرعىندارعا قولجەتىمدى ءارى ساپالى مەديسينالىق قىزمەت كورسەتۋ ءۇشىن ينفراقۇرىلىمدىق جوبالاردى دايەكتى تۇردە جۇزەگە اسىرۋدى جالعاستىرىپ كەلەدى.