ەتتىڭ قۇنى ەندى وسپەيدى. ءقازىردىڭ وزىندە باعا تۇراقتى ءارى جاقىن ارادا قىمباتتاۋى ەكىتالاي. الاڭداعان جۇرتقا اۋىل شارۋاشىلىعى ءمينيسترى باسۋ ايتتى، - دەپ حابارلايدى aqshamnews.kz ءتىلشىسى "كتك" تەلەارناسىنا سىلتەمە جاساپ.
ايداربەك ساپاروۆتىڭ ايتۋىنشا، بۇعان دەيىن ەت باعاسىنىڭ قىمباتتاۋىنا شەتەلدىك سۇرانىستىڭ ارتۋى سەبەپ بولعان. ءقازىر بۇل ءۇردىس توقتاپ، جاعداي تۇراقتالىپتى. ءدال وسىنداي سەبەپپەن بىلتىر كارتوپ تا قىمباتتاعان. بيىل كارتوپ ءونىمى 3 ميلليون تونناعا كوبەيىپ، كوكونىس، بيداي جانە باقشا داقىلدارى دا مول جينالدى دەيدى اۋىل شارۋاشىلىعى ءمينيسترى.
ەلدە ازىق-تۇلىك قورى جەتكىلىكتى. ەندى ءوڭىر اكىمدىكتەرى تۇراقتاندىرۋ قورىن دەر كەزىندە تولىقتىرىپ، قىس پەن كوكتەمدە تاپشىلىقتى بولدىرماۋعا ءتيىس. بۇل بازار مەن دۇكەندەردەگى باعانى ۇستاپ تۇرۋعا مۇمكىندىك بەرەدى دەپ وتىر مينيستر.
"بىلتىر باعا كوتەرىلگەندە، وزدەرىڭىز بىلەسىزدەر، سۇرانىس شەت مەملەكەتتەردەن بولىپ، باعا كوتەرىلىپ كەتتى. شىنىندا بولماعان ەكسپورت، تاعى دا قايتالاپ ايتايىن، 600 مىڭنان ارتىق ەسكپورت بولدى. سوندىقتان ءبىز ىشكى نارىقتى جابا باستادىق. ال ەندى سونى بىلە تۇرا، ءبىز بيىل كارتوپ سالاتىن جەردى كوبەيتىپ، بيىل قوسىمشا 2 ملن 900 مىڭ توننا كارتوپ الىپ وتىرمىز"، - دەدى اۋىل شارۋاشىلىعى ءمينيسترى ايداربەك ساپاروۆ.