الماتى قالاسىندا ءبىلىم بەرۋ ينفراقۇرىلىمىن دامىتۋ بويىنشا جۇيەلى جۇمىستار ىستەلىپ جاتىر. وڭىرلىك كوممۋنيكاسيالار قىزمەتىنىڭ الاڭىندا المالى اۋدانى اكىمى ارمان شامشين وسىلاي دەپ حابارلادى.
اۋدان اكىمىنىڭ ايتۋىنشا، المالى اۋدانىنداعى 48 مەكتەپتە 39 182 وقۋشى ءبىلىم الىپ جاتىر. ونىڭ ىشىندە 30 مەملەكەتتىك مەكتەپتە – 34 892، 18 جەكەمەنشىك مەكتەپتە – 4 290 وقۋشى وقيدى.
2025 جىلى ءبىرقاتار ءىرى جوبالار جۇزەگە اسىرىلدى:
* 1 500 ورىندىق جاڭا جايلى مەكتەپ سالىندى؛ (№216)
* 2 500 بالاعا ارنالعان «شابىت» قوسىمشا ءبىلىم بەرۋ ورتالىعى اشىلدى.
قازىرگى تاڭدا №58 مەكتەپكە 600 ورىندىق قوسىمشا عيمارات سالۋ جانە قايتا جاڭارتۋ جۇمىستارى جۇرگىزىلىپ جاتىر، ولاردى 2025 جىلدىڭ جەلتوقسانىندا اياقتاۋ جوسپارلانعان.
سونىمەن قاتار 2025 جىلدىڭ شىلدە ايىندا №16 مەكتەپكە 300 ورىندىق قوسىمشا عيماراتتىڭ قۇرىلىسى باستالدى، ونى كەلەسى جىلى اياقتاۋ كوزدەلىپ وتىر.
2025 جىلدىڭ تامىز ايىندا №124 مەكتەپتى جاڭعىرتۋ جۇمىستارى باستالدى، جوبانىڭ اياقتالۋى 2026 جىلعا جوسپارلانعان.
قوسىمشا №128، №134 جانە №135 مەكتەپتەرىن سەيسميكالىق تۇرعىدان كۇشەيتۋ بويىنشا جوبالىق-سمەتالىق قۇجاتتاما ازىرلەنىپ جاتىر.
مەكتەپكە دەيىنگى ءبىلىم بەرۋ سالاسى بويىنشا اۋداندا 62 بالاباقشا جۇمىس ىستەيدى، وندا 8 168 بالا تاربيەلەنەدى. ونىڭ ىشىندە 27 مەملەكەتتىك جانە 33 جەكەمەنشىك بالاباقشا بار، سونىڭ 28ء-ى مەملەكەتتىك تاپسىرىس اياسىندا قىزمەت كورسەتەدى.
بيىل №13، №21، №43 بالاباقشالار مەن مەملەكەتتىك مەنشىككە قايتارىلعان «تەرەموك» بالاباقشاسىن (ماۋلەنوۆ كوشەسى، 57) جوندەۋ جانە سەيسميكالىق كۇشەيتۋ بويىنشا قۇجاتتاما دايىندالىپ جاتىر.
سونىمەن قاتار №10 بالاباقشانى قايتا جاڭارتۋ جۇمىستارى ءجۇرىپ جاتىر، ول 2026 جىلدىڭ ماۋسىمىندا اياقتالادى.
تاستاق ىقشاماۋدانىندا دا 240 ورىندىق جاڭا بالاباقشا سالۋ جوباسى بويىنشا كونكۋرسقا دايىندىق جۇرگىزىلۋدە، نىساندى 2026 جىلدىڭ شىلدەسىندە اياقتاۋ جوسپارلانعان. بۇعان قوسا، اۋدانداعى 13 بالاباقشادا جوندەۋ جۇمىستارى قولعا الىندى.
اۋدان اكىمدىگى المالى تۇرعىندارى ءۇشىن ساپالى ءبىلىم بەرۋ ينفراقۇرىلىمىن دامىتىپ، بالالارعا ءقاۋىپسىز جانە جايلى جاعداي جاساۋ باعىتىنداعى جۇمىستاردى جۇيەلى تۇردە جالعاستىرىپ كەلەدى.