ەلوردادا Astana Media Week مەديا اپتالىعى باستالدى، - دەپ حابارلايدى aqshamnews.kz ءتىلشىسى.
5–7 قاراشا كۇندەرى استانادا ورتالىق ازياداعى ەڭ ءىرى مەديا ءىس-شارا "Astana Media Week 2025" وتەدى. بيىل "ۇلتقا قىزمەت ەتۋ – مەديا ميسسياسى" تاقىرىبى اياسىندا مەديا ماماندار، حالىقارالىق سەرىكتەستەر جانە مەملەكەتتىك ۇيىمدار جينالىپ، وي قوزعايدى.
ءۇش كۇن بويى قاتىسۋشىلار ءۇشىن مەدياەتيكا، دەرەكتى فيلم، جاساندى ينتەللەكتپەن جۇمىس جاساۋ، يميدج قالىپتاستىرۋ، سيفرلىق كوممۋنيكاسيالار، داتا-جۋرناليستيكا جانە جۋرناليستەردىڭ بىلىكتىلىگىن ارتتىرۋ بويىنشا پلەنارلىق جانە پانەلدىك پىكىرتالاستار، باياندامالار، جابىق پيچينگ-جوبالار مەن تاجىريبەلىك شەبەرلىك ساباقتار ۇيىمداستىرىلادى.
سپيكەرلەر قاتارىندا Euronews، Anadolu Agency، TRT Avaz Kanal، "حابار"، "Qazaqstan"، Atameken Business، NUR.KZ جانە وزبەكستان، تۇركيا، ەۋروپادان كەلگەن ساراپشىلار بار.
ارنايى ستريمينگ پلاتفورمالار نارىعىنا ارنالعان سەسسيالار دا وتەدى. وعان TV+، كينوپويسك، Unico Play، Birge TV، Freedom Media وكىلدەرى قاتىسادى.
ەكى كۇن بويى مەدياورتالىق حوللىندا 50 مەترلىك LED-ەكراندا "Astana Media Week 2025" كونتەنت-ماركەتى وتەدى. بۇل جەردە جاڭا فورماتتار مەن حالىقارالىق كووپەراسيالار تانىستىرىلادى. كونتەنت-ماركەت پروداكشن-كومپانيالار، ديستريبيۋتورلار مەن پلاتفورمالار اراسىنداعى ىسكەرلىك كەزدەسۋلەرگە ارنالعان الاڭ بولماق. مۇندا جاڭا يدەيالار، پيلوتتىق جوبالار جانە قىرعىزستان، وزبەكستان، جۇڭگو مەن قازاقستان نارىقتارىنا ارنالعان بىرلەسكەن ءونىم جاساۋعا مۇمكىندىكتەر ۇسىنىلادى.
"Astana Media Week 2025" اياسىندا ەڭ بەلسەندى قاتىسۋشىلارعا ارنايى سىيلىقتار قاراستىرىلعان. جەتەكشى ستريمينگ جانە مەديامونيتورينگ كومپانيالارى ۇزدىك سۇراق قويعان قاتىسۋشىلارعا جىلدىق جازىلىم سەرتيفيكاتتارىن جانە سامارقانعا ساپار جولداماسىن تابىستايدى.