كوكشەتاۋدىڭ ەكى قارت تۇرعىنى الاياقتاردىڭ قۇربانى بولدى. ەكەۋى ءبىر سحەماعا الداندى: كۋرەر-دروپپەر ولاردان 7،7 ميلليون تەڭگە الىپ كەتكەن، - دەپ حابارلايدى aqshamnews.kz Polisia.kz-كە سىلتەمە جاساپ.
بەلگىسىز بىرەۋلەر زەينەتكەرلەرگە قوڭىراۋ شالىپ، نەمەرەسى جول اپاتىنا تۇسكەنىن ايتقان. "قىلمىستىق جاۋاپكەرشىلىكتەن قۇتىلۋ" ءۇشىن قىلمىسكەرلەر قارت ادامداردان اقشا سۇراعان.
پوليسيانىڭ مالىمەتىنشە زەينەتكەرلەر اقشا بەرۋگە كەلىسكەن. كەيىننەن ولاردىڭ ۇيىنە بەلگىسىز قىز كەلىپ، قولما-قول اقشا سالىنعان پاكەتتى الىپ كەتكەن: بىرەۋىنەن 4،1 ميلليون، ەكىنشىسىنەن 3،6 ميلليون تەڭگە. كۋرەر قاراجاتتى دروپپەرلەردىڭ بانك شوتتارىنا اۋدارىپ، ول ءۇشىن سىياقى العان.
"جەدەل تەرگەۋ ءىس-شارالارى بارىسىندا كيبەرپوليسيا قىزمەتكەرلەرى قىزدىڭ كىم ەكەنىن انىقتادى. 20 جاستاعى قىز Telegram ارقىلى "جۇمىس" تاپقانى بەلگىلى بولدى. قازىرگى تاڭدا ونىڭ ەكى الاياقتىق ەپيزودقا قاتىسى بار ەكەنى دالەلدەندى"، - دەپ اتاپ ءوتتى پوليسيا.
ءقازىر سوتالدى تەرگەۋ جۇرگىزىلىپ جاتىر.