بۇل جونىندە وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ مالىمدەدى. ول اتاۋلى الەۋمەتتىك كومەكتىڭ (ااك) ۋاقىتشا سيپاتقا يە ەكەنىن، ونىڭ باستى ماقساتى – ازاماتتاردىڭ ەڭبەككە بەلسەندىلىگىن ارتتىرۋ ەكەنىن اتاپ ءوتتى.
"اتاۋلى الەۋمەتتىك كومەك – بۇل ءومىر بويى تولەنەتىن جاردەماقى ەمەس، ول ومىرىندە قيىندىق بولىپ جاتقان وتباسىعا اياقتان قايتا تۇرۋعا مۇمكىندىك بەرەتىن ۋاقىتشا قولداۋ شاراسى. باستى ماقساتىمىز – جاي كومەك كورسەتۋ ەمەس، ازاماتتاردىڭ ەڭبەك ەتۋىنە جانە الەۋەتىن جۇزەگە اسىرۋىنا جاعداي جاساۋ"، – دەدى باۋىرجان جاۋباسوۆ.
ونىڭ ايتۋىنشا، ااك الۋ ءۇشىن وتباسىنىڭ ەڭبەككە جارامدى مۇشەلەرى جۇمىسپەن قامتۋ باعدارلامالارىنا قاتىسۋعا ءتيىس.
اتاۋلى الەۋمەتتىك كومەك ەكى تۇرگە بولىنەدى. ءبىرىنشىسى، شارتسىز كومەك – ەڭبەككە ارالاسا المايتىن ازاماتتارعا (ءى-ىى توپتاعى مۇگەدەكتىگى بار جاندارعا، قارتتارعا كۇتىم جاساپ وتىرعان ادامدارعا جانە ت.ب.) تاعايىندالادى. ەكىنشىسى، شارتتى كومەك – ەڭبەككە جارامدى وتباسى مۇشەلەرى جۇمىسپەن قامتۋ شارالارىنا (جۇمىسقا ورنالاسۋ، وقىتۋ، قوعامدىق جۇمىستار جانە ت.ب.) قاتىسقان جاعدايدا بەرىلەدى.
2025 جىلى 1 قازانعا دەيىن الماتىدا 1 819 وتباسى، ياعني 9 063 ادام اتاۋلى الەۋمەتتىك كومەك العان.
"مۇنداي قولداۋ شارالارى ازاماتتارعا ۋاقىتشا قيىندىقتى ەڭسەرۋگە عانا ەمەس، كۇشىنە دەگەن سەنىمىن ارتتىرىپ، جىگەرىن جانىپ، وتباسىنىڭ تۇرمىسىن ءوز ەڭبەگىمەن قامتاماسىز ەتۋگە جول اشادى"، – دەپ ءسوزىن تۇيىندەدى باۋىرجان جاۋباسوۆ.