الماتىعا العاشقى قار جاۋدى: تازالىق جۇمىستارى قارقىندى جۇرگىزىلىپ جاتىر

قار كەشكى ساعات 20:00-دەن باستاپ جاۋا باستادى. قار قالىڭدىعى قالادا شامامەن 1 سم، تاۋلى ايماقتا 10 سم-گە دەيىن.

سينوپتيكتەر قاردىڭ جاۋاتىنىن كۇنى بۇرىن بولجاپ، قالانىڭ كوممۋنالدىق قىزمەتى تازالىق جۇمىستارىنا كۇنى بۇرىن قۇرال-سايماندارىن سايلاپ قويدى. قالا تۇرعىندارىنا كۇننىڭ كۇرت سۋىتاتىنى، قاردى ۋاقىتىلى كۇرەۋ ءۇشىن جۇرگىزۋشىلەردەن كولىكتى جول جيەگىنە قويماۋ ەسكەرتىلدى.

قار تۇسپەي تۇرىپ، 204 قۇم-تۇز شاشقىش تەحنيكا ماگيسترالداردى الدىن الا سۇيىق رەاگەنتتەرمەن وڭدەدى. كوكتايعاققا قارسى ماتەريال سەبىلىپ، ايالدامالار، جاياۋ وتكەلدەر مەن كوپىرلەر تازارتىلىپ جاتىر.

شاكىرتجان قۋاتجان "الماتى تازالىق" مەملەكەتتىك كوممۋنالدىق كاسىپورنىندا 4 جىلدان بەرى ەڭبەك ەتەدى. ايالدامالار مەن جاياۋ جۇرگىنشىلەر جولىن تازالاۋ – ونىڭ كۇندەلىكتى جۇمىسى. تۇنىمەن توقتامايتىن كوممۋنالدىق قىزمەت جۇمىسىنىڭ ءبارى حالىقتىڭ يگىلىگى ءۇشىن دەيدى ول.

"تاڭعى 8-دەن بەرى قار تازالىعىن جاساپ جاتىرمىز. ءبارى حالىقتىڭ قامى ءۇشىن. جۇمىسىم وزىمە ۇنايدى"، - دەيدى جۇمىسشى.

قالا كوشەلەرىندە 918 ارنايى تەحنيكا جانە 2550 جول جۇمىسشىسى قىزمەت اتقارۋدا. تولاسسىز جاۋعان قاردى ارنايى تەحنيكا جول جيەكتەرىنەن بارىنشا جىلدام تازالاپ اكەتىپ جاتىر. جول جۇمىسشىلارىنىڭ جاساپ جاتقان جۇمىستارىنىڭ ءبارى كولىك يەلەرى مەن جاياۋ جۇرگىنشىلەردىڭ  جايلىلىعى ءۇشىن.

سۋرەتتە كولىكپەن قالانى تازارتىپ جۇرگەن جۇمىسشى نۇرسۇلتان قالىق

نەگىزگى ماگيسترالدەر، كوپىرلەر، جول ايرىقتارى، ەڭىستەر مەن كوتەرىلىستەر، تروتۋارلار جانە ايالداما ايماقتارى كوكتايعاققا قارسى ماتەريالدارمەن وڭدەلىپ جاتىر. جۇمىستار تاۋلىك بويى جۇرگىزىلىپ جاتىر.