2025 جىلدىڭ ون ايىندا المالى اۋدانىندا ينجەنەرلىك جانە كولىك ينفراقۇرىلىمىن جاڭارتۋ باعىتىندا اۋقىمدى جۇمىستار اتقارىلدى. جىلۋ، سۋ جانە كارىز جەلىسى جوندەلىپ، جول مەن تروتۋار جاڭارتىلىپ، مىڭداعان جاڭا شام ورناتىلدى. بۇل قالا تۇرعىندارعا جايلى جاعداي جاساپ، قاۋىپسىزدىكتى ارتىرۋعا باعىتتالعان. وڭىرلىك كوممۋنيكاسيالار قىزمەتى الاڭىندا المالى اۋدانى اكىمى ارمان شامشين وسىلاي دەپ مالىمدەدى.
اۋدان اكىمدىگىنىڭ دەرەكتەرى بويىنشا، قازىرگى ۋاقىتتا جىلۋ جەلىلەرىنىڭ توزۋ دەڭگەيى 62%-دان اسادى، اۋىزسۋ جۇيەلەرى – شامامەن 73%، كارىز جەلىلەرى – 80%-عا جۋىق، ەلەكتر جەلىلەرىنىڭ 81% توزعان. وسىعان بايلانىستى كەشەندى جاڭالاۋ مەن جاڭعىرتۋ باعدارلاماسى جۇزەگە اسىپ جاتىر.
ەنەرگەتيكا جانە سۋمەن قامتۋ سالاسى بويىنشا جۇمىستار. «الاتاۋجارىقكومپانياسى» اق 1،2 شاقىرىم ەلەكتر جەلىسىن جاڭارتتى. «الماتى سۋ» شجق مكك اۋىزسۋ جۇيەلەرىن 3،18 شاقىرىمعا جاڭعىرتتى. كارىز جۇيەسى باعىتىندا 15 كوشەدە 10 شاقىرىم جاڭا جەلى سالىنىپ، «الماتى سۋ» ءتورت جەردى جاڭعىرتىپ شىقتى. ەنەرگەتيكا جانە سۋ شارۋاشىلىعى باسقارماسى مۇراتبايەۆ كوشەسىندە (گوگول كوشەسىنەن رايىمبەك داڭعىلىنا دەيىن – 1 120 م) جانە مۇقانوۆ كوشەسىندە (اباي داڭعىلىنان رايىمبەك داڭعىلىنا دەيىن – 2،5 شاقىرىم) كارىز جۇيەسىن ساناسيالاۋ جۇمىستارىن اياقتادى.
«الماتى جىلۋ جۇيەسى» ج ش س 30 مەكەنجاي بويىنشا ۇزىندىعى 12،3 شاقىرىم جىلۋ جەلىلەرىن جاڭارتتى. سونىڭ ارقاسىندا جىلۋمەن قامتۋ جۇيەسىنىڭ ساپاسى ارتىپ، جىلۋ ەنەرگياسىنىڭ جوعالۋى ازايدى.
جول جوندەۋ جانە كولىك ينفراقۇرىلىمى. ون اي ىشىندە ۇزىندىعى 5،8 شاقىرىم بولاتىن 11 كوشەدە ورتاشا جول جوندەۋ جۇمىستارى جۇرگىزىلدى، ونىڭ ۇشەۋى – ماگيسترالدىق، سەگىزى – اۋداندىق ماڭىزى بار كوشەلەر. سونداي-اق جەلتوقسان جانە رايىمبەك داڭعىلدارى بويىندا BRT جۇيەسىن ەنگىزۋ بويىنشا جۇمىستار جالعاسىپ جاتىر.
جوندەۋ جۇمىسى اياسىندا 180 مەكەنجايدا شۇڭقىرلار قالپىنا كەلتىرىلىپ، بىتەلدى (28 مىڭ شارشى مەتر)، بۇل جوسپارلانعان كولەمنەن 3 مىڭ شارشى مەترگە ارتىق. 728 ليۋك پەن 829 سۋ قابىلداعىش رەتكە كەلتىرىلدى. 16 مەكەنجايدا تروتۋارلار (5،4 كم) جوندەلىپ، 14 كوشەدە ۇزىندىعى 13،8 شاقىرىم بولاتىن تەحنيكالىق تروتۋار سالىندى.
اۋدانداعى 110 كوشەگە شام ورناتىلعان. 2025 جىلى ەسكى شامداردى اۋىستىرۋ ءۇشىن ءبىراز جۇمىس ىستەلدى: 3 750 جاڭا شامى ورناتىلىپ، 48،5 شاقىرىم كابەل جەلىسى تارتىلدى. سىرتقى جارىقتاندىرۋ باسقارۋ شكافتارى دا جاڭارتىلىپ جاتىر – 61 نىساننىڭ 45-ىندە جۇمىس تولىق اياقتالعان.
«جاياۋ جۇرگىنشىنىڭ قاۋىپسىزدىگىن ارتتىرۋ ماقساتىندا نازاربايەۆ، اباي، سەيفۋللين، تولە بي، جەلتوقسان مەن ناۋرىزباي باتىر كوشەسىندە جارىقتاندىرۋ جۇيەسى جاڭارتىلدى. وسىنىڭ ارقاسىندا كەشكى جانە تۇنگى ۋاقىتتا كوشە قوزعالىسى جايلى ءارى ءقاۋىپسىز بولدى»، - دەدى ارمان شامشين.