قارجى مونيتورينگى اگەنتتىگى ينتەرنەت-الاياقتاردىڭ باتىس قازاقستان وبلىسىندا جاستاردىڭ بانكتىك شوتتارىن زاڭسىز پايدالانىپ، 17 ميلليون تەڭگە كولەمىندە قاراجات جىمقىرۋ دەرەگىن تەرگەپ جاتىر، - دەپ حابارلايدى aqshamnews.kz ءتىلشىسى.
ۇيىمداستىرۋشىلار ۋاقىتشا تابىس تابۋ رەتىندە جاستارعا ەكىنشى دەڭگەيلى بانكتەردەن ءوز اتىنا شوت اشۋدى ۇسىنعان.
ينتەرنەت-بانكينگتىڭ ءموبيلدى قوسىمشالارى ورناتىلعاننان كەيىن شوتتارعا كىرۋ قىلمىسكەرلەردىڭ باقىلاۋىنا وتكەن.
"مۇنداي ارەكەتتەرگە قاتىسقان تۇلعالار – "دروپپەرلەر" 200-دەن 350 اقش دوللارىنا دەيىن سىياقى الىپ وتىرعان. ولاردىڭ اتىنا اشىلعان شوتتار ارقىلى ينتەرنەت-الاياقتىق قۇرباندارىنان تۇسكەن قاراجات اۋدارىلىپ وتىرعان. زاڭسىز اينالىمداعى قاراجاتتىڭ جالپى كولەمى 17 ملن تەڭگەدەن استقان"، – دەلىنگەن حابارلامادا.
ەپيزودتاردىڭ بىرىندە بانكتىك كارتاسى بۇعاتتالعاننان كەيىن ءبىر دروپپەر زاڭسىز ارەكەتتەرگە قاتىسۋدان باس تارتقان. قىلمىستىق توپتىڭ قاتىسۋشىلارى ونى كۇشتەپ ۇستاپ، قورقىتىپ، شوتقا قايتا كىرۋدى قالپىنا كەلتىرۋدى تالاپ ەتكەن.
"ءقازىر ۇيىمداستىرۋشى كۇدىكتى رەتىندە تانىلىپ، سوتتىڭ سانكسياسىمەن قاماۋعا الىنعان. تەرگەۋ جالعاسىپ جاتىر"، – دەلىنگەن حابارلامادا.
ق ر قىلمىستىق-پروسەستىك كودەكسىنىڭ 201-بابىنا سايكەس وزگە اقپارات جاريا ەتىلمەيدى.
ەسكە سالايىق، 2025 جىلعى 16 قىركۇيەكتەن باستاپ قىلمىستىق كودەكسكە بانكتىك شوتقا، تولەم قۇرالىنا نەمەسە سايكەستەندىرۋ قۇرالىنا زاڭسىز قولجەتىمدىلىكتى بەرۋ، تاراتۋ نە يەلەنۋ ءۇشىن جاۋاپكەرشىلىكتى بەلگىلەيتىن 232-1-باپ ەنگىزىلدى. بۇل باپ مۇلكىن تاركىلەي وتىرىپ، 7 جىلعا دەيىن باس بوستاندىعىنان ايىرۋ جازاسىن كوزدەيدى.