شابىتتانۋدىڭ ءتيىمدى تاسىلدەرى
بۇگىنگىدەي قايناپ جاتقان ومىردە ءوزىڭىزدى ۇنەمى شابىتتاندىرىپ، ەنەرگيا الا ءبىلۋ وتە ماڭىزدى. ايتپەسە، قىم-قۋىت مىنا زاماندا ەشتەڭەگە زاۋقىڭىز سوقپاي، ءوزىڭىزدى جوعالتىپ الۋىڭىز ابدەن مۇمكىن.
جىگەرىڭىز قۇم بولىپ، شابىتىڭىز سارقىلىپ جۇرسە، كەلەسى ارەكەتتەردى جاساپ كورىڭىز:
كوبىرەك سەرۋەندەڭىز! ويدى ءبىر جۇيەگە كەلتىرۋدىڭ ءتيىمدى ادىستەرىنىڭ ءبىرى – كوشەگە شىعىپ، بوي جازۋ. سەرۋەندەۋ شىعارماشىلىق ويعا جەتەلەپ، كوڭىل-كۇيدى جاقسارتىپ، ومىرگە باسقاشا قاراۋعا كومەكتەسەدى. جاقىن ماڭداعى ساياباققا بارىپ، تازا اۋادا دەم الىڭىز، تابيعاتتىڭ اسەمدىگىنەن راحاتتانىپ، اينالاڭىزدى باقىلاڭىز. ءبىر ساتكە بولسا دا، پروبلەمالارىڭىز، مىندەتتەرىڭىز مەن ماقساتارىڭىزدى ۇمىتىپ، سول ساتتە بولۋعا تىرىسىڭىز.
سۋرەتكە ءتۇسىرىڭىز. نازارىڭىزدى اۋدارعاننىڭ ءبارىن سۋرەتكە تارتىپ الىڭىز. كەيىننەن ەشبىر ماقساتسىز تۇسىرىلگەن كادرلاردان بۇرىن ەشقانداي كوز توقتاتىپ قاراماعان زاتتارىڭىزدان نەمەسە اينالاڭىزدان قىزىقتى دەتالدار، كرەاتيۆتى وبرازدار، ءتىپتى قىزىقتى ادامداردى بايقاۋىڭىز مۇمكىن.
«ميىڭىزدى قوزعاڭىز». ول ءۇشىن فريرايتينگ دەپ اتالاتىن ءادىس جاقسى كومەكتەسەدى. بۇل ءتاسىلدىڭ ارقاسىندا باستا جۇرگەن ويلاردان ارىلىپ، ءبىر جەڭىلدەپ قالۋعا بولادى. ول ءۇشىن ءبىر پاراق قاعاز الىپ، وعان كوپتەن بەرى ويىڭىزدا جۇرگەننىڭ ءبارىن، ءتىپتى جاڭا عانا كەلگەن ويدى دا ءتىزىپ شىعاسىز. جازعانىڭىز بىر-بىرىمەن قيىسپاۋى، باسى بار، اياعى جوق بولۋى مۇمكىن. ءبىراق ونى تۇزەتىپ اۋرە بولۋدىڭ قاجەتى جوق. ءبارىن جازىپ بولعاننان كەيىن، قايتادان ءبىر قاراپ شىعىپ، قاجەتسىز دەپ ساناعاندارىڭىزدى سىزىپ تاستاڭىز. ال قالعان جازۋىڭىزدان دەرەۋ ىسكە اسىرۋدى قاجەت دەپ سانايتىنداي وتە قۇندى ويلار شىعىپ قالۋى مۇمكىن.
ءومىربايان وقىڭىز. ويىڭىزعا العانىڭىز وزىڭىزگە ءجونسىز، رەتسىز دەپ كورىنسە، بەلگىلى، تانىمال، جەتىستىككە جەتكەن ادامداردىڭ ءومىربايانىن وقۋعا بولادى. ءوزىڭىز بۇرىننان بەرى ءومىر جولىنا، جەتىستىكتەرىنە قىزىعاتىن ادامنىڭ ومىرلىك جولىن زەرتتەڭىز، ىزدەنىڭىز. ءسىزدى ءوز ىسىمەن، ارەكەتىمەن شابىتتاندىراتىن سول ادامنىڭ تاجىريبەسىنەن وزىڭىزگە قولدانۋعا بولاتىن نە بار ەكەنىنە ءمان بەرىڭىز، سوعان ۇقساۋعا، ءتىپتى ودان اسۋعا تىرىسىڭىز.
ءتىزىم جاساڭىز. الداعى ۋاقىتتا ىستەيمىن، بارامىن دەپ جۇرگەن ىستەرىڭىز بەن ويلارىڭىزدىڭ ءبارىن جوسپارلاپ، تىزىمدەپ شىققان ءجون. ءتىپتى ارماندارىڭىزدى دا جازىپ، ارماندار كارتاسىن جاساسا دا، ارتىق ەمەس. ونى جازۋىن جازىپ، كورىنبەيتىن جەرگە تىعىپ تاستاعانشا، ءجيى-جيى قاراپ وتىرعانىڭىز جاقسى. ايقىن ءارى انىق ەتىپ جازىلعان ماقساتتار ناقتى ارەكەتتەر جاساۋعا يتەرمەلەيدى.
جاڭا نارسەنى ۇيرەنۋ. وزىڭىزگە تانىس ەمەس ماماندىق، كاسىپ بولماسا اسپاپ ۇيرەنۋ دە ميعا جاقسى اسەر ەتەدى. بۇل ءتاسىلدىڭ ارقاسىندا ايلار بويى شەشە الماي جۇرگەن ماسەلەلەرگە باسقاشا كوزقاراس، باسقا جولمەن شەشىم شىعارۋ سياقتى كەرەمەت ويلار كەلۋى ابدەن مۇمكىن. ميدى باسقا ارناعا اۋىستىرعاندا، باسقاشا ويلار، جاڭا مۇمكىندىكتەر اشىلا باستايدى.
وتكەنگە ساياحات. ەسكى البومداردى اقتارىپ، سۋرەت قاراۋ بولماسا اتا-اناڭىزدان كىشكەنە كۇنىڭىزدەگى ەستەلىكتەردى سۇراۋ دا پايدالى ەكەن. بالا كەزدەگى ارماندارىڭىزدى ەسكە ءتۇسىرىپ، جان-جاعىڭىزعا بالانىڭ كوزىمەن قاراپ كورىڭىز. مۇمكىن، بالا قيالىڭىزدا ورىندالماي قالعان كەيبىر ارمانداردى ورىندايتىن ۋاقىت كەلگەن شىعار.
وزىڭىزبەن نيەتتەس، پىكىرلەس ادامدار ىزدەڭىز. ورتاق قىزىعۋشىلىقتارىڭىز بار ورتا قالىپتاستىرىڭىز. بۇل ءسىزدىڭ تاجىريبە الماسىپ، دامۋىڭىزعا جاقسى اسەر ەتەدى. وزىڭىزبەن نيەتتەس ادامداردىڭ پىكىرىن ءبىلىپ، جاڭا ويدان شابىت الۋعا دا سەپتىگىن زور.
جەتىستىكتەرىڭىزگە قۋانا ءبىلىڭىز. بۇعان دەيىن ءساتتى، ءوزىڭىزدىڭ ويىڭىزدان شىققان ءىسىڭىز، جۇمىسىڭىز بولسا، سونى قايتادان ءبىر قاراپ شىعىڭىز، سول كەزدەگى قۋانىشتى ءساتىڭىزدى ەسكە ءتۇسىرىڭىز. تۋعان-تۋىسىڭىز، ارىپتەستەرىڭىز بەن دوستارىڭىز ءسىزدىڭ قانداي قاسيەتتەرىڭىزدى جوعارى باعالاپ، قۇرمەتتەيتىنىنە ءمان بەرىڭىز. سول ارەكەتتەرىڭىزدى ماقتان تۇتىڭىز. بۇل دا - شابىتتى ەسەلەۋدىڭ ۇتىمدى جولى. شابىت تاپپاي، ساتسىزدىكتەن جولىڭىز بولماي جۇرسە، وسى كەڭەستەرگە قۇلاق ءتۇرىپ، ىسكە كىرىسىڭىز!