تۇماۋدىڭ الدىن الۋ شارالارى
قازاقستاندا 15 قىركۇيەك كۇنى تۇماۋعا قارسى ۆاكسينالاۋ باستالادى. بۇل تۋرالى ق ر دەنساۋلىق ساقتاۋ ءبىرىنشى ۆيسە-مينيسترى مارات شورانوۆ ايتتى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
«جاقىنداپ قالعان جرۆي، ياعني تۇماۋ ماۋسىمىنا ايرىقشا توقتالىپ وتكىم كەلەدى. بيىل بيۋدجەت قاراجاتى ەسەبىنەن رەسەيدە شىعارىلعان «گريپپول+» ۆاكسيناسىنىڭ 2،5 ملن دوزاسى ساتىپ الىندى. ۆاكسينا قۇرامىندا الداعى ماۋسىمعا قارسى شتامم بار. بۇل رەسپۋبليكانىڭ جالپى تۇرعىندارىنىڭ 13 پايىزىن قامتۋعا مۇمكىندىك بەرەدى. دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسى – 10 پايىز. جرۆي مەن تۇماۋعا قارسى ۆاكسيناسيا 15 قىركۇيەكتە باستالادى»، - دەدى ول ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.
ءبىرىنشى ۆيسە-مينيستردىڭ اتاپ وتۋىنشە، وسىعان وراي ەلىمىزدىڭ باس مەملەكەتتىك سانيتار دارىگەرىنىڭ قاۋلىسى قابىلدانعان.
«مەملەكەتتىك بيۋدجەت قاراجاتى ەسەبىنەن حالىقتىڭ ەڭ ءالسىز توبى ۆاكسينالاناتىندىعىن اتاپ وتكىم كەلەدى. ولار: مەديسينا قىزمەتكەرلەرى، مەديسينالىق ۇيىمداردا ديسپانسەرلىك ەسەپتە تۇرعان بالالار، جەتىم بالالار جانە اتا-اناسىنىڭ قامقورلىعىنسىز قالعان بالالار جانە باسقالارى. بۇعان قوسا، ۆاكسينالاۋ جۇمىس بەرۋشىلەردىڭ جانە حالىقتىڭ جەكە قاراجاتى ەسەبىنەن دە جۇرگىزىلەدى»، - دەدى مارات شورانوۆ.
ونىڭ ايتۋىنشا، رەسەيلىك ۆاكسينادان بولەك قازاقستان اۋماعىندا تاعى 3 ءوندىرۋشىنىڭ 4 ۆاكسيناسى تىركەلگەن. اتاپ ايتقاندا، سانوفي-پاستەر (فرانسيا) وندىرگەن «ۆاكسيگريپ تەترا»، ينفليۋۆاك (نيدەرلاندى) مەن سينوۆاك بيوتەك (كيتاي) كومپانيالارى وندىرگەن ۆاكسينالاردى دا الۋعا بولادى.