الماتىدا «ادال سايلاۋ ءۇشىن» قوزعالىسىنىڭ باستاماسىمەن «ازاماتتاردىڭ سايلاۋ قۇقىقتارىنىڭ كونستيتۋسيالىق كەپىلدىكتەرى» تاقىرىبىندا ۇكىمەتتىك ەمەس ۇيىمداردىڭ وكىلدەرىمەن كەزدەسۋ ءوتتى، دەپ حابارلايدى Almaty-akshamy.kz
جيىنعا «قوعامدىق كەلىسىم»، «قازاقستان جاستارى»، «اسسامبلەيا جاستارى»، «جاناشىر»، «دانالىق» جانە وزگە دە ۇكىمەتتىك ەمەس ۇيىمدار، قوعامدىق بىرلەستىكتەر مەن قوزعالىستاردىڭ وكىلدەرى قاتىستى.
جيىن بارىسىندا الداعى سايلاۋدىڭ ءادىل ءارى زاڭعا ساي ءوتۋى ءۇشىن نە ىستەلۋى كەرەكتىگى تالقىلاندى. «ادال سايلاۋ ءۇشىن» قوزعالىسىنىڭ الماتى قالاسى بويىنشا جەتەكشىسى باۋىرجان ماقۇلبايەۆ ۇيىمنىڭ نەگىزگى ماقساتى مەن مىندەتتەرىن ايتىپ ءوتتى:
«27 قىركۇيەك كۇنى قازاقستان زاڭگەرلەر وداعىنىڭ شتابىندا زاڭ سالاسىنا قاتىسى بار بارلىق مامانداردى بىرىكتىرەتىن «ادال سايلاۋ ءۇشىن» قوزعالىسى قۇرىلدى. قوزعالىستىڭ نەگىزگى ۇستانىمى – ەشقانداي پرەزيدەنتتىككە ۇمىتكەردى نە پارتيانى قولداپ ناسيحاتتىق جۇمىستار جۇرگىزبەۋ. ءبىز سايلاۋ پروسەسىنە تىكەلەي قاتىسپاي، ءبىراق سايلاۋشىلار مەن سايلانۋشىلارعا قۇقىقتىق كومەك كورسەتۋ ماقساتىن ۇستانامىز»، - دەدى «ادال سايلاۋ ءۇشىن» قوزعالىسىنىڭ الماتى قالاسى بويىنشا جەتەكشىسى باۋىرجان ماقۇلبايەۆ.
سونداي-اق، ول ۇكىمەتتىك ەمەس ۇيىمداردى الداعى سايلاۋدىڭ بارىنشا ءادىل ءوتۋى ءۇشىن بەلسەندىلىك تانىتۋعا شاقىردى.
«بۇگىن قوعامدىق بىرلەستىكتەردى جيناپ، سىزدەر ارقىلى قوعامعا اسەر ەتكىمىز كەلەدى. قوعامدىق بىرلەستىكتەر مەن قورلار سايلاۋدىڭ ءادىل وتۋىنە ۇلەس قوسسا دەيمىز. ءار ادام سايلاۋشى رەتىندەگى قۇقىعىن ءبىلىپ، ونى قورعاي الۋى قاجەت. سوندىقتان ادامدارعا قاجەتتى اقپاراتتى جەتكىزۋدى وتىنەمىز»، – دەدى «ادال سايلاۋ ءۇشىن» قوزعالىسىنىڭ الماتى قالاسى بويىنشا جەتەكشىسى باۋىرجان ماقۇلبايەۆ.